أصدقائي في عالم التدوينبعدت عنكم فتره طويله
لكن غصب عني يعلم الله كم افتقدكم وافتقد وجودي بينكم
على هذه الصفحات نجتمع في مناسبات عده سعيده وفيه ايضا نتشارك الهموم والمواقف الصعبه
وهكذا الحياه بعض الاوقات السعيده التي تمر سريعا لا نكاد نلحظها
وكثير من الاوقات الصعبه التي تعلم الانسان الصبر و تكسبه خبره في مواجهه الحياه
لست اريد تقديم نصائح و سطور من الوعظ.. فلم اتحول فجاه لحكيم او رجل دين
ولكن هي مجرد اشاره لمواقف انسانيه لمستها بنفسي كان لها اكبر الاثرداخلي واحببت ان اشاركها معكم.
الحقيقه ليس أفضل من الله معرفة بالانسان فهو الذي خلقنا وقال عنا
{وَإِذَا أَنْعَمْنَا عَلَى الإِنسَانِ أَعْرَضَ وَنَأَى بِجَانِبِهِ وَإِذَا مَسَّهُ الشَّرُّ كَانَ يَؤُوساً }الإسراء83
وكثيرا ما وجدت هذه الايه بالفعل تنطبق علينا كبشر
كلما انعم الله على الانسان بنعم اعتبرها الانسان حق مكتسب وسعى باستعجاله البشري لغيرها وغيرها
ولا يكف الانسان يطلب ويطلب وكما يقال لا يملؤ عينه الا التراب
فاذا ما حبس الله عنه نعمه من هذه النعم .. اسودت الدنيا في وجهه وشعر ان الدنيا ولت ظهرها عنه
وساعتها يلجا الى الخالق يسأله من فضله ويتذلل في الدعاء ويتذكر ما مضى ويخشع قلبه راجيا كشف الغمه.
مهم جدا الانسان يكون راضي عن حاله باقتناع
فعلا يكون متاكد ان اي وضع هو فيه اكيد فيه خير
حتى لو الانسان فيها مش شايف دا او مش قادر يفهمه
لكن دايما حكمه ربنا بتكون اكبر مننا
واذا حصل للانسان ابتلاء يقول الحمد لله ان الابتلاء مش اكبر من كده
الحمد لله الابتلاء دا ممكن منع عني مصيبه اكبر مكنتش اعرفها
الحمد لله اني مسلم ولو صبرت واحتسبت ربنا بالابتلاء دا هايرفع عني سيئات كتير عملتها وما اكتر منها
الحمد لله الابتلاء دا عرفني ان ربنا مش سايبني لوحدي لا دا جنبي
ربنا وقت الابتلاء بيبعت للانسان بدل الاخ الشقيق عشره
وبيسهل ليك حاجات لما كنت بصحتك يمكن مكنتش بتخلص ولا بتعرف تعملها
وبيخليك تشوف احوال ناس حواليك تتاكد انك احسن من حالهم
وكمان بتعرف انك كنت في نعم كتير قبل كده عشان لما ربنا يفك عنك تعرف قد ايه انت كنت في وضع ممتاز.
انا شخصيا لما تعبت كان سهل ان أيأس و اتعب نفسيا
يعني المستشفيات حالها مش خافي على حد
و الاجراءات مش بتخلص
وحتى العلاج كتير بيبقه مش موجود لا في المستشفى ولا بره
وطبيعي تقلق من مستقبلك في الشغل
واكيد تقلق اكتر على مشاريعك للمستقبل
وغيرها من حاجات كتير ممكن الواحد يفكر فيها ويخليها ضغوط زياده عليه وعلى وضعه الصعب
بس لقيت ان اصلا ميصحش ان الواحد يفكر كده
لان لما يجي معاد الزياره والاقي اللي قدامي مجالوش حد وانا بتحايل على الناس متجيش عشان الزياره لتلاته بس يبقه دي نعمه
ولان لما يجي الليل والحمد لله قادر انام واللي جنبي تعبان وقدامه ليله طويله مش هينام فيها يبقه دي نعمه
ولما اكون عارف ان شويه راحه وعلاج وهابقه كويس واللي جنبي جه المستشفى لسه مش عارف هو تعبان من ايه ولا الدكاتره عارفين يبقه دي نعمه
ولما جمال شاب عنده 17 سنه يجي المستشفى تعبان ويتعمله اشعات وتحاليل وبدل الدكتور عشره يكشفوا عليه وكل حاجه تطلع سليمه
مع ان الواد تعبان جدا لا بينام ولا بياكل وحالته صعبه...
وفي الاخر في خامس يوم يموت قدامي وهو حتى متعالجش لان اساسا متعرفش هو تعبان من ايه يبقه الواحد لازم يقول الحمد لله
الحمد لله بجد لان اي حاجه غيرها الواحد حقيقي هايبقه مكسوف من ربنا
هيقول لربنا ايه انا تعبان .. مهو مش انا لوحدي
طب انا حالي صعب .. برضه مش لوحدي
طب اصل انا خايف من المستقبل.. ما قدامك شباب بيموت اصلا وانت لسه ربنا عاطيلك الفرصه تعيش وتكمل
حقيقي اللي يشوف بلاوي الناس تهون عليه بلوته
بس مش مجرد هوان نفسي لا دا حسبه بالعقل
ومش معنى كده الواحد يزهد في الدنيا ويعيش راهب .. ومخبيش عليكم بعد ما جمال اتوفى غصب عني لقتني بفكر بالشكل دا
لان كنت ارتبط بيه جامد واول مره اشوف حد بيموت قدامي
لكن ربنا مقلش كده
ربنا كل مده بيخليك تمر بموقف صعب عشان تقوى وتقدر تكمل
مش عشان تقف محلك سر وترجع لورا
بس المهم تكمل صح
وتعرف ان طول ما ربنا سايب انفاسك شغاله في صدرك يبقه دي هبه من الله
ونعمه لازم تستغلها طول ما هيه موجوده.
مطلوب مننا نشتغل وننجح ونتبسط ونبقه اغنيا ونفرح في الدنيا ونبقه احسن ناس .. بس بالشكل اللي يرضي ربنا و بالشكل اللي نتمتع بيه وناخد ثواب في نفس الوقت.
ومنجيش عند اول حاجه صعبه ونقول ليه يارب عملت فينا كده.لان كله خير حتى لو مش قادرين نشوف كده.
انا طولت عليكم بس انتو كلكم واحشني جدا جدا والله
وفي النهايه بدعيلكم جميعا ان ربنا يوفقكم في حياتكم ويجلعها كلها خير عليكم
ويحقق ليكم ما تتمننوا وينعم عليكم بالصحه و وقوة الايمان
ويعينكم جميعا على فعل الخير
لان فعل الخير دا نفحه من رحمه ربنا على بني البشر.
وبدعي في الاخر لمصر ربنا يزيح الغمه عنها لان المصريين خلاص شبعوا عز ورخاء ومحتاجين شويه تغيير.
