يمكن لآى منا ان يقابله فى آى مكان وآى وقت, وربما تكون قابلته بالفعل وستتذكره آلان. لن أذكر أسمه, فلا فارق, يكفى انه واحد منا أو كان واحد منا, جلس بجانبى بملابسه المغبرة ولحيته النصف نامية, وعيناه فى لون الدم
سألته: أنت ليه على طول مسطول كده, مبتفقش خالص
أجاب ضاحكا: واحد بيبيع حشيش وبرشام, لازم أبقى مسطول على طول
- وليه بتببيع الحاجات دى
- عندى 33 سنه, وحبيت أشترى موتوسيكل من الصينى الجديد, أكتشفت انى مش عارف اجمع مبلغ 3000 جنيه, تصدق, معرفتش حتى أجمع ألف جنيه على بعض, قلت لنفسى أمال هتتجوز ازاى
- طب متدور على آى شغل
- هما المتعلمين لاقيين شغل, لما انا هلاقى, انا اكبر مبلغ خدته فى شغل كان 400 جنيه, لو مربيين كلب هيصرف أكتر منهم
- نفسك فى آيه
- ألاقى مليار جنيه, وأشغلهم
- يابنى هو اللى معاه مليار جنيه محتاج يشتغل, أنت تعرف تعدهم الأول
- عارف انهم كتير, وانا هأكسب منهم قدهم عشر مرات
- ازاى يا برنس البرانيس
-هشغلهم فى المخدرات, هى اللى بتكسب دلوقتى, وبالذات البودرة
- بودرة مرة واحدة
- آه, هاستورد مركب بودرة من برا, وانا اللى هاوزعها على مصر كلها
- وانت فاكر الحكومة هتسيبك
- كله بيسلك بالجنيه, وهابقى احسن من سيد حنفى. يقصد عزت حنفى - امبراطور المخدرات الشهير
صححت له الأسم قائلا
- وحسابك عند ربنا يوم القيامة
- أحيينى النهارده, وموتنى بكره
ولوى شفتيه ممتعضا, وتركنى بعدها وأنصرف
*******
بالطبع هو نموذج شائع لشباب نموا وترعرعوا وسط قانون الغابة والمصلحة التى نحيا فيها, حيث الجنيه غلب الكارنيه, حيث الأسرة والقدوة والتعليم والذوق والأبداع تـــــــرف, التفكير نفسه ترف, لا يتحمله الا القادرون, ساقته الصدف يوما الى حجز القسم لتدخين سيجارة حشيش فى الشارع, فخرج من الحجز وقد تعلم شيئين, تعلم تجارة الحبوب المخدرة, و"أتعلم" فى وشه على سبيل التذكار
لا أعفيه من مسؤلية تحمل نتائج أختياراته, ولكن هناك من تسحقهم الظروف والفقر وتقتل فيهم الحكومات والأنظمة الفاسدة -مثلنا- الأمل, الأمل فى الحياة والحب, الأمل فى الغد أو ان يكون هناك غد من أساسه, يقتلون فيه الأمل والرغبة فى ان يكون انسان, فلا يخيب ظنهم وينشأ ليعيش ويتصرف شبه آدمى
