سنتين كمدون .. الوقت بيعدي هوا .. المفروض ان المدونه وصلت سنتين من عشر ايام .. بس معنديش وقت أكتب حاجة بس انا جبتلها تورتها وظبطها واتراضينا وبلاش البصات ديه.. المدونه مش حد تانيه عارفكم خلابيص.. السنه التانيه ديه ليا في التدوين بشكل عام فيها قرارات مصيريه كتير حصلت في حياتي ويمكن تكون الأشد قوة وتأثيرا في حياتي.. أهمها وده يمكن بذكره لأول مره في المدونه إني من حوالي سبع اشهر قررت اكمل دراسات على حساب شغلي وفرص شغل جاتلي .. وفي أكتر من قرار خدتهم ومنهم قرارات لسه في دماغي مهمة أوي بدعي ربنا إنها تكون صح وربنا يوفقني فيها .. في دراستي حاليا أنا مضغوط جدا يومي الدراسي من سبعه لأربعة عشر ساعه يوميا .. برجع بعديها البيت مدمر تماما .. ومعنديش وقت خالص لأي شيء .. وتغدو اقصى امنيه ليا في حياتي اني اروح للحلاق .. بتكلم بجد .. انا بقالي اكتر من شهر نفسي احلق محلقتش إلا من ثلاث ايام تقريبا .. ودوامي ست أيام في الأسبوع وعليا ضغط كبير من المشاريع الكتير إلي بتتطلب مني في وقت تقريبا شبه مستحيل وضيق جدا .. والحاجة لازم تتسلم.. والي مش عارف يسأل عن الـ ITI بس الحقيقه .. أنا مستمتع بالي بعمله .. وده إلي مهون عليا والحمدلله .. أينعم أنا المدونه والمدونين مقصر معاهم حبه.. بس إن شاء الله هحاول أوازن بين شغلي ونشاطاتي ..
بينما أن أقلب في قنوات التلفاز .. فإذا بي أشاهد إعلانا من التي يعج بها هذا الإختراع ذو الزوايا الأربعة محشوا بعدة أفكار لتكتشف في النهاية أنك مطالب بالإقتناع بشراء شيء أخر !!.. على غرار ذلك الإعلان الذي تظهر فيه تلك الفتاة الحسناء التي تأتي في أقصى درجات الجو حرارة لتدخل البيت وقد أصابها إعياء جم .. ولذلك - لأنها متعبة - فإنها ستستخدم المكنسه الكهربائيه الجديدة من ماركة توشيبا لتكنس البيت .. فإن أفضل شيء تفعله وأنت متعب أن تكنس البيت .. دعك أساسا من أن بنات هذا الجيل غير قادرات على غسل طبق كان فيه بعضا من الفول قبل أن يدمر عن بكرة أبيه.. ولذلك تكون قد تعلمت قيمة جديدة في حياتك .. عندما تكون تعباَ إكنس البيت بمكنسة توشيبا .. وربما تتعثر في ذاك الإعلان الذي يقول لك إن الجو ملوث ولذلك يجب أن تبتاع سخانا بالكهرباء - وليس مكيفا- حيث ينقي المياة !! .. رائع .. فأنا أعاني من حساسيه من الجو .. فلماذا تشم هواء ملوثا ولديك سخان ؟!! وقد تكون من سعداء الحظ وتشاهد إعلانا يصور لك مجموعة من الناس يقفون في ترقب وخوف خلف باب .. وأحدهم مربي شنبه زي سمير الإسكندراني - الذي لا أدري من هو بالظبط - ويقول لرجل برز لتوه من خلف الباب في شيء من الحذر والترقب "ما الأخبار؟؟ " فيدخل الرجل من الباب مرة أخرى لتفقد الأخبار ويوصده خلفة وأنا اكاد اقول "بنت إن شاء الله" فإذا به إعلان الضرائب .. ولكي "تسترجل" و "تحط الإزازة في أي حتة" فلازم تشرب "بيريل" .. وستضع الإزازة في أي حتة حتى تصفعك أمك أمام زملائك ناعتةَ إياك بـ "عديم التربية" .. ولكي تكون "رجلا" وتنظر للمرأة كما "يجب" أن ينظر إليها الرجال .. فلازم "تشرب بيريل" لان "شخصية البنت "أخر حاجة يتبص عليها!!..وإلا ستكون نوعا من الخراف التي تعج بها الأرياف لا أكثر .. دعك من هذه الملاحظات السخيفة .. فما هي إلا علامات تعجب أخرج منها بعد كل إعلان وأنا فاغر فاهي وأنظر نظرة من سمع نكته بايخة في تكهن ..ثم يقول "أضحك ولا لسه؟".. بل إنني أعجب أننا أصبحنا لا نقتنع بمنتج لا يتوفر في إعلانه عدة شروط وإلا فإني أضمن لكم أن هذا الإعلان لن يشاهد إلا في عنبر العساكر في مراكز التدريب الإلزامي في فتره تجنيدهم في قويسنا أو دهشور أو ما شابه.. فإن لم يقنعك - الإعلان لا المعسكر - أنه لن يسبب لزوجتك او فتاتك - كل واحد وظروفة - السمنة في المستقبل فهذا منتج فاشل بكل المقاييس!! .. فلا معنى أن أشتري مكيفا لا يضمن لي نحافة زوجتي وإلا فإنه مكيف "صيني أي كلام" .. ويبدو أن منتجو الإعلانات قد فهموا ذلك فأصبح معجون الأسنان لايستخدم للتنظيف بل لتعطر فمك حتى لا تهرب منك فتاتك عندما تقابلها وتصاب بخيبة أمل وينتهي بك المطاف أن تقفز أمام سيارة على الطريق السريع لتجد حظك العاثر أن السيارة تضع إطارات من نوع رائع فتتوقف ولا تصدمك .. وإن لم يكن الإعلان "يتحدى الملل" لما وجدت أحدا يهتم به ويقوم بتسجيله ورفعه على المواقع ليراه الاخرون .. فلم أجد إعلان رابسو على المنتديات مثلا!! .. ولكن أرى أن جمهورية "شمبونجو" أصبحت أكثر شهرة من بني سويف على الإنترنت .. وأصبح المحيط الأطلنطي هو الوجهة الجديدة للمصايف بدلا من البحر المتوسط .. ولربما أصبح الإعلان محل جدل ونقاش جاد وحاد في المناطق المهمة على الفيس بووك لتقوم مظاهرات وجروبات لإعادة "القرد إلي بيتكلم" الذي ذهب إلى "شمبونجو" بعدما أن وقع ضحية لصفقة مادية بحتة لا تهتم بحرية الحيوانات ولا تخدم إلا مطامع عدد من رجال الأعمال الأوغاد الذين لا يأبهون بأحد.. منادين الأمم المتحده أن تدين هؤلاء المتعفنون لعدم إحترام حريه وحقوق الحيوان .. والآن سأترككم مع هذا الإعلان .. الذي سوف يضمن لكي سيدتي عدم التخمه ويضمن لك سيدي الضحك وربما عالجك نفسيا وجعلك "تسترجل" ..
تصدقوا بالله .. إحنا فعلا نستاهل إلي ربنا يعملوا فينا من الحكومه والشارع والغلو والشقق الغاليه والقتل والإعتداء على البنات وكل البلاوي ديه!! .. لان بجد إحنا شعب منستاهلش .. بنقعد نتحسبن ونشتم وخلاص طول ما إحنا في موقف ضعف .. ونكون مساكين .. لكن أول ما نقدر بنفتري .. أنا مش بتكلم على حاكم او محافظ .. أنا بتكلم على أبسط واحد في الشعب .. ليه كده ؟؟!! فعلا سواقين الميكروباصات بيفهموا وعندهم حق يعاملونا زي الزفت!! .. لأن لو عاملونا بإحترام هناكلهم .. والله العظيم في سواقين ميكروباصات محترمين جدا عن ناس ببدل .. أنا بتكلم على الأخلاق والمعامله .. بنشتكي من معامله سواقين الميكروباصات إلي بيعاملوا الزباين زي الغنم .. طيب لو سواق الميكروباص عاملك كويس .. هل هتعامله كويس ؟؟ اليوم خرجت بدري كنت رايح مشوار لمدينه نصر .. الساعه 7 الصبح .. ومفيش شغل ويوم اجازه يعني الشوارع هيو خالص .. ولحسن الحظ لقيت ميكروباص بيحمل .. ومن ضمن الركاب ركب راجل كبير في أوساط الخمسينات لابس بدله وشكله محترم جدا .. فلمينا الأجره من بعض .. وواحد كان معاه عشره اديناله الفكه ومتبقاش غير الراجل أبو بدله وكان معاه عشره .. مش جريمه إن معاك عشره .. ولا جريمه ان السواق ميكونش معاه فكه .. والطبيعي أن سواقين الميكروباصات بيقلك لو مش معاه ومش عارف يتصرف يرجعلك الفلوس بقمه الإحتقار ويقلك -"شفلي فكه يا برنس إحنا أول دور انتوا هتقرفونا على الصبح ".. ورد الفعل إن الي دفع بيخاف وبيطلع فكه او بيدور فكه من إلي في العربيه ومش بيفتح بقه .. لكن المرادي كان السواق شاب محترم جدا وبسيط جدا .. قاله -"يا حج اتفضل شفلي فكه لان إحنا لسه طالعين ومش معانا فكه" .. وكأن أبو بدله لما شافه محترم قال ده صيده وقام مزعق وقلب وشه وكأن السواق كفر: -"وأنا اعملك ايه يعني ان شغلتي أفكلك .. مش معايا فكه اتصرف ولا فك من حد من زمايلك .. أنا مالي .." والسواق بكل هدوء قام قله والله بكل إحترام: -" حضرتك ده أول دور .. وانا والله وأنا سواق وانا رايح استلم العربيه باخد فكه علشان المواصلات علشان عارف الصبح مفيش فكه ..الناس لسه بتتصبح".. والراجل أبو بدله فضل يتكلم بطريقه سيئه جدا معاه كأنه أجرم.. ليه كده؟؟؟ .. هوا علشان السواق محترم وكلمك بالراحة تقوم متحترموش؟؟ هوا ده مش بني أدم زيك؟؟ مين اداك الحق تزعق فيه ؟ اشمعنى لما السواقين بيبهدلونا بنبقى مغلوب على أمرنا ومساكين .. وبنقول السواقين وحشين ومحدش بيبق معاهم بكلمه وبنقول لو كانوا محترمين هنعاملهم باحترام!!.. طب لما يكون السواق كويس بقى .. خليك كويس معاه .. ليه تستغله؟؟!!.. وليه تعامله وحش؟؟!! .. قال النبي صلى الله عليه وسلم "ليس منا من لم يرحم صغيرنا ويوقر كبيرنا" والسواق وقر الكبير والراجل محترمش الاصغر منه .. يبقى مين الاحسن السواق ولا أبو بدله ؟؟ هوا غلطان انه مشخطش في الراجل ابو بدله وعامله زي الزفت لان فعلا مينفعش معانا غير كده .. ليه لما بيبقى في ايدك حاجة او ورقه بترميها في الشارع؟؟!!.. حطها ف جيبك أو امشي بيها لحد ما تلاقي زباله .. ولو حكمتك الظروف وخلاص محتاج تسبها إركنها على أي جنب ساعتها تكون عملت إلي عليك .. ليه بتشتكي من وساخه الشارع وانت موسخه؟؟ ليه في اي حاجه بتنتقدها لما تكون في موقف قوه بتفتري رغم إنك كنت بتنتقدها بنفسك زي سواق الميكروباص المحترم إلي بتنتقده واول ما تشوفه محترم تعامل انت زي الزفت ؟؟.. والله العظيم إحنا فعلا نستاهل البلاوي إلي علينا ديه كلها إلا حتى أبسط أنواع المعامله من لو سمحت وشكرا ومن مفضلك مش بنقلها لبعض!!.. كنت مسافر عمره .. وحصل خلاف ببين الجروب بتعي وما بين منسقي الرحله .. فانا اتصلت بالمنسق وقلته حضرتك كذا كذا كذا .. بعد ما قفلت واحد من الجروب وكان راجل كبير وعنده احفاد قلي وكان في قمه الاستغراب والضيقه مني: -"انت ليه بتقله حضرتك؟؟!!.. ده راجل قله واحنا في حجات نقصانا بسببه!!".. فما كان ان رديت عليه اني متربتش على كده ده راجل اكبر مني ولازم احترمه حتى لو مختلف معاه والراجل مقلش لا ووعد انه هيحل الاشكال ؟؟ يعني ايه المشكله حتى لو إختلفنا نحترم بعض؟؟ .. ليه في ناس مصممه تكتب على الحيطان .. ليه في ناس بتذاكر بالقلم على كنبه الاتوبيس ؟؟ ليه أصلا مش بنحترم بعض .. قريت في مدونه زميل لي (غالبا محمد جمال) .. إن احنا محتاجين قنبله من بتوع هيروشيما تنضف كل حاجة وتطلع ناس نضيفه .. ربنا يهدينا ويسامحنا على أبسط قواعد الدين عندنا إلي مش بنلتزم بيها وانا اول الغير ملتزمين بالاخلاق للأسف.."الدين الأخلاق" ..
أنما الامم الاخلاق مابقيت فان هم ذهبت اخلاقهم ذهبوا..
طيب .. أنا بصراحة مبقتش قادر أعبر عن مدى خجلي وحزني على نفسي .. حيث أني أثبت للمره الثانية على التوالي أني (جليل الحيا) ..(يا جليل الحيا الجزء الأول).. مش كفايه وصلت من الفجور وقله الحيا وانعدام الضمير إني أدخل كوبري قصر النيل بكتاب ضاربا بعرض الحائط احترام الناس الي هناك .. اكتشفت اني جليل الحيا لدرجة إني حتى مش قادر أفهم القواعد الأساسيه البسيطة للناس العادية مش جليله الحيا .. وبسبب جله الحيا إلي عندي مش بفهم الحجات المؤدبه بين اي اتنين عاديين .. وأنا بترجاكم تساعدوني لاني بقيت شخص وحش في المجتمع من إلي بعمله .. ساعدوني أتثقف وابقى انسان مش (جليل الحيا) .. أتوسل إليكم .. شوفوا جلة الحيا : لما كنت لسه في الكليه .. كنت وأنا أمشي في أروقة الجامعة لغايه الكليه بتعتي .. كنت بشوف كوبري قصر النيل كأنه اتنقل هنا !!.. وكل واحد واخد الحته الطريه بتعته في زاوية .. طبعا أنا المرادي بدخل بثقه شويه ..لان الكتب مش جله حيا - مش أوي يعني - في الجامعه على حد علمي .. فكنت دائما أرى الشاب الي مش جليل الحيا قاعد والحته جنبه وهيا عماله تعيط وهوا يوشوش لها في ودنها .. فأقول وقد تأثرت "مسكينه يكون جدها مات" .. وفي اليوم التاني يتكرر نفس الموقف مع شاب وحته تانين .. فأقول "لا حول ولا قوه إلا بالله .. الناس بتموت كتير اليومين دول" .. فأنزعج وابدأ في البكاء من التأثر .. وفي الايام التي بعدها لمده شهر اجد العدد يزداد لدرجة أني تساءلت عن الكثره السكانيه في مصر؟؟ وان كيف قبض الله كل الأرواح دية .. ونحن لم ننقرض بعد؟؟!!!!..عندها أقول "شوف ربك كبير بيعدلها برضوا بحكمته" .. المهم .. مع إزدياد الوفيات زادت المواساة .. واصبح الشباب اكثر عطفا .. حيث انتقلوا من مرحلة المواساه إلى انهم يربتون على الحتت .. ولكن الرجال خشنين شويه .. كنت أقاوم رغبه إني اقول له "طبطب بالراحة ديه بنت .. كائن رقيق مش قد ايدك إلى عصرتها.. ديه بنت مش واحد صحبك!! .. فأنت 64 حصان وهيا يا دوب .. نص حصان!!"..ثم أعجب أن كل الشباب قد غفلوا عن نقطه مهمة من أن الكتف الي بيربتوا عليه المفروض فوق شوية !!.. بس من العطف بينسوا تقريبا .. ثم بدأت أتعجب!!!الجامعة كلها بقت مقطوعه من شجره .. والعجيب!! إن البنات بس إلي بيموت عندها أموات .. سبحان الله .. فأخذت (بقلة الحيا بتعتي) أتنصت على حالات المواساة .. فأسمع كلام مش فاهمه.. إذ تقول له وهي تقاوم رغبة عارمة في البكاء : "إحنا متفقناش على كده .. أنا قلت من الأول في علاقه يبقى مفيش كده.." فأقف عاجزا عن الفهم وامضي إلى الثنائي الذي بعده وهوا يقول : "بس بالراحة ..الناس بتبص علينا مكنتش بـو(تييييييييييت) وحده يعني!!!"(قامت الرقابه الفنيه للمدونه بحذف الكلمة لما يتعارض مع مشاعر القراء والانسات وبما ان الرقابه حذفتها فأنا طبعا معرفتهاش!!!) ثم أجد أن الرقابه على المدونه قد أكثرت من الـ(تييييييييت) على كل الكلام إلي كتبه لدرجة إني مش عارف أقول حاجة من الكلام إلي بيتقال حيث تطورت البو(تييييييييت) إلى (تييييييييت تييييييت تييييييت)!!!!! ثم في النهاية كنت أمشي مع صديق وأنا أحكي له عجائب ما رأيت!!.. وكيف تزداد أعداد الوفيات عند (الآنسات ).. فقلت له أن "تعال واسمع بنفسك".. فإذا بنا نتلصص على اثنين .. ولكن يبدو أن الشاب للمرة الاولى غير متعاطف البته هذه المره!!.. حتى أني تعجبت !! ..وإذا به يقول وقد وصل من الشياط أعلاه: "ايه؟!!! بتقولي إيه؟؟ إزاي ..انتي معملتيش إحتياطاتك ليه ..إحنا مقلناش كده ساعه كتب الورقة.." عندها قال لي صديقي والسخرية على وجهه: "وتسأل كيف لم ننقرض!!! .. اهو ربنا بيقبض الاوراح إلي بتقول عليها من هنا وبيجيب أطفال من هنا!!!".. عندها أقول له في خجل أن " مش فاهم" .. فيقول لي " علشان جليل الحيا" ..ثم تلمع عيناه ويقول لي :(مشهد كاميرا من الجنب عليه مع نظره بلاهه مني ثم يقول)"يا جليل الحيا ..مصر بخير"..
كشفت إحصائية صدرت عن وزارة التضامن الاجتماعي أن أكثر من 255 ألف طالب وطالبة في مصر متزوجون عرفياً، بنسبة تصل إلى 17 في المائة، من إجمالي طلبة الجامعات، البالغ عددهم 5.1 مليون طالب
قالت الإحصائية إن بمصر حوالي 14 ألف طفل من "مجهولي النسب"، هم نتاج الزواج العرفي رسالة إلى البنات:ألا تحلمن بزفاف تفخرن به بعريسكم ..فلماذا العرفي وهناك الباب؟
استيقظ الاستاذ "شحات" على بصيص من ضوء النهار-شفت بصيص ديه جامدة ازاي؟!! اوعى- وشعر ان اليوم سيكون جميلا ورائعا .. وأنه سيكون رائعا للعمل والابداع .. ولذلك لف الروب الحريري حول جسده .. ووقف قليلا يتابع زقزقه العصافير في البلكونه .. وقد سر عندما وجد أن مراته الحسناء قد وضعت له الباتيه والباتون ساليه والتوست المغطى بالزبد الطازج بجوار النسكافيه والجريده .. فقال وهو يتمتم دعاء الاستياقظ الذي تذكره الان فهو انسان(بيخاف ربنا) أن "الحمدلله الذي احيانا بعد موتنا وإليه النشور" .. ثم جلس في البلكونه المطله على حديقه فناءه الخلفي يأخد افطاره ويلقي نظره على سيارته ال BMW الجديدة وهو يقول "الحمدلله"- مش قلتلك الراجل ده بيخاف ربنا - ثم يدخل إلى الحمام ليستمتع بالجاكوزي وينضف جتته.. ويسر لمشاهده ورقه جميله معطره عليها "صباح الخير يا حياتي أنا في الصالون" وبعديها يلبس الروب اياه وينزل علشان يشوف مراته والاولاد .. ينزل منين ؟؟من الدور التاني طبعا هوا مش ساكن في فيلا؟؟!!.. -"شحتفة" .. "شحتفه" .. إنتي فين يا حياتي؟ .. ترد عليه وهيا لبسه الروب ولفه شعرها علشان هتعمله ضفاير .. -أنا هنا بفطر الأولاد .. يروح بكل حنيه ويبوسها من جبينها ويقلها "بونجور يا حياتشي" ..ويقعد على السفره علشان بفطر مع أولاده تاني (أما عالم طفسه صحيح!! إحنا لقيين ناكل؟؟!!) ويبدأ يتكلم .. -هاه ياشحاته عايزين نشتغل بقى يا حبيبي .. اليومين دول مفيش فلوس .. احنا الشهر الي فات جالنا من البزنس 20 ألف جنيه بس .. مش معقول غلو الأسعار ده كله .. الأزمه الإقتصادية العالميه وهبوط البورصة قللت إقبال الناس على البزنس بتعنا..أنا قناه الجزيره عملالي رعب بالاخبار الاقتصاديه الي فيها !!! -ما أنت عارف يا بابا أنا لسه عندي 6 سنين ويا دوب الناس بتديني حق باكو مناديل .. يرد أبوه : -مهو أصل أنا مش عارف انت طالع زير لمين .. لسه لغايه دلوقتي بتشحت في السيده زينب .. علشان تلملي الأكل بتاع الندور وشويه جبنه وحبه فكه؟؟!! وهمك كله على بطنك!! لحد ما بقيت قد العجل كده..وقال ايه رايح تشحت بحظاظه!!! .. الناس تقول علي ايه؟؟ معرفتش اربي شحات صح؟؟!! .. في شحات لابس حظاظه؟؟ انتي بشحت على الموضه .. يقوم الابن يرد: طب أعمل ايه يا بابا .. مش عارف .. بلبس اليونيفورم المقطع وبمضي حضور وانصراف علشان تتأكد إني بخرج وأرجع في المعاد .. يعتدل الأب في جلسته ويقول: -أنت تاخد ورق جميعه "مرسوله" الخيريه .. وتشحت على انك واحد منهم .. وتلبس كويس هتلم قد كده.. تقوم البنت الاخت "شحتوته" ترد: -لا انا هاخد الورق ده أنا عامله ضوفري ومش هبوظهم بنبطشيه السيده عيشه.. مليش دعوه .. ينفخ الاب ويقول: أووووووووووف.. طيب تروح النهارده في مأمورية البساتين .. في مقام هناك روح اشحت عنده .. -أوه لللا؟؟!!!!!!! ديه الام طبعا..تقول "ياي" وهيا قرفانه وتقول "ايه ده .. ايه الكلمه البلتشدي ديه؟؟!! تشحت .. اسمها تسترزق يا شحات" -طيب يختي ..(طبعا ديه من الأب بنظره قرف وكانه هيقول نسيتي القله الي كنتي فيها انتي وامك) يكمل القائد العظيم .."يلا يعيال روحوا شوفوا شغلكم على ما أروح انا كده لكذا جمعية خيريه وكام جامع نسجل اسامينا علشان ناخد مساعدات لسه عايزين نجيب شليه في بوتو مارينا..يلا ادعوا معايا .. اللهم وسع في رزقنا وقنا شر المال الحرام .. يلا يا واد انت وهيا" .. كله يقوم وتقوم الام "شحتفه": "طيب يا حبيشبي اسيبك أنا علشان عندي تشدريب في النادتشي النهرده .. وبعديها هعمل شوبينج ..شاو"
حاسس بضعف .. حاسس بوحده ..عايز أبكي .. حاسس إن عنينيا عايزه تدمع ومش قادر .. ومش عارف اخد قرار البكاء أم لا!! ..ولعمري هذا واحد من أصعب القرارات التي قد أتخدها في حياتي .. أأبكي أم لا!!.. عندما ابدأ أفكر أن ابكي يأخذني كبريائي كرجل .. ثم أقول ما علاقه الرجوله بالبكاء .. ابكي يا أحمد علشان تخفف عن نفسك .. ثم أسأل نفسي لماذا أبكي ؟؟ .. لماذا أشعر بالضعف ؟؟!! .. ما السبب ؟؟ لكن في النهايه ينتصر الكبرياء .. ويبقى جفني مبتلاً قليلا بعدما استطاع بعض الدمع من الفرار .. حتى يأتي دور عقلي ليقنعني أني اكثرت من النظر الي الشاشه لا أكثر..
بعض العواطف ليس لها تفسير .. وكنت أتمنى أن أجد لها تفسيرا ..وربما من الأفضل أن لا أجد التفسير ..هل أهرب من شيء ما .. أم أتمنى شيئاً ما؟؟ أحياناً تجلس وحيداً وتشعر بالحزن والوحده .. ولا تعرف السبب ..
كنت دائما أقول أن الشخص الذي لا يتضايق ويستطيع أن يعالج أمور حياته مهما صعبت دونما أن يتأثرا معنويا ويستطيع أن يكمل وهوا يضحك بعد لحظات قليله من الحزن راميا كل الحزن وراء ظهره ليضحك من جديد لهو في أزمة كبيرة!!.. حيث أنه سينفجر في وقت ما مخلفا ورائه الكثير والكثير من الغضب والتدمير .. بدأت أشعر أنني عندما قلت ذلك كنت أعني نفسي بدون وعي .. أتمنى أن أكون مخطئاً
بجد من كتر ما انا مشغول انعزلت عن التدوين فتره كبير قاربت على الشهرين ونص .. وفعلا بجد انا أسف .. الناس الي دخلت تسأل عليا وبعتتلي ومعايا على الميل على طول .. ورغم اني مش فاضي بس انا فعلا اشتقت للمكان ده والناس إلي فيه.. بجد اعذوروني.. واعذروني الفترة الي جاية أنا مضغوط أوي وحتى مش عارف أتابع المدونات بتاعتكم .. بجد وحشني المكان ده جدا ..
الكاتب الرائع د.أحمد خالد توفيق احد الكتاب الذين تابعتهم عندما بدأوا من الصفر.. كنت صغير جدا ساعتها .. ابتدائي أو إعدادي لا أذكر ..و لكني كنت أتذكر أني كنت أقرأ بشغف ما يكتبه في ما تنشره المؤسسه العربية الحديثه للنشر في سلسلة ما وراء الطبيعة وغيرها.. وكان أفضل ما يعجبني فيه أنه قادر على التعبير عن طريقه معيشه كل منا بطريقه سهله لم يتطرق لها احد من قبل ..واستخدامه للفلاش باك بطريقة مثيرة جدا .. وقد جلست في فتره العيد .. ووقعت في يدي رواية "يـوتـوبـيـا".. هذه الرواية هيا تصور المؤلف لمصر خلال عشر او عشرين سنة قادمة .. وعندما تقرأ تخرج في حالة نفسيه محطمة جدا .. وخيبة أمل فظيعة ..ووجع قلب لأنه من النهاية قد دمر كل شيء جميل عن الطبقة المتوسطه تماما التي هيا أساس المجتمع الذي ننتمي إليه.. بما في ذلك الأخلاق التي تجاوزت حدود الإنحطاط الأمريكي في أسوء منحنياته .. حيث تشعر بتقزز طوال فنرة الرواية .. لأنك شتشعر أنك ستصبح حيوانا لا أكثر ..ودمر الكاتب كل شيء ابتداء من المنزل إلى شبكة الصرف الصحي التي أصبحت من الماضي في الرواية .. لأكون واقعيا .. هذه الرواية تماثل أحد تصوراتي وتفكيري عن صورة مصر في المستقبل .. فأنا تصورت أن مصر خلال الفترة القادمة شيء من الاثنين .. يا إما ستعلوا بطريقه تزيد عن ال 60 في المئه عن الوضع الحالي .. والتصور الآخر كما يقوله د.خالد في الرواية أسود كئيب دمر فيه المجتمع وأصبح ينفسم إلى شحاتين وملوك بلا طبقة متوسطة ..وذلك لأني أرى أن الشعب تفكيره إلى حد ما جزء منه قد تطور بشكل لايصور .. والجزء الأخر قد بدأ يدمر نفسه ويدمر أخلاقه وحياته ويقتل أمله .. والفوز سيكون لأحد الطرفين في النهاية.. أنا لا أعرف بصراحة اي الكفتين ستنزع الأخرى لكن ما أعلمة .. الجانب المظلم له نصيب محترم .. لكن نصيحتي لا تقرأ هذه الرواية .. أعلم أن اول ما ستفعله عندما تنتهي من هذه العبارده هيا البحث في نهم عنها ..وربنا يخلي النت يا عتريس .. فهذا طبيعي .. وكما يقولون "قتل الفضول القط".. ستقل الرواية في نفسك الكثير من الأمل إن كنت ضعيف القلب (أنا عارف مفيش مصري هيقول أنا قلبي ضعيف .. كله هيقول إحنا جدعان أوي أوي أوي يعني ..ماشي يا عم)فاتركها الأن .. وقاوم الرغبه .. فهذا ليس وقتها المناسب .. فأنا أرى أن أخر ما نحتاج إليه هو التشاؤم ..مش نقصة العمليه بصراحة.. لطالما كنت احب نظره نصف الكوب المليان مع معرفتي تماما أن نصف الكوب فارغ .. ونحن هذا الوقت كشباب نحتاج إلى الامل لا إلا الصوره السوداء التي قد تحطم الهمم ..مش بضحك على نفسي .. ولكن لان بدايه الاصلاح هيا تطوير النقطه البيضاء في المحيط الاسود.. ما شاء الله الإعلام سادد نفسنا عن كل حاجة وعامل أحلى واجب.. والبلد حالتها صعبه .. ولكن أنا مؤمن إنه لو كل واحد إهتم بنفسه وعمل إلي عليه وحط في باله ان ده لربنا ولبلده .. مستوى مصر هيتحسن .. ينتقدني الكثيرين بأنني ذو نظره خياليه وجاي من المريخ..ولكن في الواقع أنا مش جايب الكلام ده من ورق الطعمية .. الكلام في القرآن الكريم واضح ..( و لو أن أهل القرى آمنوا واتقوا لفتحنا عليهم بركات من السماء والأرض) (سورة الأعراف، الآية 96) ..إبدأ بنفسك وبلاش يا بابا تشتم البلد والعيشه والي عايشنها .. والخليفة عمر بن عبدالعزيز صلح العالمفي سنتين ونص .. الموضوع مش مستحيل .. إبدأ بنفسك وجدد حياتك زي ما بيقول العلامة الغزالي في كتابه "جدد حياتك ".. حسن إلي تقدر عليه .. وإلي متعرفش تحسنه إعرفه علشان تتجنبه .. رواية "يـوتـوبـيـا".. رواية رائعه أظن انها في غير وقتها ..ومش للبنات من الآخر أنا قلت أهو وفهيا حجات الي ليهم في "مهند" مينفعش يقروها..وأرى ان لسه وقتها لم يحن وبعد وتم الإستعجال في كتابتها
السلام عليكم اولا بجد اشكر كل الي سألوا عليا في غيابي .. بجد أشكركم جدا .. فاتيما(شكر خاص) .. الباحثة عن النور .. د.لماضه .. نوران الشاملي .. Bongo .. أحمد كمال ..
وإلي علقوا في البوست إلي فات ..المفقوعه مرارتها ..مجرد خواطر.. سمر الشافعي ..رحاب مصطفى ..آبي ..أهو ده عيبه ..موناليزا ..وينكي .. طهقانه ..mercy devil .. والمجهول الوحيد .. وكذلك اشكر كل أصدقائي إلي كانوا معايا في فترة غيابي الي فاتت إلي ربنا أكرمني فيها
عارف إسلوبي جاف .. عارف إنه واضح إني بتكلم من غير نفس .. بس أنا دلوقتي بقول كلمة وحده "اللهم لا تسلط علينا بذنوبنا من لا يخافك ولا يرحمنا,, اللهم لا تجازنا بما نحن أهله .. بل جازنا بما انت أهله ,,"
أنا بقالي كتير قرفان من التدوين .. مش التدوين بس .. من الحياه كلها .. بحاول بعد ما كنت مقتنع ان مصر مهما حصل فيها لسه خير ولازم نتعامل فيها بإيجابية .. وإني مش هسيب مصر وأرجع قطر لأن مهما ظروف مصر كانت وحشه .. مهما كانت العيشه غاليه مهما كانت صعبه .. فأنا لازم أكون إيجابي علشان بلدي .. إقناعي التام إن لو كل واحد تصرف بإيجابيه وبطل يشتم العيشه وإلي عيشنها ومصر والرئيس والشعب والحكومه ونفسه هتبقى مصر هيا الأحسن في العالم وأن الإيجابيه هيا التي تفيد .. بدأ إقتناعي ده يتشال .. إقتناعي أن انا ليا دور في مصر وفي بناءها .. بدأت أشك فيه ..
بصراحة خبر البراءه لممدوح اسماعيل صدمني صدمه والله بكيت فيها .. ولما شفت صور الضحايا بيقعوا على الارض دخلت في هستريا حسبي الله ونعم الوكيل .. ولما شفت المحامي بيتكلم عن المتهمين في العاشره مساء أن العدل أخد مجراه غصب عني شتمت - للأسف - ..
سلك القضاء كان الامل الاخير الي بنتسند عليه في أي حاجة .. فقدنا الثقه في كل شيء من كلام المسؤولين والمحافظين والوزراء ورجال الدوله .. ولكن دائما بننتظر من سلك القضاء الخلاص .. والحمدلله بقينا دلوقتي مش بنستند على حاجة .. أنا عمري ما قلت "ليه يا رب" .. كنت بقول الحمدلله .. لكن المرادي كنت هقولها لولا إني مسكت لساني في آخر لحظه .. يا رب .. يا حليم .. يا عظيم .. أنا عارف إننا بذنوبنا نستاهل الحرق .. يارب أنا عارف إننا منستاهلش بكل الي بنعمله من الذنوب والمعاصي والفضائيات والذنوب والربا والفجور والكبائر إننا نعيش .. لكن إنت كريم .. إحنا ما نستاهلش لكن إنت كريم .. خلاص مبقاش في حد في الارض ممكن نرحله وأهو بقى الوحيد الي ممكن نشتكيله هوا إنت يا رب ..
الحمدلله أنا مازلت مؤمن إن البلد ديه ممكن حالها يتعدل .. ومنيش خارج منها .. وهفضل فيها وححاول أعمل الي أقدر عليه علشان مازلت مؤمن إن اعمل الي عليك بما يرضي الله .. ربنا هيفرجها .. ( و لو أن أهل القرى آمنوا واتقوا لفتحنا عليهم بركات من السماء والأرض) (سورة الأعراف، الآية 96)
وبينما انا بقلب في "المصري اليوم" وقريت المقال ده هل تقبلين "مخلوعاً" زوجا لكِ ؟؟.. كان مقال صغير تحفة .. وقعدت أفكر فيه .. خاصة لما عرفت أن وحده رفعت قضيه خلع على جوزها .. قام قال ديه زادت لما اتجوزت 5 كيلو عايزهم فلوس .. ده راجل نتن صحيح .. ايه الناس ديه ..افهم من كده لو واحد اتجوز وحده صغير 18 سنه وطولت 2 سنتي ..يقول متر الارض بألف جنيه ..عايز حقي في الـ 2 سنتي دول ..
الموضوع فعلا كوميدي بحت .. مش موضوع الخلع .. موضوع نظرة البنات والسيدات للشخص المخلوع على إنه ابن الغساله ..مع احترامي للغساله والبوتجاز طبعا .. البنات بيبصوا للراجل المخلوع إنه راجل مخروم .. اتختم بالشمع الاحمر ..
شفت المقاله .. قلت لا.. ديه عايزه مزاج .. كبايه كركاديه سخنه .. وهات الجريدة وفي البلكونه .. لقيتلك البنت الاولانيه بتقلك : "أنا إيه الي يغصبني على كده !! راجل مخلوع يعني مراته زهقت منه وقرفت من العيشه معاه" وانا من موقعي هذا من فوق المخده بقول يا بنتي في نسبه 3 بنات امام كل راجل .. مش وقت انعره صلي على النبي .. الصنف مضروب في السوق اليومين دول .. سيبك من ايه الي يغصبني ديه ..
بنوته تانيه بتقول: "أنا أهم حاجة أكون الزوجه الاولى والاخيره في حياه الشخص الي هرتبط بيه والصوره ديه كبرت معايا من صغري" بصراحة اسلوبها راقي وعجبني الراي ده بصراحة .. مع ان الصنف مضروب في السوق بس ده راي كويس اوي ..
الاظرف على الاطلاق البنت الي قالت: "انا عايزاه جديد لانج" "لانج!!!!" .. نعم يختي .. محسساني إنك شغاله في مصنع صابون .. انتي هتتجوزي جاكت .. افهم من كده لو وحده فافي هتقول "عايزه جديد إريال" .. ولو وحد متدينه بتاعه مقاطعة للمنتجات اليهوديه والامريكيه "عايزاه جديد برسيل" ..
وحده بقى غالبا حماه عندها 55 سنه صدق او لا تصدق .. ليها راي مختلف!!!! .. بس تحليلي الشخصي ان مرات ابنها مظبطاها او هيا مظبطاها في الحتت ديه بين الزوجه والحماه محدش بيكون غلطان والضحيه الزوج .. قالت إيه بقى : "ممكن يكون كويس ومراته مفتريه .." وموقفتش على كده ..قالت جمله كويسه "عن نفسي ممكن اجوز بنتي لمخلوع ما دام كويس"
بصراحة انا موافق .. مش دايما بيكون الرجل وحش .. في احيان كتيره ايوه .. لكن لا يجب تعميم القاعده ديه .. يعني الشخص الي عايز ياخد الخمس كيلو فلوس هياخدهم ازاي .. كيلو اللحمه في السوق بـ 35 جنيه "واعذروني اني مش متابع اسعار اللحمة" هيبقى حسابه 35 * 5 ؟؟؟؟؟ ..طب العظم والكبده داخلين في الحسبه .. ثم ان بقى ممكن ميكنش لحم صافي وتكون لحمة بيضة .. ده راجل ايه ده ..
بس انا ارى ان المخلوع ممكن يبقى كويس وممكن يبقى مش كويس .. مهو صدام حسين مخلوع .. ايه المشكله ؟؟ عادي خالص ..
وما زلت بسأل .. يا بنات.. هل تقبلين رجل أحلامك الذي حلمتي به طول عمرك بحيث يكون شريك عمرك وظهرك ومصدر الحب أن يكون رجلا "مخلوعا" ؟ مفيش أحسن من البنات يجاوبوا الموضوع ده .. والي هيتكلم يا ريت يبطل مثاليه .. ويتكلم بصراحة .. ملحوظه تخرم عين الي ما يصلي على النبي :أنا مش متجوز ولا مخلوع ولا خاطب ولا مرتبط ولا ماشي بطريقة غير مرخصه .. من الاخر .. مازلت جليل الحيا ..
جله الحيا في هذا الزمان اختفت .. واصبحت تمارس من قله قليله فاسده جليله الحيا زيي .. وأسوأ من انك تعمل حاجة جليلة الحيا .. ان الناس تشاور عليك وتجولك "يا جليل الحيا!!"..
لاني فعلا بعمل اكتر حاجة جليله الحيا لما اكون عايز ارتاح .. ولازم اعترف بكده واواجه نفسي قدمكم بده .. لاني مش هحل المشكله الا لما اعترف بده .. ولازم اصارحكم لأني ياما بحكي ليكم ..
بعادتي اني لما اتضايق .. فعندي مكان بروحه برتاح فيه .. ولجله الحيا عندي .. أجد الراحه على كوبري قصر النيل .. وديه جله حيا .. حيث لابد ان يلتزم المرء في كل مكان بقواعد وعادات المكان والمجتمع ولكني اضرب بالعادات والتقاليد والادب عرض الحائط .. بدخل كوبري قصر النيل وبلاقي نفسي شاذ عن كل الناس .. كل واحد واخد الحته الطريه بتاعته وواقفين يتودودوا ..واتنين بيقهقهوا .. والبعض مريح ايده على بعضه .. وكله .. كله ماسك ورده.. بدخل الكوبري ..يأتيني إحساس اني البطه السوداء ..وهذا حق .. انا لا معايا حته طريه ..اصل ربنا لسه مكتبليش خطوبه ولا جواز ولا حتى جو كأضعف الحالات .. مهو واحد زيي ملوش في نظام الجو والحتت الطريه الغير مرخصه ديه .. ولا حتى بتكسف على دمي ومعايا ورده .. ولا محترم نفسي وعمال كأضعف الايمان امثل اني بكلم الحته الطريه بصوت عالي في النوبايل.. وشوفوا جله الحيا .. شوفوا وصلت لدرجة ايه ؟؟!!!!!.. داخل في ايدي كتاب!!!!! .. بدخل بجله الحيا بتعتي .. وببجاجه لا توصف .. ادخل الكوبري .. واحس اني فعلا البطه السوده .. بدور على حد زيي .. جليل الحيا من غير حته طريه مرخصه او غير مرخصه ومن غير ورده .. مفيش حد غيري ..طبعا مش هدور على حد بكتاب لأن محدش فجر الفجور ده زيي ..ده انا خلاص من جله الحيا بحس اني هتسخط سرقوله الي انا مش عارف ايه هيا بالظبط!! .. وعلى طراطيف صوابعي بدخل الكوبري بحاول اني اتلافى نظرات الناس التي تنعتني بجله الحيا في صمت كفيل بتحويلي الى عود كبريت .. واسمع وانا امر بعض العبارات التي تنم عن التذمر من وجود ناس بجحه وعينها تندب فيها رصاصة من امثالي ..فاسمع تارة: "ايه ده .. اي قمه البجاحة وقله الحيا ديه .. وعندك عين تمشي لوحدك" وتاره يقول رجل كبير في سن جدي الذي يمشي مع حته خشبه مرخصه غالبا في سن الضياع والهلاك: "ايه الجيل المهبب ده .. وماسكين كتب .. ده انتوا هتروحوا من ربنا فين؟؟!!" وترد حتته الطريه .. طرية ايه بقى ..الناشفه متعاطفه : "مصيره يكبر ويعقل ويلاقي حتته الطريه .. مهو احنا برضوا كنا زيه كده .." يرد مستنكرا : "مش بكتاب يا تفيده مش بكتاب" بينما يعدي الحنطور على الكوبري وهوا يسمع "واركب الحنطور .. درجن درجن .. واتحنطر .." ويلقي نظره سريعه بمعنى "بطل جله الحيا ديه وانجز خلينا نستنفع من وراك وتركب انت والحته معايا"..
بينما اكون واقفا في ركن اسود اتفادي فيه نظرات الناس .. واتلافى احساسي اني واقف عاري في وسط الجسر .. يعدي عليا شباب من معارضه مصر الذين يحاربون الفساد ويحاربون الحكومه ويحاربون بدورهم -طبعا - جليلي الحيا امثالي هيا جت عليا يعني ويسيبوني .. وينظرون نظره شنيعه الي كلها غضب .. ليتوقف الريق في حلقي.. ويفعلون المحظور ..يبصقون علي !!! .. ولكن الهواء يخلي البصقه تنزل في النيل .. اتعصب .. ويغلي الدم في عروقي .. ولكن لما اضرب بعيني كده اشوفهم عشره بقول "المسلم يحسن الظن في اخيه .. هوا مش قصده .. هوا كان قاصدها في الميه .. وخلي ليلتك تعدي .."
ولا تخفى عليا نظرات الشفقه من بعض الملتزمين المحترمين الذين يقولون .. "مسكين ..حالته تقطع القلب .. ربنا يهديه .. ويلاقي حته " حيث يهزون رؤوسهم في تعاطف..وهم يقاومون رغبه جامحة في اخراج ربع جنيه مخروم ويدهوني علشان اقعد في حته ناشفه تانيه.. ولكن لحسن الحظ يتراجعون عن ذلك .. ويريحوا على بعض تاني .. عندها افهم انه خلاص .. حنفيه التعاطف اتقفلت يا مدهول وشفلك حته ناشفه تانيه تقف فيها .. وينتهي عندي الامل الأخير بهذا الصد من ان يراعيني ويعذرني احدهم .. عندها .. أجد نفسي لا اطيق كلام الناس .. وألاقيني اصرخ في هستريا .. ده كتير .. كتير .. واجري .. مزيد من نظرات الناس .. واتعثر .. ويقع الكتاب .. واعدل النظاره .. واترك الكتاب .. واصل الى اول الجسر واهبط على قدمي .. عندها افهم انني مش لوحدي في المجتمع وأن المجتمع لابد ان يقاوم امثالي .. جليلي الحيا !!.. واصرخ وانا جالس على ركبتي (المشهد بكاميرا من فوق) واهمس في نفسي "يا جليل الحيا .. مصر بخير!!"
يا أمي ما شكل السماء .. وما الضياء وما القمر .. بجمالها تتحدثون .. ولاأرى منها أثر ..
هل هذه الدنيا ظلامٌ هم في ظلامٍ مستمر.. يا أمي مـُدي لي يديك عسى يزايلني الضجر .. أمشي أخاف تعثراً .. وسط النهار أو السحر .. لا أهتدي في السير .. إن طال الطريق وإن قصــُــر ..
أمشي أُحاذر أن يــًُصادفني إذا أخطو خطر .. والأرض عندي يستوي منها البسائط والــحــُــفر ..
عــُــكازتي هي ناظري .. هل في جمادٍ من نظر .. يجري الصغار .. ويلعبون ويرتعون ولا ضرر ..
وأنا ضريرٌ قاعدٌ في عـُـقر داري مستقر .. الله يلطف بي ويصرِفُ ما أقاسي من كدر ..
اللهم آمين
أعجبتني جدا .. بكلماتها وبصوت الرائع الشيخ مشاري راشد بارك الله فيه .. فصوته رائع.. وقد استطاع انا يظهر الجديد في عالم الاناشيد التي تخلو من المعازف واجمل بصراحة في نظري من الاغاني ..
ملحوظة .. لماذا يعترض البعض على الاناشيد مثل أناشيد مشاري التي تخلو من المحرمات والمعازف بحجه انا تقليد للفيديو كليب ؟ يقول البعض ان الفيديو كليب تقليد للغرب والفجور .. واني لأعجب .. حيث تقال قصائد بصوت لا ميوعه فيه .. ولا ترقص وشكل اسلامي خالص .. ورجوله تنم عن تدين قائلها .. ولا شيء فيها يخالف أمر الله .. بالاضافه انها تحارب اغاني الفشك بشك .. وكما انها اصبحت هذه الاناشيد طريقه جديده ومؤثره في مجال الاغاني الغير حرام وغيرت تفكير واذواق الكثيرين .. فلو أننا واجهنا الرقص والعري الذي اصبح في مشروع رقاصه لكل مواطن أما كان أفضل.. فكما نسمع (بح) و (النقط الي فوق الرووف) الا يجدر بنا مواجهه هذا واستخدام الشيء الحديث الذي لايتعارض مع ديننا؟؟ .. افيدوني افادكم الله
بغض النظر عن اني متنشرش ليا حاجة في الكتاب بس كنت فرحان موت .. اليوم كان حفل العدد الاول من مدونات مصريه للجيب .. كنت فرحان جدا .. كانت المكتبه متعمره مدونين .. وسبحان الله .. تشوف الشخص تقول عليه انت فلان .. متعرفش ازاي .. الواحد من قرايته للمدونه بيستطيع يعرفك بسهوله .. اكبر فرحة ليا اني التقيت بشويه مدونين محترمين اوي فرحت بيهم جدا .. وتخش عليهم كده انت مدونه ايه يا راجل .. يقلك أنا فلان .. وانا فلان .. وتتكلم معاه كانكم تعرفوا بعض من سنين .. دخلت العماره بتاعه المكتبه ولقيت قدام المكتبه على السلم شويه ناس ..فببص لقيت واحد واقف من شكله قمت قايله : "سوووو ؟؟؟!!" مستغربا يرد .."ايوه انا سوووو .." "يعني انت سوووو؟؟؟؟ .." لقيته قام رادد "هو انا اتشردت في البلد ولا إيه " .. كنت عايز اقله مهو مستحيل هيكون واحد لابس الطاقيه بتاعة بيكاسو ديه والتشرت الاورانج ده وبكرش وبنظاره غيرك يا سوووو.. بس خلتها في سري .. "احمد مبارك" .. قام صرخ بـ "يا راجل "وضاحك .. وسلمنا وبتاع ..
بس بجد الي فرق معايا وشفته بابا أبو خالد .. الراجل ده لما قالي انه ابو حالد ياااااه ..مش ممكن ...انا بحبه اوي اصلا من غير ما اشوفه .. وسبحان الله الراجل ما شاء الله عليه شكله سمح اوي .. بجد انا اول ما شفته ارتحت ليه واقعدت احضنه وابوس فيه ..وهوا والله راجل طيب اوي .. مش ممكن .. ويتكلم ويضحك .. وبسيط خالص .. انا والله حبيته اوي وكل ما اشوفه ابوسه .. ووشه سمح خالص تحبه .. ربنا يخليه لينا .. وياعيني عليه جاي وهيسافر تاني ..
سبتهم من على السلم ودخلت لحد ما جيت ادخل من على البوابه .. وعلى راي سعيد صالح .. على مستوى نظري وانا مش قصير خالص لقيت ركب بني ادم .. بطلع بنظري بطلع لقيت الصباغ .. كنت عايز اقله انزل شويه .. كانت اول مره اشوفه بصراحة بس كان محترم اوي بصراحة .. وكان عارف مدونتي وانا عارفه وسلمت .. وكملت المسيره لجوا ..
اول حد اشوفه .. ببص لقيتلك واحد بيقول يا دكتوره مروة .. وببص لقيت الدكتوره ...ممممم .. الدكتوره ممكن تقول عني الكلام الي قلته في الصباغ.. فعرفت انهالماضه .. وفعلا طلعت هيا وطبعا الدكتوره عشره بوستات .. وفعلا تشرفت جدا وفرحت اني شفتها .. خاصه انها كتبتلي على الكتاب اهداء ببص لقيته روشته 3 مرات قبل الاكل .. قلت ما علينا ..
شفت فاتيما والي لما شافتني لقتها راحت قايله " بتاع الجبنه".. مع اني مكنتش حاطط جبنه خالص !! .. وكل ما تشوفني تغطي وشها ..
اتشرفت اني شفت احمد القاضي صاحب مدونه يا مركبي .. والعديد من المدونين شهاب الازهر .. وخالد همس الاحباب .. واحمد سكر الي كل مدونه حاطه ليا لينك عندها تلاقي اسمي تحت احمد سكر حتى هوا ضحك اوي على المعلومه ديه .. وفهد صاحب مدونه بصمة وجدان .. الواد ده شبه شريف منير بطريقه فظيعه انا كنت ماسك نفسي اني اقول له عامل ايه مع خطاب النجاري ؟؟ وكان غيرهم كتير .. كنت بدور على خيخه أم شريف علشان اغلس عليها بس هعمل ايه موصلتلهاش .. حظها حلو فلتت مني .. واخر وحده شفتها على السلم وانا بودع الراجل العسل الطيب اوي بابا ابو خالد لقيتلك أخر وحده سلمت عليها كانت آبي .. وكان ليا الشرف طبعا حتى كتبتلي الإهداء وحطت الكتاب في وشي كنت خايف تقلي FBI
بس وللحق يقال انا رغم ان الحفل كان مش متنظم لكن كنت فرحان جدا ..فعلا كان منظر المدونين يفرح خاصه ان صوتنا اصبح في كتاب جميل جدا .. مش مهم اني اكتب فيه او لأ اهم حاجة ان صوتنا اصبح بيوصل .. والاحلى ان فعلا كانت صحبه جميله وناس محترمه اوي .. خاصه اني دخلت في نقاشات كتير مع عدد من المدونيين حول اننا متقسمين زي مجموعات كل ميه مدون مع بعض عايزين نوسع الدائره ديه اكتر .. وكانت العقليات متفتحة جدا .. ورغم ان كان في ناس مدسوسه وكانت جايه تزعق وتبوظ الحفل .. بس كنا على وشك ناخذ من كل نفر قبيله ونوريهم اللئيمه ..
بجد انا سعدت جدا بلقائكم .. وان شاء الله دائره المدونين واحترامهم يزيد في المجتمع .. وبجد اكتر حاجة مفرحاني المدونين الن شفتكم وكسبتكم .. احمد مبارك
تخيلوا معايا كده .. تكون ماشي مخنوق .. مش لاقي فلوس .. والأسعار غاليه .. وهم الدنيا صعب .. ونفسك تتجوز او نفسك تتخطبي .. وتكون تعبان من الحياه .. وفجأه يطلع عليك حراميه علشان يثبتوك ..يثبتوك على ايه انت مش معاك حاجة أصلا " طلع الي في جيبك ياد" .. تقلهم "أنا لو معايا حاجة مكنتش جيت البلد ديه"..يمسكوك ينفضوك .. وفي الاخر يطلع انك مش معاك حاجة فعلا .. يسيبوك !!.. انت ضيعت وقتهم الثمين .. فيمسكوك يرقعوك علقه .. مخدهاش حمار في مطلع .. تخيل نفسك في الموقف ده .. عمالين يضربوا فيك نص ساعه .. وبعدين يجي من بعيد .. خيال لشخص ..بني أدم .. في الحته المقطوعه ديه !!.. تنشكح أساريرك .. في حد هينقذك .. في أمل إنه يخلصك ..ربنا بعتلك بني آدم .. وانت عمال تتضرب .. والامل في نفسك انه هيفكك منهم .. وتبدأ تعافر انك تصرخ .. وبتبذل كل قدرتك انك تخرج صوتك الي مش قادر تخرجة ..مجهود صعب اوي في موقفك ده.. تصرخ وتخرج اخيرا .. "إلحقني يااااااااا أستاااااااااااااااااااااذ" .. تأتي عنايه السماء ..وياخد باله ويجي عليك .. وبكل هدوء وهو ماشي .. نظره الثقه في عينه .. تفرح لأن الي بيثق في نفسه كده أكيد حاجة مهمه او مسؤول او شرطي صالح .. يقرب منك .. يقف يبص عليك وانت بتتضرب وقفاك بيسخن .. ويرفع صباعه ويشاور عليك وانت بتتطحن من الحراميه ويقول :"خلي بالك ياقه القميص مش معدوله" هتعمل إيه ؟؟!! انا بصراحة هقول للحرامي :"لحظه يا بيه خد البنطلون ليك مش مشكله هروح من غيره وسيبني اكلم الشخص ده دقيقه ووالله هرجعلك تاني تتضربني .. بس سبني اكلمه بس" .. وهروح للشخص مسكه هرقعه حته علقه .. دا انا هشحور أهله .. دا انا هفرتكه في كل مقلب زباله حته .. هلففه كعب داير على مزابل القاهره هخلي الجرايد بدال ما تتكلم على لحمة الحمير تتكلم عليه .. هو إيه الي بيحصل ده؟؟ .. نفس الموقف الي اتخيلناه ده حصل بس بطريقه مختلفه.. أنا بحب البرامج الحواريه جدا .. وبحب برنامج القاهرة اليوم رغم اعتراضي على حجات كتير فيه ..وفي حلقه كان عمرو أديب بيتكلم عن المكرونه .. تخيلوا .. كيس المكرونه بيجي من الإمارات بعد الصناعه والتغليف والشحن والجمرك وفلوس التاجر وفلوس البائع وممكن يكون في موزعين كمان أرخص من المصري ؟؟ بحوالي جنيه إلا ربع .. طب المصري غالي علينا ليه؟؟ ..كفايه ان معندكش مصاريف شحن ؟؟ انا كنت قاعد بتنطط قدام الكومبيوتر .. يعني جوده وسعر وكميه احسن مننا ..وأرخص!!.. وفعلا في حلقه تاني يوم اتصل واحد من شركه ريجينا للمكرونه وضح شويه حجات عجيبه كده .. وصراحة عمرو أديب قام معاه بأحلى واجب .. قوم ايه .. بعد حوالي 10 دقايق نقاش معاه اشتد فيها الحوار وتكذيب عمرو للكلام الي عايز يموه الدنيا ده ..عمرو لما زهق "قاله دا انا هتحداك.. وهجيب ناس يطبخوا المكرونه بتاعتكو عندي في الاستديو بكره .." شوف لدرجة إيه .. النقاش سخن اوي ..لأن فعلا مينفعش .. الواحد بعد كده ينزل السوق يشوف ارخص حاجة ويجبها ..لا تقلي صنع في السبتيه ولا صنع باب اللوق ..الاسعار غاليه والدنيا صعبه خلقه .. ومادام تجار المصريين مش متقين ربنا فينا نجيب المستورد .. وفي عز الكلام لقيتلك مفيد فوزي اتحمأ .. وقام قايل : "أستاذ كريم" كريم ده رئيس مش عارف إيه في شركه المكرونه.. "ايوا يا فندم" عدل نفسه أستاذ مفيد ..وظبطت النظاره .. ثم قال سؤال جوهري جدا ..مهو فعلا مش معقوله غلو الاسعار ده ويسكت ثم إن أستاذ مفيد أستاذ عظيم جدا مشهود إنه حواري ممتاز .. قام بصوته المتزن والرصين وعلامات الجديه قال: " هل عندكم في الشركه .. مكرونه ريجيم ؟"
نعم يالدلعدي!!!؟؟ ريجيم !! .. انت بتهزر .. قول إنك بتهزر .. انا سمعت الكلمه وقمت يعني ..... مش عارف اقول إيه بصراحة .. الراجل بيقلك الحاجة بتيجي مستورده واحسن وارخص واحنا حالتنا صعبه الناس مش لاقيه تاكل وحضرتك بتسأل على الريجيم !! لا وواثق من نفسه .. يا عم روح اعمل ديتوكس ولا اشفط دهون وبلاش تعلنا يا أخي.. تقول ريجيم .. انا إتشليت وقعدت متنح .. وبصراحة بقالي كتير متغظتش كده .. كان هين عليا امسك الشاي أخبطه في الشاشه .. بجد ده إنسان عجيب .. طول عمري بستغربه .. مره كان في نفس البرنامج عمرو أديب بينتقد بشده وزير التموين بعد حادثه وفاه مواطن في طابور عيش .. ده كان غير هجوم الجرايد ساعتها .. لدرجة انه قال ان المفروض الوزير يتشال .. طلع عم مفيد يقلك .. بعد ما عدل النظاره برضو .. "انا فعلا بحزن علشان شكل الوزير قدام عيلته اصبح وحش بعد الهجوم عليه" بصراحة عمرو فرقع وقاله " والنبي سبني في حالي يا أستاذ مفيد .. انا هروح اعمل مركب ورق أحسن" .. لا تعليق .. مش مهم الشعب الي بيموت اهم حاجة إن مراته تقول على سي الوزير جوزها "أوه ماي جاد .. حبيبي إنت جنتل والهيرو بتاعي!!" يعني بالله عليكم .. هيا نقصه مع العيشه ديه والحمدلله على كل شيء شخص فيري سمارت زي ده ؟؟!! .. سيبوني في حالي بقى ..أوووووووف الحلقه الاولى التمهيديه لعمرو أديب .. الحلقه الثانيه عمرو مع مفيد فوزي وشركه المكرونه الجزء الاول .. الجزء الثاني
البني آدم اليومين دول حاجة عجيبة أوي .. is وهوا قاعد كده بيدق عليه ديليفري يخبط على بابه ويقولوة .. انتي لبسك تاج يا سيدي .. إشرب يا عم .. وإيه تلاقي في التاج لماضة الدنيا .. ومن هذا المنطلق - حلوه المنطلق ديه - قررت أجاوب على التاج إلي لبسته من قبل ضاكتوره المدونين لماضة .. وأنا قلت وماله .. تاج تاج .. إحنا هنخاف يعني .. إجنا رجاله أوي يعني وميهمناش حاجة .. بسم الله .. الله أكبر .. تعالوا نشوف التاج ده عامل ازاي .. خوفي لا يطلع طاقيه صوف في الآخر .. التاج مقسم بنظام وعنايه لأربع مواد دستوريه ديمقراطيه .. وأنا مطالب أجاوب المواد ديه .. وأنا ما صدقت أخلص من الامتحنات أصلا .. يا مسهل : أول حاجة إفضح نفسك بعشر حجات نعرفك بها.. طيب أولا : رخم ثانيا : غلس ثالثا : تبت - من التباته - وللمعلومات كل واحدة من دول صففات منفصله عندي بيحطوني في مواقف بايخااااه لما صحابي بيتلموا عاليا يضربوني بعد فاصل طويل وعده برامج من الغلاسه والرخامه .. وللأسف بيكون مصيري عبره للكل بيفكر يرخم في الآخر.. رابعا : مستبيع في الشغل ومديري بيكرهني .. والألذ إن تقريبا من غلاستي عليه مش بيكلمني وزمايلي بيقولوي ده بيتكلم عليك كتير من وراك متغاظ منك .. مش عارف ليه مع اني بتقي الله في شغلي وبعمله بضمير .. بس في ناس كده .. لما تشوف واحد في حاله حتى لو شايف شغله بتيجي عليه .. خامسا : على قدر ما أنا بحب قعدت الشباب صحابي ..على قد ما بحب الوحده بشكل ممكن يصفه البعض بالتناقض .. فأروع لحظات حياتي عندما أجلس أمام البحر في عز الشتاء في ركن مظلم وحدي ..أتأمل ما خلف البحار وفي يدي كتاب أو مذكره صغيرة أكتب فيها همي ولا أريد من العالم سوى أن أترك وشأني .. سادسا : في التهييس مليش حل ومتهيألي البوست الي قبل ده يثبت الموضوع سابعا : طيب أوي وحنين أوي .. بارد أوي .. وفيا نوع من العصبيه .. ثامنا : عايز أتجوز .. نفسي أتجوز بنت حلال تكون رقيقه .. عقلها كبير تفهمني ونعرف نتكلم مع بعض .. تكون معايا على طول وأشيلها في عينيا .. تاسعا : بكره الولاد طحن .. ونفسي لما أتجوز أجيب بنتين .. مش عايز ولاد خالص .. أنا لو جالي ولاد أشقيه زيي لأقطع عنهم المصروف .. عاشرا : مش بحب البنات إلي بتحط جبنه على وشها .. بحس إنهم بيبوظوا جمالهم دلوقتي مطلوب مني أتاج خمسه .. طب ليه الإحراج ده ..ماشي ..
زي لماضه ما دبستني .. أدبس أول خمسه يكتبوا كومينت عندي Re7ab MK زمايلي الكليه السابقون والاصدقاء الحاليون بعد التخرج إلي في الجنب عندي Bongo Gid -Do العسل جدو كل من تسول له نفسه إنه ياخدوة فالبشفا
وكأمر دستوري لازم مرجعهوش للضاكتورة .. طبعا ده ايه الطلب ده .. وأخير أتلامض شويه على لماضة واقلها يا أختي أنا عندي مغص علشان تيجي تعالجني وتشوف حل التاج .. أحمد مبارك
أنا في حاله تهييس فظيعه .. وتقريبا كده حاله التهييس هتطلع على البوست التهييسي إلي عنوانه هيخلي كل البنات تضربني لحد ما يبانلي صاحب .. يا ريت لو لو في ولاد يخدوا جنب بلاش يكملوا .. ولو كملت هتتعقد .. ولو بنت بلاش تقريه علشان بلاش انا أنضرب .. إيه ؟ .. مين إلي هيقرا البوست ؟ .. مش عارف انا مهيس وخلاص .. وبما إن حاله التهييس على ودنه .. فعمر ما هيجيلي جرأه أكتب الفكره إلي في دماغي ديه إلا دلوقتي .. بيقولوا التهييس مش بيحسسك بالضرب .. يلا نهيس .. دا انا حالتي صعبه خالص .. طيب .. البنت المفقعه هيا البنت إلي بتنزل الشارع حاطة جبنه على وشها .. والجبنه هيا أي حاجة من الحجات الكتير الي البنات بتحطها علشان تبان بوش كابسي بلاستك .. سواء كان بدره او كريم أساس او أي حاجة بتخليها باختصار زي ما تكون جايبه جبنه اسطنبولي وغلطت في مكان بقها وخبط في وشها وخلاها عامله زي المفقعه كده الي أنا مش عارف هيها ايه بالظبط .. وللأمانه العلميه فقد رجعنا إلي "القاموس المفقع في لسان البنات" وهوا معجم قيم جدا يحتوي على كل معاني البنات الخاصه المجهوله للولاد .. كتاب جميل انصحكم بإقتنائه .. تجدونه في مكتبه "جرجير" .. وإليكم المعاني التي تدور حول مصلح البت الجبنه : **كريم الأساس التعريف :كريم بوهيه كومبيوتر أشهر انواعة " فول أند لاظلي " .. طريقه الاستخدام :يدهن القليل منه -والواقع ان البنات بتستخدم انبوبه في كل مره -على الوجه وتنزل البت الشارع كلوه يفضحها فضيحه بجلاجل "ديه سوده حاطة كريم اساس وبهتانه وجلدها كرمش منه" .. وكل الناس بيقولوا كده - وخاصه الولاد - .. والوحيده الي مش عارفه كده هيا البنت وفاكره نفسها نانسي .. وانها بيضه ومحدش واخد باله .. سبب الاستخدام : في حالات الرغبه أن تكون البنت بيضاء وعقدها النفسيه من غمقان لونها (سوده يعني ).. وكذلك في حالات العوانس الاتي يئسن - حلوه يئسن ديه - من الزواج ويرغبن في جذب العرسان ..
**بودرة التجميل : التعريف :نوع من انواع Make Up .. باختصار بدره بألوان كتير.. زي الهيروين بالظبط من غير فزلكه (مكتوب كده في المعجم مليش دعوة ).. طريقه الاستخدام :تستخدم فرشة صغيرة ويوضع على الوجه .. وتحت العيون والخدود .. سبب الاستخدام : عدم الرغبه في اظهار لون البشره .. وربما تغطيه بعض الحوادث السابقه .. بس برضو .. مفضوح وكل الناس بتاخد بالها .. خاصه الولاد وان كانوا بيعملوا نفسهم قال ايه مش واخدين بالهم علشان مش فاقع زي كريم الاساس .. بس مفقوسه الشباب واخدين بالهم ..(أه يا شباب يا خلابيص)
وبعد أن تم التعريف .. قامت مدونه ماكي -إلي هوا أنا يعني - بأخد المايك والنزول إلى الشارع لمعرفه اراء الحماهير حول البنات الي حاطة جبنه (والعينه الي تم اختيارها كلها حاطة جبنه): بنت رقم واحد" زي العسل ده زياده جمال وتأنق .. وبعدين محدش بياخد باله" بنت رقم اتنين" مين الي قال اننا مش حلووين احنا زي العسل بس بنحط علشان نزيد جمالنا" بنت رقم تلاته" والله .. ديه حريه شخصيه .. هيا الموضه كده!! .."
ولما أخذنا رأي الشباب .. وسألناهم "ايه رأيك في البنت المفقعه وهوا انتا بتاخد بالك ؟": ولد رقم واحد" البت بتعتي بتحط على طول ومش برضى اقول ليها علشان مجرحهاش ومتسبنيش " ولد رقم اتنين " أنا مش عارف بيحطوا ليه .. والله بيبقى شكلهم زي العسل من غيره .. بيبقى لونهم بهتان .. وهيا بتكون فاكره ان محدش شايف .. بس هيا اكيد حاسه بعقده من شكلها او لونها او بشرتها .. هيا مش هتحط إلا لعله .. لكن لو واثقه مش هتحط " ولد رقم تلاته" البت بيبقى شكلها صاروووووووووووووخ بصراحة " ولد رقم أربعه" طبعا مفقوسه .. اجبلك اخويا الصغير يقلها "
وطبعا بصراحة بعد ما عرضت الحقائق من كلام الناس والمعجم (وانا مليش دعوة هما الي بيقولوا) ..اسيبكم تختارو ايه رأيكم .. علشان تعرفوا رأيي .. انا شايف ان البنت كائن جميل جدا ... ومفيش حاجة تخليها تحط حاجة تزود من جمالها ..او الي بتظن انها بتزود بيه جمالها .. عن نفسي بحس انها بتبوظ شكلها بأي حاجة بتحاول تخبي لونها الحقيقي ده .. حتى لو على مستوى التزين للزوج ..مش عارف ده رأي شخصي .. بس فعلا الي بشوفه من صحابي والشباب انهم بياخدوا تريقه مش ظريفه على الحجات ديه .. بلاش أحسن .. انتي كده وزي ما خلقك ربنا .. محدش ليه عندك حاجة علشان كل ده .. لو على العرسان ده نصيب .. ولو على الجمال .. فعلا برأي الاغلبيه بتبوظي شكلك .. واضربوا يا بنات ..
مرحبا بيكم .. بصراحة أنا مش عارف كميه الناس الي بتدخل عندي ديه بتخش تقرا إيه .. قال أنا نجيب محفوظ .. كل ما أشوف عداد الزائرين وأشوف الرقم أستغرب .. بس بفرح ..بجد بفرح .. في ناس بتحبني .. في ناس لما قلت مدونتي كملت سنه قالتي كل سنه والمدونه طيبه .. بجد بفرح .. لما كنت بزعل بتواسيني .. في دفء بين المدونين بيعوض غياب أهلي بنسبه كبيره .. بفرح حتى لما الناس بتخش تقرا وتمشي .. مجرد زيادة عدد الزائرين بيحببني فيهم رغم إني معرفش هما مين .. أشكركم أوي .. وحان معاد كتابه شخبطه اليوم .. انا جاي من الشغل تعبان بس عايز اكتب .. علشان أنا طولت حبه من غير ما أكتب .. رحت منظمة حكومية أخلص ورق .. عادي زي بقيت الشعب اللذيذ ده إلي أنا منه .. المهم خلصت كل حاجة واتبقت امضى صغيرة من موظف صغير .. نزلت أمضيها .. إديته الورقه .. وكنت لوحدي إلي عايز الإمضه .. قعد يقلي إنت منين؟ .. أنا من (....) .. فين بالظبط؟ .. أنا من (....) .. أبوك بيشتغل إيه ؟ .. بابا (....) .. فين بطاقتك؟ .. معلش نستها .. وهات فيا تعذيب .. طبعا أنا عارف هوا عايز إيه .. عايز يسمم جتته بالشاي باليسمين .. وأنا عارف كويس إن ربنا لعن الراشي والمرتشي .. وعملت عم العبيط ومش عايز أطلعها .. وماشي بإسلوب حضرتك .. وسيادتك .. ويا باشا حبه .. وإن مكنتش إنت تدلعني مين هيدلعني .. وبقول في نفسي إلهي ربنا يسخطك يا أخي .. إنت مش عارف عقوبه المال الحرام .. وهوا .. المزيد من الاستجواب .. عفوا .. المزيد من الخنقه .. أسف .. المزيد من الإبتزاز .. وكان واضح إن هوا بيقول في نفسه " مش هسيبك يا روح طانطك إلا ما أشرب الشاي باليسمين " .. وأنا بماطل .. لحد هوا ما قطع السكه خالص .. " فين السجاير بتاعتنا " .. وبصلي حته بصه بمعنى .. يا نحبس بالسجارة يا إما إنسى تروح وقبلني على اللفه يا عتريس .. ساعتها خلاص .. هعمل ايه .. طلعت إلي فيه النصيب .. نصيب إيه ..قصدي المال الحرام إلي هياخدوة وإلي أنا هتسأل عليه يوم القيامة .. ووالله كنت مكسوف أوي وحطيت الفلوس تحت شنطته علشان محدش يلاحظ .. يقوم سيادته إلي تندب في عينه رصاصه البجح.. يا خدهم يعدهم قدام الناس ..وخدت الورقه ومشيت .. كنت بحكي لسه من كام يوم لشخصيه عزيزه إن أنا متضايق علشان إطريت قهرا إني أعمل كده .. فقالتلي الشخصيه المحترمه ديه .." متزعلش نفسك هوا إلي طلبها إنت مكنتش هتعمل كده من غير القهر إلي عليك" .. صح .. بس أقل ما فيها أحس بوجع القلب والضمير .. مفيش حاجة ممكن أعملها أكتر من كده ..
في حته خطيره جدا ناس كتيره مش عارفاها .. عقوبه المال الحرام .. زي الرشوة مثلا .. وبيع السجاير كمان وغيره من المصادر الحرام حاجة مميته .. ربنا بيخلي مراته وعياله يفجروا في الدنيا علشان يخشوا النار في الآخره .. متهيألي إنت مش عايز بنتك أو مراتك يطلعوا عينك ويعقوك ويبطلوا صلاة وميخافوش ربنا .. ولا عايز إبنك عياره يفلت منك .. كل ده علشان البني آدم ده مستعجل على رزق ربنا كده كده هيديه ليه وكاتبه ليه .. بس بدال ما ياخدة في الحلال هياخد بالحرام علشان يوفر وقت .. نظريه إقتصاديه ..
بس بجد أنا أكتر حاجة مضايقاني وواجعة قلبي من كل الكلام إلي فوق والرغي ده حاجة تانيه خالص .. هوا بيقول " فين السجاير بتاعتنا " .. هوا مش عارف إن السجاير حرام .. مش يقول "فين الشاي بتعنا" مثلا .. الشاي مش حرام .. بلاش شاي .. فين المولتو بتاعنا مثلا .. مالوا النايتي ؟ العلماء بيقولوا حلال .. عصير القصب وحش حرام وأنا مش واخد بالي ؟ .. يختار حاجة حلال بس علشان نكون ماشيين في السليم .. لكن سجاير ؟؟ وعجبي
وإنك تتخلى عن إنسان مش معناه إنك متكلمهوش ومتتعاملش معاه نهائي .. مقاطعة يعني .. خليني أتكلم عن حاجة بتمسنا كلنا .. وبتمس الجانب إلي بيوجع كل واحد عنده دم فينا .. إنك عندك صديق أو قريب .. صديقة أو قريبه .. أب أم .. أخ أخت .. ابن خال .. بنت خال .. (صديق /صديقه) .. دائما مش بنحط الأخطاء على نفسنا في حاله الخلافات بينا .. ودايما نقول "هوا إلي اتخلى عني أنا كنت كويس معاه" .. ودائما في حاله لو حصل مقاطعة بين شخصيين حميمين محدش بيتحمل مسؤوليه الانفصال دة ..
أنا هقول كلام بيوجعني دلوقتي غالبا مش هيخص أحد غيري .. وممكن متقراهوش .. ولكن لو عرفت المقصد منه ممكن تفاجأ إنك كنت غلطان في أوقات كتيرة في حياتك .. الكلام دة اتبنى عن قرار في حياتي إني اتخلى عن إنسان .. أنا إلي أسيبه .. هكسر قاعدة هوا الي سبب الانفصال .. انا إلي هبعد بقراري .. بس مش هتخلى عنه بمقاطعة .. ولكن هقطع إلي كان بيغذيني ويغذيه ..
المشكله .. إننا كمصريين مش بنوصف الأمور بطريقة صح .. كل واحد في حياته بيصنف الناس المهمين في حياته لحاجات بترجعله بفايدة .. لأني أؤمن أن مفيش حاجة اسمها تدي وما تخدش .. لازم تاخد .. مفيش عطاء نهائي .. حتى الأم .. بيرجعلها إحساسها بلذه الأمومة من عنايتها بإبنها .. لازم يكون في دافع لأي شيء في الحياه .. انا وانت كائنات بتدي علشان تاخد .. وانا ماشي بالمنطق دة ..
بعض الاصحاب بصاحبهم علشان الفرحة والتهريج .. والبعض علشان يسمعوني وقت ما تضيق بي الدنيا ولا أجد غيرهم .. ودول هما الي بيمسحوا الاحزان من قلبي .. والبعض بصاحبهم علشان بحب احس بالتقدير وسطهم .. والبعض بصاحبهم علشان بحبهم وبحب اديهم علشان احس إني (بتحب) في وسطيهم ..
ولكن العلاقة متبادله .. الي بهرج معاه بديله هزار .. والي بيسمعني بيحس إنه مهم .. والي بيقدرني بيحس إنه مسؤول .. مجرد الشعور دة بيخلينا نستمر مع بعض ..
لو قطعت عنك إي شيء من حجاتنا المتبادله فأنا بقاطعك .. لو إنت بتسمعني وانا قررت إنك متسمعنيش .. فأنا بمنع عنك التقدير إلي ممكن تكون مش بتلاقيه مع حد تاني .. ديه مقاطعة .. ايه إلي بيخلينا نحن لأصحاب زمان .. شعورنا إننا كنا بنتكلم مع بعض .. او بنلعب كورة .. ذكرى كانت منافعها موجودة .. لو في الايام دية بطلنا نتكلم هنسيب بعض .. ومش هنفتكر اللحظات الحلوة ديه .. متمنعش عن صاحبك إنك تبطل تتطمن عليه بدعوى الصحوبيه .. لأن دة بالنسبه ليه ممكن يكون سبب وجودكم مع بعض .. كل واحد فينا بيدي إلي بيحبه لنفسه لأصحابه متوقع إنهم يرجعوا ليه نفس الشيء .. ويتضايق إنه اصحابه مش كدة معاه .. في حين ان لو كل واحد فكر إننا مش زي بعض ..وكل واحد مختلف عن التاني .. وإنك لو إديت صاحبك إلي بيحبوة هيحبك وهيبادلك إلي بتحبه .. وأنا قررت الأيام الي فاتت - للأسف - إني أقاطع إنسان في شيء كان بياخده مني .. لأني مش بحب النفاق .. وإلي بيغلط فيا أنا مش بقاطعة جسديا وكلاما .. لأني ضد المنطق دة .. ولكن بما إنك كنت شخص مهم بالنسبه ليا فأنا هقطع إلي كنت بمده بيه .. مش هديله الخدمة المتبادله الي كنت بتعامل بيها معاه .. وأنا عارف كويس إن دة شيء هيكون مش كويس ليه .. وهستغنى عن المودة إلي كان بيديهاني .. بس انا لأول مرة هعمل كدة لأنه حسسني بالخيانه .. قرار كان أصعب من نزع الظفر من اللحم .. بس انا حاولت ابقي عليه كتير .. ولكن خلاص ..
أتمنى إني أكون غلطان في الكلام ده .. عارف كلام ملخبط ومش مفهوم ..أنا بس حبيت أخرج إلي جوايا .. ولو كنت بعينك وصلت لكلمة تحياتي فانت استحملت كتير واشكر إهتمامك لأنك تابعت البوست كله .. تحياتي .. ملحوظة علشان الناس الخبيثه : ده مش بنت بحبها خالص ..
يوم الأجازة .. بستناه طول الأسبوع علشان حاجة وحدة .. بسهر براحتي!! .. مفيش لازم اخمد نفسي بدري علشان متأخرش على الشغل .. (شهيق إرتياح عمييييييق) تعالوا أحكي لكم حكاية ظريفة علشان الموضوع دة غايظني بصراحة ..
كان يا مكان يا عمة يا جلبية .. في زمن العرب وأبو العتاهية والناس إللي على الجمال (بكسر الجيم).. زمان وخلاص يعني ..شخصين قاعدين في (جونينه) بيخدوا حمام شمس وبيشموا هواء نقي مش إلي بنشمة دلوقتي بسب زيادة عدد الكببجية اليومين دول .. المهم فإذا من جمال الجو واحد منهم اتسطل .. زي ما بنقول في العامية المصرية ( الهوا جميل ويسطل ) ويسطل في اللغة العامية المصرية يعني بيديلك حاله من البلاهه وفتح الفم مصاحبة بتمطيعه يتنج عنها فرد اليدين على الآخر ومصاحبة بـ "إمم آآآآآآآآآآه" من القلب .. وهذا ما حدث .. أخينا إتسطل في الـ(جونينه) .. وبدأ يتمغط (بالغين مش بالخاء) .. ويتمغط يعني يتمطع .. ومتسألش يعني إيه يتمطع .. مهوا هما علشان اتنين عرب هيقرفونا بالمعاني بقى !!.. فبعد ما تمطع ايدة قامت لزقت في أنف إلي جنبة .. طبعا إلي جنبة إستنكر هذه الفعله الشنعاء .. "الويل لك!! .. ويحك ..كيف تضرب أنفي؟!!!!" قام التاني زي كل المصريين رد الرد المختصر المفيد .. "أنا حر!" .. التاني قال جملة جميلة جدا .. قال " حرية يدك تنتهي عند بداية حرية أنفي" والقصة حقيقة وأصبحت هذه الجملة مثال لمواقف حدود الحرية الشخصية .. *حـــــبـــــة جــــــــد: أنا لية بقول القصة دية ؟ .. عندي كلمة بس عايز أقولها .. كل واحد حر .. انا موافق وتمام وكل حاجة .. بس حريتك متجيش على حريتي .. كل يوم وأنا في المترو رايح الشغل .. كل يوم بمعنى كل يوم حرفيا .. في بدعة جديدة حصلت .. ألاقي الشباب والبنات مشغلين الموبايلات على الأغاني وبصوت عالي .. وبيكون يجي 4 أو 5 في عربيه المترو شغالين .. وأنا بكون بقرأ قرآن أو بسمعة في ال MP3 .. أو بكون حاطط كتاب على الموبايل PDF اتسلى بيه لحد ما أوصل ..
أنا علشان أكون واضح .. انا مش بتكلم في حكم الأغاني خالص .. وبتكلم كمان على إلي بيشغل قرآن بشكل عالي كمان .. بس ديه مصدفتنيش إلا قليل جدا بس برضوا .. إنت حر وتسمع إلي إنت عايزه .. معاك إنت حر .. وأنا أول واحد بنادي بكدة .. بس خلي بالك .. إنت بالصوت العالي دة وإنت مشغل المغني إلي إنت بتحبه .. أنا مش بحبه .. ومضايقني .. والصوت عالي ومش مخليني عارف أركز في الكتاب أو القرآن على الصبح كده .. تخيل كمية الناس إلي في المترو إلي إنت بتأذيهم بالصوت .. ومخليهم مش عارفين يركزوا .. لو واحد عنده امتحان وبيراجع .. محاسب بيراجع شغله .. طالب بيكمل حل واجب عليه .. واحد بيتكلم في مكالمة عاجلة في الموبايل .. أو واحد غلبان زي حلاتي فقد قدرته على القراءة أو حتى السماع .. ليه كل دة؟!! .. تقول ليا تاني أنا حر .. طيب بس "حرية يدك تنتهي عند حرية أنفي" .. انا من حقي اني أكون في هدوء .. الأغاني مش حاجة رئيسية زي الكلام والرغي العادي .. ومش زحمة عاملة إزعاج .. لأ دة حاجة إنت مشغلها بإيدك بتزود بيها الإزعاج .. وبتزود فرصة غيرك إنه ميركزش في إلي بيعمله .. وخلي بالك ربنا هيحاسبك على كل واحد في المترو إلي ممكن يكون فيه 50 شخص .. يوم القيامة هيتعلقوا في رقبتك ويقولوا أصل كان مشغل حجات بصوت وعالي ..
إلي بيغظني أكتر .. البنات إلي بتعمل كده .. ودول أكتر من الولاد .. أنا هسأل سؤال .. والله أنا الولد بكون مشغل قرآن في وداني يعني محدش سامعه .. وبتكسف أعلي الصوت على الاخر علشان محدش يسمع انا بسمع إيه .. ومضايقش حد .. سماعات ودان .. مجنون يعني ..
إزاي بتعرف البنت تشغل أغاني في وسط رجاله وسيدات في نص عربيه المترو والناس بتقعد تتفرج عليهم؟؟.. وفي بنات بيشغلوا أغاني حب .. بحس إنهم هيقعوا من طولهم من الرومانسيه وسط المترو .. والأنيل بعضهم أجنبي .. مش بتتكسفوا .. أنا إلي أعرفوه عن البنت إنها كائن خجول وبيتكسف .. إيه دة والصوت بيكون عالي!!.. وبعضهم بيغنوا الشيء إلي أنا بستعجبلوه .. انا عايز أعرف لو أهاليهم كانوا معاهم هيعملوا كدة ؟؟ .. وبعيد عن اهاليهم انتوا المفروض يعني أكتر حد في الكون رقيق وبيتكسف .. الرجاله فيهم بجاحة .. ماشي .. بس البنات لأ .. أنا بجد زعلان أوي .. وبدعي ربنا إنه ميزوجنيش في المستقبل بنت بتعمل كدة .. لأنها بنت مش بتتكسف ومش هتحترمني ..
انا متضايق بجد .. وأتمنى إنك تعمل حسابك إن في ناس معاك .. مش عيب تغير من طبعك .. بالعكس لما تنوي النيه إنك متأذيش حد بصوت الموبايل وتقول " نويت والنيه لله إني مأذيش حد بصوت الموبايل" وتحطة في جيبك .. عداد حسناتك هيفضل يعد الطريق كلوة .. علشان نويت بس .. وكمان هترتاح لأنك ريحت الناس ..
كنت عايز أوروح السجل المدني أجيب شهادة الميلاد الجديدة .. علشان عندي شويه ورق عايز أخلصهم .. وفعلا .. جهزت العدة .. ما أنا عارف إلي فيها ..حطيت كتاب PDF على الموبايل .. وشحنت الموبايل على الأخر .. وأمس ظبطت ال MP3 .. علشان عارف إني ورايا ليله ما بعدها ليله .. وطبعا بما إن في ليله..يبقى لازم إجازة من الشغل .. صحيت كدة على 9 ورحت لابس .. حتى لا جاكيت ولا بتاع هوا تي شيرت بكم .. ومشيت أغني الدنيا ربيع والجو بديع .. ومعايا العدة ..كل الحجات إلي فاتت دية أنا بسميها طقوس ما قبل الطابور .. أي طابور .. جديا لازم يبقى في معالجين نفسيين علشان يظبطوك نفسيا قبل ما تروح الطابور .. ورحت السجل المدني .. وأنا داخل .."رايح فين يا أستاذ؟؟!!" ببص لقيت واحد من الشرطة بيقول ليا الجمله ديه..فرديت عليه:"رايح أطلع شهادة ميلاد يا فندم" والرجل كان طيب : "حقك .. شايف الناس ديه كلها .. أقف وراها " ..فأنا استغربت .. أتاري موقف الناس برة السجل من الزحمة وبيدخلهم عشرة عشرة .. رحت ماشي يجي كيلو كدة كل ما أسأل فين أخر الطابور .. لسه ورا .. وبعدين واحد قالي أنا أخر واحد .. وقفت .. فميلت عليه وقلتلوة : "هما قلبوها جمعيه ولا إيه؟.. هو إيه الزحمة ديه؟" .. قالي :"هوا إنت متعرفش؟؟!!! .. دة علشان شهادات التموين يا سيد ".. يا نهار أبيض!! ..كنت هرقع بالصوت وسط السجل .. دا أنا مبجبش الشهادة ديه إلا كل سنه مرة .. حبك موضوع التموين دة دلوقتي .. مش عارف أنا فقري .. ولا أنا إلي جاي أعكنن على الناس .. ما علينا.. قبلت قدري ونصيبي ووقفت .. قعدت أقرا في الكتاب .. وحاطط ال MP3 .. والشمس ما تتوصاش .. وقفت بتاع ساعتين ونص ووصلت لغايه الباب .. وهناك إصطدمت بطابور الستات .. كميه سيدات .. أقل واحدة فيهم عندها قول كدة 45 سنه ..وأنا قاعد الامين على يميني وهما على شمالي .. وفعلا ربنا يكون في عونه .. "إنت عمال تمشي في الرجاله ومش عمال تمشي الحريم يا خوووووووووووووووياااااااااا .. دة عالم إيه ديه!!" وهوا عمال " أه .. الرجاله أحسن من الحريم .. وكل وحدة تقف وهيا ساكته .. إلي مش عاجبها تمشي" .. وأنا واقف جنبه لقيته بيهمس " دا ستات بنت ....." طبعا هوا مقلش ستات هوا قال كلمة تانيه .. وطبعا النقط شتيمة طبعا .. بس ديه مدونه نظيفه أرفض فيها الألفاظ الخارجة .. بس أنا تضايقت .. والتانيه شغاله " مش عجباك الستات .. دة طابور الستات جوة مفيهوش غير واحدة بس" .. أنا بحكم وقوفي جنب الباب شايف كميه الستات جوة السجل وسمعت الكلمة صعقت .. بس أنا واقف عمال أتفرج على مسرحيه هزليه ومؤلمه بتعالج الامور من ناحيه شر البليه ما يضحك.. الراجل "وحياه أمي يا ست انتي..أوووووووووووففففففف .. مفيش غير ست وحدة؟؟ .. تعالي بصي بنفسك " وقام وخدها من ايدها خلاها تبص على طابور الستات جوا السجل لسه فيه كتير .. مش تسكت !!.. لأ تبرطم "برضوة دخلنا نقعد على المصطبه جوا يا خوووووووووويا ..إيه هييييه .. دة عالم إيه ديه يا ناس ..حسبي الله ونعم الوكيل فيك" أنا ساعتها كنت خلاص كنت عايز أترمي على الارض أضحك ومش قادر ..أنا مش ناقص أي كلمة من الكم الكبير من الستات ديه.. كان مدي كرسيين لحاجتين كبار .. هوا سمع الكلمة ديه .. وقال والله أنا غلطان ولا وحدة فيكم تستاهل.. وقام رايحلهم وهوا بيبرطم أن الزوق مش بينفع معاكم .. وخد الكرسيين وحطهم جنبي .. وهما اشتغلوا: "القوي فيه إلي أقوى منه" "دا أنا تعبانه يا ابني عندي الضغط والسكر والضغط والمرارة والكلوزتروفوبيا والديسك مش قادرة .. آآآآآآآه يا ضهري آه .. أنا دايخة وهقع من طولي" أنا كنت على وشك أقول ليها في اتوبيس من أول الشارع ساعة بالظبط ويرميكي في ترب البساتين يا حاجة.. وهوا قالها "المستشفى جنبنا إتعالجي وتعالي ".. وخد من دة كتير: -"أنا عايزه الموظفه فلانه " -"مينفعش يا ماما اتصلي بيها تطلعلك" -"مش معايا النمره بتاعتها " -"خلاص اقفي في الطابور" -"طب بص.. خش قلها هاتي رقمك .. قل لها ........ " -"انا مش ناقص يا ست انتي بلاوي تتحدف عليا اقول ليها هاتي الرقم تعملي مصيبه ..خليكي في الطابور" وإذا في الوقت دة طلعت من جوة شابه .. يعني من الي هما مثلهم الأعلى في الحياه هيفا ..وأمهم الروحيه نانسي هانم.. أنا شفتها خرجت رحت بصيت على طابور الرجاله أشوف رد فعلهم.. لقيت هدووووووووووء..هسسسس..مفيش شتيمة في الحكومه والنظام والريس ..مفيش صوت خالص ..لأ وإيه مركزين..مركزين أوي يعني .. كنت عايز أقول ليهم إتقوا الله .. لقيتلك الأمين بيقول للستات: " مش عارفين تكونوا زي دية؟ بدال الأشكال إلي بنصطبح بيها كل يوم" وكل وحدة سمعت الكلمة ديه خدتها الأنوثه ووقفت تتمرجح بتحكي أيام ما كانت هند رستم: "ننننننننعم .. ديه معصعصة .. دا قابلني لو اتجوزت" "دا أنا كنت وأنا في سنها.. .بسسسسسسست .. قمممممممممممر" "دا أنت ملكش في الستات .. هوا بنات اليومين دول بنات .. بسسسسسست .. الله يرحم أيامنا" "إلي مخدتهوش القرعة تخدوة أم الشعور" أنا مش عارف لزمت الجمله دي هنا بس إتقالت .. ولوك لوك لوك لوك .. موضوع الجواز والخلفه اتفتح .. ومش عارف مين اتجوز فلان .. ومين مش بتعرف تطبخ السبانخ .. والواد ابن أم سنيه حاطط عينه على إلي تنشك بنت الجران .. وإلي متأكد منه إنه ولا وحدة فيهم تعرف التانيه .. وسبحان الله .. الموضوع إتقلب من الخناقه مع الأمين .. لطبيخ ولحمة وجواز .. وحش في أعراض الناس .. لغايه الأمين:"بس يا وليه إنتي وهيا" طبعا أنا قاعد .. خلاص بجد عمال أضحك لما قلت أنا خلاص هيضربوني.. سيبك انت بس .. طبعا في حجات كتيرة معجبتنيش في الموقف وسلبيات كتير .. بس إحنا طوابير حياتنا الماديه والمعنويه والخلقيه هتتعدل إمتى؟؟ أحمد مبارك
السلام عليكم ورحمة الله وبركاته الموضوع بان من العنوان .. بس قبل ما أحكي أي حاجة .. أنا سمعت الخبر .. طلعت إشاعة في الدنمارك هانم ان في مسلمين عايزين يغتالوا أحد الرسامين إلي رسموا صور لرسولنا الكريم .. قاموا - مع سبق الإصرار والترصد - كل الصحف الدنماركيه وبلا إستثناء قامت نشرت الصور تاني تضامنا مع الرسام وان ديه حريه تعبير..
أنا لا هشتم ولا هتعصب .. ولا هعمل حماس ثوري وأقوم المدونين على الدنمارك .. والكلام دة بجد مش هزار أو تريقه!! إحنا لازم نغير تفكيرنا شويه يا جماعة .. العصبيه مش كل حاجة .. أنا قعدت شويه مع نفسي أفكر .. هو العالم ديه مش إتلدغت مننا إقتصاديا سنه 2005 علشان نفس الموضوع؟ ده الخليج لوحدوة تقريبا أكتر من ربع إقتصادهم .. أنا كنت في الخليج وشايف .. وأحلى بهدله إتبهدلوها .. وقمنا صحفيا وإعلاميا ودينيا والعلماء والمشايخ قاموا بأحلى واجب..
وبرضوا الصور اتنشرت .. بس المرادي مع سبق الإصرار.. طب إيه الموضوع .. إيه الحل .. وأنا بصراحة مؤمن بحاجة .. أي حاجة بتحصل أنا ليا علاقه بيها .. وسيادتك ليك علاقه بيها .. وحضرتك يا محترمة ليكي علاقه بيها .. أكيد ليك علاقه .. لازم نفكر شويه هوا دة بيحصل ليه .. طب أنا أعمل ايه؟؟
هتقول ليا مقاطعة؟ هقولك جميل ..وبعدين ؟!!.. هتقول ليا نشتم في الصحف ؟ جميل بس برضوا يا أخينا وبعدين؟!!..
أقعدت أفكر مع نفسي قلت يبقى ما ينفعش .. طريقة تفكيرنا دية غلط .. ديه حلول فرعيه مش رئيسيه ..مهو لو كان دة بينفع كان معملوش كدة .. اكيد في حاجة غلط في تصرفنا.. طب هما ليه بيقولوا كدة؟؟ يبقى لازم نغير طريقه تفكيرنا علشان نوصل لحل ..
يا ريت نركز شويه في الكلام دة .. نفكر بهدوء .. إحنا في أزمة تسيء لينا ..ولازم نفكر بعقلانيه شويه .. تخيل إنك مواطن من الدنمارك .. وعايزك تحط نفسك حرفيا مكانه وتفكر تفكيرة .. انت من دوله صغيرة .. بتعمل إلي إنت عايز تعمله .. وتقول إلي إنت عايز تقوله ..ومحدش ليه كلمه عليك .. وعندك إن حريه التعبير ديه حاجة مهمة .. وإن من حقك تشتم إلي مش عاجبك .. وأي حاجة تانيه غير كدة تبقى عجيبه وتستغرب قوي .. وفعلا طلعت تشتم في واحد دنماركي تاني .. الدنماركي التاني إتغاظ .. هيرد عليك ازاي؟؟ .. وياخد حقه إزاي ؟؟ .. مهوا انت حر ..وكل حاجة وليها حاجة .. بصوا مفيش داء من غير دواء لازم حل.. الحل الي عندهم هترفع قضيه تسترد حقك ..
أظن أول حته عايز أقولها ظهرت .. لو معرفتش تسكتهم وتاخد إعتبارك إزاي بحاجة تكسر نفسهم عندهم كل إلي بتعملوة إنك بتعمل دوشه .. الموقف بالظبط زي ما تروح لبيت الحرامي إلي سرقك وتشتمه وتكسر ليه سور البيت بتاعة من برة.. وهوا جوة مشغل تسجيل ومعليه ولا سامع انت بتقول ايه..ولو سمع هيسيبك تخبط لانه عارف إنك هتزهق وهتمشي كمان شويه لما تزهق .. ويطلع هوا يصلح السور كمان شويه لما تمشي.. ولا همه .. والله لو قعدت عشر سنين تشتم ولا هيحصلوة حاجة.. لكن لو دخلت كسرت الباب وجبته من قرعته وإديتوة علقه هيحترم نفسه ومش هيكررها..
إحنا بالظبط كدة فالحين في الجعجعة من برة السور .. مقاطعة وشتيمة وصحافة .. وفاكرين إننا بنعمل حاجة .. والواقع إحنا بنخبط في السور .. وهما عارفين إننا كمان شويه هنزهق من المقاطعة والشتيمه وهنسكت .. وأنا أول واحد بعمل كدة.. معلش أنا مولع من جوايا .. دة رسولي يا عالم .. انا هتشل خلاص .. بس أهدي نفسي علشان أعرف أفكر علشان أعرف هخش للحرامي إزاي..
طيب بعد ما هدينا نرد كرامتنا إزاي؟؟
أولا ودة قبل كل شيء لازم نستعين بربنا .. وندعوة ينصرنا ويثبتنا .. وده مسؤوليتك ومسؤوليتكي يا محترمه ..حسبنا الله ونعم الوكيل ..
ثانيا وديه مش في أيدنا ..لازم يا دولتنا يا عرب يا مسلمين نطلع محاميين يرفعوا قضيه .. بس نجيب محاميين محترمين مش إلي هما بتوع الأزبكيه؟؟ لأ ناس تقف في المحكمة الدوليه ..ناس جادة بحيث يرفعوا قضية ونكسب بتعويض كبير جدا يتقفل الجرنال على حسه لأنهم مش قادرين يسددوا .. ويعرفوا ان الله حق وان احنا مش شويه.. وديه هيا إلي هتحل الأزمه..لاننا هنكسر عينهم عندهم..
ثالثا شيوخنا الأفاضل .. أنا مرة كنت بعمل شات وانا عندي 18 سنه مع بنت في أوربا كنت لسه جديد على النت وبتاع .. لما عرفت سني ايامها قالت ليا : هوا إنت متزوج وعندك أولاد؟؟ دول أساسا بيتخيلونا صحرة وخيم وبس .. عايزين الدعاه تعرف الناس بلغتهم إحنا مين .. والله في بعض المسلمين الجدد بيعتبوا علينا علشان مكناش شدين حيلنا معاهم ومش بندعوهم بدري ومن الأول كويس .. يا ريت تقولوا ليهم مين الرسول بتعنا علشان يحترموهم..إشمعنى اليهود إلي يشكك في عدد محرقة اليهود بتاعه هتلر يبهدلوة إلي جابوا أهلوة؟؟ ليه إحنا الوحشين دائما؟؟!!
رابعا الضرب في السور .. وديه شغلتنا يا رجاله همتكم .. المقاطعة والإعلام .. الحاجتين إلي إحنا كويسين فيهم ..إلي في إيدنا نعملهم .. وأنا هضع صورة لمنتجات الدنمارك ..مش معنى كدة ننسى إلي فات من أولا لثالثا .. لام نفكر كويس في الكلام إلي اتقال فوق..وأنا مش هشرح لكل واحد يفكر إزاي .. إحنا كبار كفايه ..
اللهم يارب إنا نحب نبيك .. فانصرنا على من عادانا أحمد مبارك
والله هيا ..متخفش تعالى تعالى بس..متجريش..هذه هيا المدونه بتعتي AHMED MUBARAK أحمد مبارك
متقلقوش..بس عملنا بياض للمدونه..شويه كابسي على معجون وحبه سنفرة..وأخيرا سيراميكا كليوباترا.. كل عام ومدونتي بخير..لازم اهنيها انها كملت سنه.. من 12 فبراير 2007 لغايه اليوم.. كل عام يا مدونتي وانتي أفضل اليوم مدونتي كملت أول سنه بالتمام والكمال ..وأصبحت بتمشي تاتا تاتا..
ولذلك غيرتلها الفستان ..وتعمدت انه ميختلفش في ألوانه عن الي قبليه أوي علشان أنا اتعودت عليها كدة.. جبت قالب بس..مسبتوش كدة..غيرتوة 100 في الميه استفدت من ترتيب كود ال XML وعدلت فيه كتير بما يتناسب مع ما أريد..وبال Photoshop ظبطت كل حاجة ..الحمدلله وأنا أساسا بدور من حوالي 4 شهور على شكل يريحيني ومعجبنيش حاجة..انا رخم في الاختيار ..فعملت الشكل بإيدي أحسن..وأديني إرتحت..
أولا خليت المدونه أعرض علشان محسش إن الكلام مضغوط..ديه كانت حاجة بتضايقني.. وحطيت صورة السماء علشان أنا بحب السماء واللون الأزرق..ودليل بديع خلق الله..
وأهم حاجة حطيت إسمي باللغه العربيه إالي أفخر بيها تماما علشان كل الناس تعرف مدونتي ..
أما عن المضمون فمحدش يخاف الشكل اتغير..بس إلي بيكتب أحمد مبارك ..محدش تاني.. وهفضل أدون إن شاء الله على قدر ما أستطيع..إدعولي
أما عن سنه التدوين..فأنا مريت بعدة مراحل.. الأول كنت عاملها أحكي فيها حياتي الشخصيه..ومكان أفضي فيه همومي وخلاص من الكليه المذاكرة قبل ما أتخرج وأشتغل..ودة واضح من أول حوالي عشر بوستات.. ثم بدأت أدخل في مشاكل الحياه ووجهات نظري .. خاصه إني كنت جديد على المجتمع المصري الجميل.. وكان في كذا بوست لقيت الناس حبتهم أوي..الحمدلله.. وأحلى حاجة كانت السنه ديه كفيله إني أكتسب مدونون جدد كمعارف بيزورني بإستمرار..ربنا يخليهم ليا..
طبعا ..لازم أشكر كل المدونين إلي بيزوروني.. وأحب إنكم تدعوا لبابا وماما بالخير علشان بجد أنا مهما عملت بقصر في حقهم..وإدعولي ربنا يوفقني وأطيعه..وإن السنه ديه تحسب ليه لا عليا..
أما عن المدونين..فأنا شايف إن التدوين تطور جدا..وأصبح فيه العديد من أشكال التدوين بشكل جميل..وفعلا يا ريت محدش يبطل يدون ويكمل المشوار علشان في حجات بتفيد جدا..وفي حجات بتكون مسليه لينا..وكمان فيه السلبي بس الحمدلله قليل..ربنا معاكم..
واتفضلوا كلكم التورته فوق أنا مش حارمكم من حاجة..ومفيش مشاريب كفايه إلي دفعتوة في التورته.. تحياتي للجميع أحمد مبارك
وكعادة الشعب المصري جميل جدا..ظريف جدا فهلوي جدا..ومعلش بقى..المصري مش هياخد بالوة من حجات عجيبة كدة بيعملها كل يوم.. أنا كنت عايش برة في الخليج.. وشفت عادات القطريين والخليجيين والشاميين وإلي في شمال أفريقيا والهنود والأجانب وكل حاجة.. وإن شاء الله -إن طلعت من البوست دة على خير مش مقتول - سأحكي عن مميزات..سوري..إنفرادات الشعب المصري الـ(غلبــان)عن شعوب العالم ..معلش إحنا منفردين ..ومتضحكش أوي كدة يا عتريس ..هتشوف ..ومتجيش تقول"ياااااة تصدق صح" أو "أه والله بجد"..وبلاش تتريق على مخاليق ربنا علشان إحنا المصريين محترفين تريقه على مخاليق ربنا.. وهنيجي للموضوع دة في بوست تاني.. مستعدين للفضايح..طيب..إنت يا كابتن إسكت والنبي مش نقصة دوشة..وإنت وسع شويه كدة سيبلي مكان علشان أعرف أجري لو إتشتمت أو كنت هنضرب.. أما بعد..
أحب مسر .. وأكلات مسر.. كان يا مكان يا فجل يا مخلل..كان في عيله صغيرة إسمها عيله عم حسن..إتلمت عليها في غارة بدون معاد عيله الأسطى شحيبر بتاع العربيات هوا ومراته وعياله.. قال إيه "أصل العيال بيزنوا ..عايزين نلعب مع هناء بنت عم حسن"..قال الحب مقطع بعضه..وطبعا عم حسن لأنه طيب..وحبوب قلهم"البيت بتكم يا حبيبي".. وبغض النظر إنه بينه وبين مراته في المطبخ كان بيقول:"الله يخربك بيتك أهلك يا شحيبر..أما إنت ابن شحبير صحيح.. بوظت الميزانيه"..وطبعا مراته"أيه إلي بتقولوة دة يا راجل..إنت بسلامتك كل إلي همك الفلوس؟؟!!.. إنت مشفتش مراته كانت بتاكل إزاي.. كانت عماله تنقي الفراخ الكبيرة لإبنها إالي يتزغد في قلب أمه..وسايبه محشي الكوسه والبتشينجان والكرونب وعماله تنقي في ورق العنب وقال إيه..بتقلي ورق العنب دة مهري..ديه طحنته هيا والي يندب في عينه رصاصاه ابنها هوا وأبوة" خلينا من الحوار دة..إحنا شعب طيب برضوة..بمجرد ما خرجت من المطبخ نسيت كل حاجة"أهلا أهلا يا أم فروق..هي هي هي هي هي هيأ..والله منورة يا ختي..مش تقولي طيب قبليها كنا فرشنا الأرض ورد".. شفتوا إحنا طيبين إزاي؟؟.. وبعد الشاي والرغي والذي منه..إتفقت العيلتين على إنهم يروحوا جنينه الحيوانات..وطبعا الأطفال الصغيرين بقوا عمالين يتنططوا زي القرود ..متهيألي لو بصوا في المرايه وشافوا نفسهم وهما عمالين يتنططوا أنا متأكد مش هيزوروا قفص القرود في الرحله السعيدة..وبعد أن تم أخذ القرار بعمل الرحله ..إذا بأول شروط الإستعدادات..إحنا شعب بيستعد..بيحب ياخد كل حاجة معاه.."ها..من هيعمل السندوتشات؟؟".. إستوووووووووووووووووووووووووب..وقف شويه أنا عايز الحته ديه.. أهوا إحنا المصريين كدة..أول حاجة نفكر فيها بطننا ..طب أنا رايح رحله..طب ما أفكر الأول في المواصلات أو الملايات أوالفلوس..إشمعنى بسلامته الأكل أول حاجة تتسأل .. ويا رايت الأكل بيقف على سندوتشات..إنت جرب تروح أي جنينه فيكي يا مصر وبص إيه إلي داخل..طبعا ..مقدس..محشي الكرونب..تلاقي يا سيدي الحلل كدة..والأم شايلاها فوق دمغها ..وجايبه المطبخ كلوة..الإطباق والمعالق والشوك والسكاكين والميه والشاي والسكر..وأحلى حاجة..الكلوب بتاع الشاي..تحفة....وإلي ميعرفش كلوب الشاي ..عبارة عن أنبوبه بتاجز بعين واحدة فقط ..وإلي يعرف قطار الصعيد إلي ولع كلوة..ولع بسببه..حبكت يعني أم كبايه الشاي؟؟ جايبين كلوب الشاي..خلاص يعني..لازم تحبسوا..مش كفايه المحشي.. لأ وإيه..المصايف ..ليها أكله شهيرة أوي..الفراخ البانيه والمكرونه..عدي على أي بلاج كدة..الشعب كلوة ..المكرونه والبانيه..والمكرونه تكون كلها رمل..وكل ولا يهمك ..إديلوا..خش عل المحشي..إحنا شعب بياكل الزلط.. ودونما عن العالم وشعوب الأرض كلها..مفيش فيكي يا كرة أرضية أو كون أو حتى جحر نمل فيه كل مناسبات الأكل دية إلي فيكي يا شعب مصر.. كحك وغريبة وبسكويت وبي تي فور وهلم جرا عد شوف العيد بيكون فيه ايه من الحلويات.. وعيد فيه رنجة ..والتاني فته..وعيد نلون البيض وناكلوة..وعاشوارا بيتعمل بليله في اللبن غريبه كدة..وأنا لو قعدت أقول عن الأكلات في المناسبات مش هخلص ..ده حتى الناس إلي رايحة القرافه عند الميتين بيروحوا بقرص القرافه.. إحنا رايحين نتعظ ولا ناكل!!..
تيتا الله يرحمها كانت في الأربع سنين كانت تجيلها ست كل سنه معاها المفتأه..وتيتا كانت ست طيبه وكبيرة..والمفتأه للي ما يعرفهاش حاجة عامله زي العسل الإسود..بس كأنك بتاكل حجر مش عسل..كنت لو حبيت أكل منها وأنا مليش تقل عليها..كان بيجي معاها كاتلوج طريقه الأكل.. 1-أحضر معلقة وضعها في المفتأه مع السحب القاسي والسريع للملعقة مع الإمساك بالصحن جيدا.. 2-قم بإحضار لقمه العيش..ومررها على الملعقة التي تحتوي على المفتأه حتى تتأكد من إمتلاء الخبز بالكائن الأسود.. 3-قم بطفح قطعة الخبر..ونصيحه متكررهاش تاني.. المهم إن محدش كان بياكلها وبتترمي..كنا بقول لتيتا"بلاش تشتري منها محدش هنا بياكلها"..تقوم تقلي وهيا بتبتسم "ديه عادة أكل الله لا يقطعها!!" ..هقول إيه ..إدعولها بالرحمة.. أما لو دخلنا على قسم أنا بسميه المقرفات..يختيييييييي ..هتمشوا من الريح ة.. إنزل الحسين وروح لأي مسمط.."إتنين كرشة..ولحمة راس ..وإتوصى بالجوهرة"..والجوهرة دية العين ببتاعة الجاموسة بالمناسبه.. ولغ يا معلم.. الحجات ديه عليها إقبال شنيع جدا ..أنا بقرف من الحجات دية بصراحة..ولو حصل إن الحجات ديه دخلت البيت ..أنا بطفش.. قابلوني عند أم حسين..سلااااااام ..وأجي أخر اليوم.. وإلا بقى لما يجبولك الكوارع..وكل ..ديه بترم العضم..إلهي يرمموا جتتك..أنا عمري ما أكل الأكل دة.. طبعا طبق الفول من على العربيه ليه معزة خاصة.. شويه فول في طبق أكل فيه الشعب المصري كله قبلك..وشويه طحينه وزيت مجهول المصدر.. وشويه سلطه وبصل أخضر.. اوعى وشك.. بعديه تنزل وحش.. أي أتوبيس تنط فيه وتعمل خناقة.. إحنا تاريخنا أكتر من 7000 سنه..كانت تيجي حضارة بعد حضارة..كانت كل حضارة تمشي تاخد كل حاجة وتسيب عادات الأكل..ولغايه دلوقتي ماشيين بعادات 7000 سنه أكل..والقوانين المصريه صارمه..لازم تنفذ.. وكمان الشعب المصري دلوقتي واخد حصانه من كل حاجة..ممكن ياكل الزلط..ويشرب زيت العربيات..وبيعتبر غسيل الفواكة من الرفاهيه المبالغ فيها!! ربنا يخلي الأكل يارب ..والشعب المصري شعب لذيذ .. بس إحنا بنربط الأكل بكل حاجة.. الحزن الفرح النجاح الرسوب.. يعني مثلا علشان في العزا بنلبس إسود ..لازم نشرب قهوة ..تناسق ألوان .. مينفعش مثلا عصير برتقال؟؟.. بلاش أخر جمله بهزر..أحسن أنضرب.. ومازلت..أحب مسر..وأكلات مسر
السلام عليكم ورحمة الله وبركاته إزيكم يا شباب..بوست خفيف ولذيذ المرادي..محدش يجي يقلي إنت بتطول....خليني أشوف أخرتي معاكم..بوست صوغنون نونه خالص وكلوة حسنات..وصدقة جاريه لغاية يوم القيامة.. بجد أنا مش مصدق .. انا إتبعتلي الميل فيه الموقع دة الطريق إلى الله..وفعلا جربت الموقع بيتفتح بسرعة وبوضوح حلو يتناسب مع النت التعبان بتعنا بحيث ميقطعش..وبيعرض قناه الناس والعفاسي وغيرها مباشرة ومن غير تقطيع أنا جربته بنفسي.. وهوا دة الميل:
إدخل شوف بجد مش هتخسر حاجة بالعكس..إحنا كمدونين مش بنشوف التلفزيون خالص..أو قليل..والحمدلله دلوقتي ولا حوجة للتلفزيون ربنا يخلي النت..وشوف وأنشر الموقع ..وخلي بالك كل واحد يعرف الموقع دة منك..بكل حاجة هيسمعها هتاخد حسنات زيوة بالظبط..ولو قال لحد تاني هتاخد حسناته وحسنات الي قالوة..وسيادتك قاعد مأنتخ مبتعملش حاجة.. مش هتخسر حاجة يوم ما تحط لينك عندك..وعلى فكرة قناة الناس بالذات بتوصل الدين بسهوله أوي وبأسلوب ظريف طحن أو فحت مش مشكلة.. ومسموح النقل في البوست دة بس :) وكفايه كدة عليكم
هوا ممكن يكون العنوان عجيب شوية..بس هوا أنا فعلا كنت محتار.. ترددت كتير إني أكتب البوست دة .. وكتبته ومسحته كذا مرة في أكتر من شهر..وتناقشت كتير في الموضوع دة .. خاصة مع أصدقائي في الكليه ..لدرجة إنه كان بيوصل لحد الشجار أحيانا.. أنا اتربيت في دولة قطر في الخليج ..إتولدت هناك وعشت هناك .. وكنت معرفش حاجة عن مصر إلا كل كذا سنه يوم ما كانت الظروف المادية لبابا تسمح بنزول الإجازة.. وفي الواقع.. بتكون إجازة منيله بستين نيله بالنسبالي.. وتشتغل الـ " لأ..والتؤ..والـ أف ..والـ يوووووه" وكل أوجه الإعتراض على مجي مصر بالنسبالي.. أنا مكنتش أعرف منها غير بيت تيته الله يرحمها .. وأول ما أفتكر الأجازة أفتكر شقة حي روض الفرج مسقط رأس بابا إلي في شبرا مصر قريب من شارع شبرا كدة..قرب عمر أفندي أو محطة مترو مسرة حاليا للي يعرف المنطقة.. وأفتكر الحمام إلي لامم المطبخ معاه.. والحما بالكوز .. وشقة فيها 15 نفر طول الفترة إلي فيها علشان بابا .. وأفتكر إني ممكن أنام على الأرض أو أشد ستارة أتغطى بيها في وسط البرد .. أفتكر تيتا-الله يرحمها ويحسن إليها- وهيا كل همها إنها ترجعني دكر بط من خلال تزغيطي الأكل الشنيع إلي كله لحمة وخضار وحجات عجيبة إسمها باميه ويكا بتفكرني ديما بالحجات الجميله إلي بنحبها في زكام الشتا.. أو المخلوق الشنيع إلي اسمه الكرشة .. مبقدرش أستحمل الريحة .. افتكر 5 عمات كل همهم أنهم يتسابقوا على بوسي..وأنا بكرة البوس.. وكمان أفتكر إني بكون وحيد ومفيش ليا أصحاب هناك.. طبيعي ..أصحابي في قطر..وعيشتي هناك..وكان مستوى المعيشة أعلى من العيشة عند تيته..مكنتش فافي..ولكن كانت مرتبه مقتصرة على 5 أفراد..بس فكانت منظمة..وماما ليها إسلوبها في تنظيم حيتنا بشكل جميل.. وكل ما بابا يقول "ياه ..ولا يوم من أيامك يا مصر" ..كنت بقلوة علطول الكلمة الشهيرة "يــعععععع"وأدوس على الحروف لحد ما أكون هفجرها..ويبتسم ليا بحنيه ويقلي "بكرة تعرف قيمتها".. وكنت بقول بعند"لللللللللللللـلأ" بنفس إسلوب "يع" إلي يغريك تمسك أقرب عصايه وتدبني بيها..
وجه الوقت إلي أنهيت فيه الثانوية العامة .. وحان الوقت إني أتلقى التعليم الجامعي .. وحان وقت النزال ما بين كل المصريين الموجودين في قطر على مقاعد كليات القمة المحجوزة علشان تخش كليه محترمة..وقد كان والحمدلله.. دخلت كليه حاسبات ومعلومات جامعة حلوان.. وتخرجت منها الحمدلله..
لما جيت مصر مقيم .. لا أخفي كم كنت أكرهها-مصر-.. مكنتش طايق إني أعيش فيها .. جي مقتنع بمنطق واحد بس.. "قطر هيا بلدي .. أنا مليش دعوة بجواز السفر والجنسية المصرية..مصر قدمتلي إيه..قطر ليها الفضل عليا ..أكل وشرب وتعليم ومعامله محترمة وتربية".. وكنت أرفض مصر تماما.. والكلام دة كان لفترة قريبه مش بعيدة.. ولكن في ناس كتير كانت بتحاول تقنعني وكنت مصمم إنهم متحيزين لمصر لا أكثر..زي حسام صادق و أحمد عماد .. لحد ما سافرت إلى قطر في إجازة .. واكتشفت إني رغم وجود أهلي هناك إلا إتي نفسي أرجع مصر تاني..وكنت محتار في شعوري دة وقتها!!.. وكنت هناك في قطر بحن للحجات الجميله في مصر..مش عايز رفاهيه..أنا عايز تيتا تحضني في روض الفرج..عايز أتخانق على الكنبه مع عمامي واخلع الستارة..مش عايز بنيو ولا دش ولا سخان..ربنا يخلي بابور الجاز إلي بيعميني ويخنقني في الحمام والكوز ..عايز أنده لعمتي تناولني الفوطة.. عايز أتسحر من على عربيه الفول بتاعة عم سيد بكام طبق سلطة وبصل أخضر..في طبق الشعب كله كل فيه قبلي..مع حبه طحينه وزيت مجهول المصدر ما زالت الدوله تبحث في ماهيته..وفي إشاعات إنه زيت عربيات..وأرجع البيت اعمل أزمة في كل حاجة..في شغلي ..في بطني وفي كل حاجة..عايز أكل كنافة في رمضان .. عايز امشي على قصر النيل لما اكون متضايق..وأخرج مع حبايبي في الكليه.. أنا بحب مصر..وحاليا أنا شغال في مصر ..وعايز أشتغل مبرمج محترم في مصر ..وحأحول بقدر الإمكان إني مسفرش.. بيقلولي في الشغل إزاي مش عايز تسافر وممكن تجيلك فرصة؟؟ ..قولوا مجنون..قولوا اتسطل..أنا مصري..بحب مصر..محدش بينسى أصلوة.. أنا برضوا بحب قطر..ناس محترمة وطيبه..كرم وأصل وعروبة..وربوني واحترموني وحضنوني من صغري..شعب جميل..-انا مليش دعوة بسياسه الدوله انا بتكلم على الشعب- وهيا بلدي الثاني..
كان جواي صراع فظيع حول مسأله الإنتماء..لكن فعلا..المصري بيحن لمصر مهما قست عليه.. ممكن يا جماعة يكون الناس عايزة تسافر علشان الماديات والمشاكل..ناس كتير بتشتكي من الوضع..ناس كتير بتشتم البلد علشان ظروفها الوحشه جدا جدا جدا.. أنا شايف..إن مصر أعظم من مجموعة أفراد بوظوا نظمها وحطونا تحت نظام صعب..ولكن حبنا لمصر هو حب لوطننا مش حب لظروف بلدنا..مهما ساءت الظروف لازم تعرف إن بلدك دية بتعتك حاول تحسنها بعمل واجباتك..ومتشتمش مصر علشان سوء إدارتها..إعتب على النظام وسوء الإدارة الكبرى.. الرسول مكرهش بلده لما ساب مكه..إتعذب وأهين وقيل عنه أفظع الشتائم والإدعاءات فيها..ولكن مكرهاش..هو كره النظام السيء وخرج منها وهوا يقول:
والله إنك لخير أرض الله , وأحب أرض الله إلي , ولولا أني أُخرجت منك ما خرجت
مشتمهاش وكرهها ..وحاول انه يصلحها..وفعلا سنه 8 هجريا كان محررها وجعلها جنه في الأرض..ليه منكنش زيوة؟؟ عارفين إيه السؤال إلي خلاني أعيد تفكيري..قعدت أفكر في حاجة.. لو قامت الحرب في مصر وقطر هتحارب فين؟؟ أظن السؤال دة ينهي كل حاجة
بصوا يا جماعة .. أنا زهقت .. بجد زهقت إحنا نفتح قنوات إباحية على الدش ونخلص .. ولا جاد ولا بتاع هيا بايظة بايظة.. إيه إلي بيحصل دة؟؟!!! .. أنا مش فاهم إحنا اتوكسنا في فطرتنا ولا إيه؟؟ حرام والله العظيم..
معلش يا جماعة..أنا دخلت جامد شوية .. بس أنا شايط.. إحنا دلوقتي بنتفنن إننا نبرر سفالة أفعلنا بطريقة مستفزة..أنا مش عارف أقول أيه.. عندي كلام كتير أوي..
وأنا بتصفح في أحد مواقع الفيديو إذ لقيت في برنامج حواري..فيه حوار بين مخرج أقل ما أوصفة إنه سافل وحقير وديوث ..معلش الكلمة الأخيرة دية تقيله .. بس واحد بيقول أنا ديوث.. أينعم هوا مقلهاش صراحة بس قلها بالمعنى..ومعاه ممثلين في نفس الفيلم إلي أخرجة..
قال رسول الله صلى الله عليه وسلم: ( ثلاثة لاينظر الله عز وجل إليهم يوم القيامة :العاق لوالديه ، والمرأة المترجلة المشتبهة بالرجال والديوث) صحيح أخرجه أحمد والنسائي - الديوث من أخبث خلق الله قد ماتت الغيرة في قلبه
الفيلم بإختصار لم كل الحجات السفله في الكون ورصهم في فيلم واحد..كان أقلها الإدمان وخد من السفاله الجنسية كل حاجة..وبلاش أزيد..لدرجة إنه جايب منظر ......والله انا حتى مكسوف أكتب إسم الكلمة دية..المهم العمليه فيها شذوذ وتماثل وخلاص .. والمذيع كل إلي عليه إنه معترض على إنهم مقالوش "للكبار فقط"!!! .. مش مشكلة المناظر .. مش مهم السفالة .. الراجل يا عين أمه زعلان علشان مش مكتوب فيه " للكبار فقط " !!!.. بس ..دية المشكلة ..لأ وإية شوف النفاق .. يقلك المذيع "أنا مش عايز إبني يشوف الفيلم" .. نعم يا روح طانطك؟؟ طب لما إنت خايف على بيتك مش خايف عل بيوت الناس ليه؟؟ مهو علشان على كرسي لازم ينادي بالحرية والمسخرة علشان يسيبوة.. أما المخرج بيقلك.."لأ أنا عايز ابني وبنتي يشوفوا الفيلم والمناظر دية ويتعلموا!!".. يتعلموا ايه؟؟!!!!!.. أنا أقلك يتعلموا ايه.. والله دة ديوث .. مفيش لفظ تاني .. وشوف ربك .. الممثله في الفيلم قالت "أنا مخليش ابني يشوف الفيلم"..دة كلمها..الممثله مش كلامي..
بصوا يا جماعة.. أنا عارف إن في ناس كتير هتقلك دة فيلم عبقري ..وفيلم بيصور الواقع .. وكل الكلام الكتير الهجص إلي بنسمعة على كل حاجة وحشة دة.. معلش .. مع إحترامي..بلاش نقول عادات وتقاليد ولا دين ولا غيروة.. خلينا نتكلم بالعقل.. إزاي ممكن تاخد قيمة مفيدة من شخص بيناقض نفسه.. المخرج بيقول "أنا حطيت صور الستات في جميع الاوضاع القذرة علشان أبين للناس إن المرأه مش سلعة!!" طيب أقول كلمة مسيئة للأخلاق يعني؟؟!!.. يعني إنت بسلامة مرات خلتك مطلعها ومقلبها قدام المشاهدين في أوضاع زباله وفي الاخر بتقول"مش سلعة"..أمال لو كنت قلت إن المرأه سلعة هتعمل إية؟؟..إنت بتستعبط الناس مثلا فاكر الناس مش بتفهم؟؟..بس هقول إيه..في ناس كتيرة جدا بتصدق الكلام دة.. طب دة إنسان مريض.. الممثله يوم ما يسألها المذيع "وإنتي في الوضع دة حسيتي بأيه..متكسفتيش..محستيش إنك مبتعمليش حاجة غلط؟؟"..تقلوة"أصل مقدرش أقول للمخرج في حاجة قلها لأ"..ديه مش أصبحت سلعة..دية أصبحت عبده بلسنها مش بلسان حد تاني.. هو إيه إلي بيحصل دة؟؟!!!..
يعني نسيب الدين إلي كرم المرأه ورفعها.. والعادات المصرية الأصيله إلي جابت ولاد البلد وبنتها الجدعان..علشان شخص زي دة يكسب فلوس؟؟..إحنا مصريين يا عالم..إحنا عرب يا عالم.. مين يرضى إن أمه أو أخته تشوف حاجة زي دية؟؟.. إرحمنا يارب..
وعارف هتطلع ناس تقول انت بص على الفكرة.. وإحنا هنعمل زي النعام..ودة إلي جايبنا ورا..ودة بيصور واقع.. الغايه لا تبرر الوسيله .. هو أنا علشان فيه ناس وطيه أجبهم في التلفزيون بيعملوا وطينه؟؟..زي الأخت الفلانية وهيا في وضع....... أه في ظروف نفسية وأحيانا بيكون في أسباب..بس مش لدرجة إنها تتشاف.. طيب الناس إلي بتقاوح دية.. لو رضيت إن أمك أو أختك تمثل الدور دة ساعتها اتكلم لأن ساعتها هينطبق عليك "إذا لم تستحي فاصنع ما شئت".. والواد بليه يدفع فلوس علشان يخش يتفرج..ويبحلق في السينما .. "إنت يا ولا يا بليه"..وإذا بليه..ضايع في عالم المسخرة.. هيفوق إن شاء الله لما الشاشه تنطفي.. مش معنى إن في خطأ في المجتمع تقوم تزوده وتهولوة وتركزوة في عقول الناس.. مفيش حاجة تبرر السفاله وقله الأدب وربك قال حاجة وحدة: بسم الله الرحمن الرحيم
(هيثم) قاعد على القهوة مع صاحبة (تامر)..و(هيثم) كان خلاص إتجوز (منى).. وتبص على صحبنا (هيثم) منفوش الشعر..عينه منفوخة..وفي اشتباه إنه مضروب بلحة على دماغة..و(تامر) جايب ليه كوبايه لمون..وبيقله.. "خلاص يا هيثم بأه..ما توحد الله مهياش أول علقة..اشرب اللمون.." يرد (هيثم)..وخلاص وصل لمرحلة انعدام العقل وبدأ يخطرف بكلام مش مفهموم عن الجواز والمحروسة مراته::
بص يا تامر..يتوكس إلي بيقول إن الستات ينبوع الحنان والبتنجان..حنان ايه..حنان ايه إلي انت جاي تقول عليه..إلي قال كدة دة....أبسلوتلي.. انا كان مالي ومال الجواز ؟؟..ما أنا كنت عايش في بيت ابويا معزز مكرم.. ليه بس كدة؟؟!!.. دا إحنا بيطلع عين إلي خلفونا علشان نتجوز.. اتخرجت..وحوشت القرش فوق القرش.. حارم نفسي من كل حاجة..شقة وعفش وكل حاجة.. وقال ايه الوصايا العشر.. وصايا عشر مين يا عم؟؟!!..دة إحنا طول عمرنا بنعمل ليهم كل حاجة..حتى وإحنا صغيرين ..كنا نروح انا ومنى عند عم (حسن) البقال يطلع الواد (كفته البلطجي).."هات الفلوس ياد".. "اجري يا منى..إجري يا منــــىىىىىىىىىى............." و.. ديب.. طراخ.. بوم.. شوت.. تراتراتاراتاراتاراااتاراا..خلاص يا كابتن..انتا مش لاقي غيري..خلاص يا كفته بيه.. ورغم كل دة وأنا مدغدغ أرجع وأنا بقول الحمدلله انها جت فيا..وراجع متوقع بتصور الأطفال إني البطل المغوار إلي حماها من الأطفال الأشرار الوحشين..ونافخ صدري راجع متلهف على الهتافات..ومتخيل وهيا بتجري عليا زعلانه عليا..وبتقلي اوة ماي جاد..انت الهيرو بتاعي..ألاقيها.."جبت العسلية؟؟!!!"..وأسكت واقول "ناقصات عقل ودين.." (كنت صغير وعارف ناقصات عقل ودين متسألش إزاي..) وأروح تاني علشان أجيب العسليه ..وربنا يستر.. ليه بس بيعملوا فينا كدة؟؟؟؟!!!.. وبعد ما تحس إنها طولت في الجواز..وعايزة تتجوز..مهو كل راجل قدامه 6 بنات دلوقتي..فيهم المتجوزات..وفي رجاله مش لقيه حق الجواز..يعني ممكن تقول إن كل راجل مش متجوز قدامه 4 مش متجوزات.. تقعد تلف وتدور وتتمحلس لحد ما تجر رجلك وتحسسك إنك (ليوناردو ديكابريوا)..انت الراجل الكبااااار..وتشتغل بالعنجليزي ..والرقة تنزل عليها معرفش منين..وفجأه تتحول أبويا إلى بابي وأما - ياريت ماما - إلى مامي بمعجزة ما.. (مامي يا بنت تفيدة دة إنتي كنتي بتكلي المش قبل الشاي بلبن..وكنتي بتقولي سندوتش بالضآلين..) وتلاقيها فجأه كل شوية ترن..ومسجات حب وغرام .. و "يا ملقح جوة في قلبي وأنا قلبي مش متين..من حبك جالي سكر إديني أنسولين".. المهم إنك بتلاقي نفسك is ريالتك على صدرك ..وبتسمع (إليسا) كل يوم وتغني - لو تعرفوة لو يوم شفتوة كلموة -..وأنت يا عيني قلبك هيتقطع من الرومانسيه ..وتغلط غلطة عمرك .. وجاي وأنت عندك 27 سنه جارر والدك إلي عمال يضرب أخماس في أساداس وبيقول.."أنا ربيتك على كدة يا هيثم..أنا مش ربيتك على إن الجواز فاقه..مش مكفيك إلي بتشوفه من أمك الله يولع فيها..رفعت إيدي ودعيت عليك يا هيثم يا ابن زينب فتحي.." ورغم كدة تعاند وتقول..انا راجل..بابا دة عايش في زمن قديم..أنا رايح أخطب(أنجلينا جولي) تنتظرني على الابواب..أنا جاي..يا حبيبتي..أنا (براد بيت) الحته..وسع يا جدع.. وتكون لابس البدله إلى واخدها من (سنجة) المكوجي ساعة كدة تقضي بيها المشوار..وواخد علبه شوكالاته..وواخد أبوك الغلبان معاك..وتدق الجرس.. و(أم منى) "أهلا أهلا اتفضلوا"..وتخش وإستقبال إيه..وإشي شربات ..وإشي بيتيفور من إيد(منى)إنما ايه..و(منى) أصلا بلا خيبة..أخرها تغسل كوبايه.. وانت خلاص هتموت..(إمتى أتجوز).. وتخش المحروسة بسلامتها لابسه إلي على الحبل كلوة.. وجايبه الحبل كمان..وياه على الأحمريكا والأصفريكا..وأنت عمـــــ..حااااااااااااااااااااسب.. -"معلش أنا آسف مكنتش أقصد.." وأبوك بأه :"مش تخلي بالك يا ابني وانت بتمسك الكوبايه..أديها اتكسرت.." -"ما تسيبه يا (أبو هيثم) البيت بيتك متخفش هيدفع تمنــــ..أه قصدي البيت بيتك....هي هي هي هي هيأ ..هع هع هع.." (أه يا وليه ) زيارتين كمان .. "وجبت حق الشبكة..حق المهر..الشبكة دية مش عجباني..احنا هننزل نجيب العفش امتى..ايه ده؟ ..ايه دة؟..دة بلدتشي أوي.." (بلدي إيه يا وليه..دة إنتي متجوزة على حصيرة بالتقسيط ) وطبعا حبيبه القلب..ملاك طاهر..ملاك بريء.."معلش هيا مامي كدة..معلش انتا هتتجوزني ولا مامي" .. وتصبر لحد متلاقي جيوبك مخرومة خالص.. وهيا شغاله "مشربش الأزوزة أشرب كنز أنا"..وتجيب الكنز..ويا ريته طامر فيها.. ووتتنيل وتتهبب .. وبعدين.. تامر يقلوة ..بعدين إيه يا هيثم؟؟
