طـيري ، والـسما بلادك

السلام عليكم..
رشا تقول إني هالفترة متغيرة جداً لاني صرت أرد على التلفون على طول
لدرجة إني أول ما أقول : ألو ، أحس رشا تتنح شوي ، بعدين فكرت حسيت كلامها صدق يعني ألواني في الصور لاحظت إنها متغيرة خخخخخخ ألوان بلوقي مدري كيف تجرأت على لون فاتح ومشرق كذا ؟ بعدين دايمن عروب تقول لي أشياء انه مب إنتي مثلا ماحسيتك بهالشيء هل هي ياترى فترة جديدة في حياة نوال :]؟ <—لايكثر .
والحين اللي أكد لي التغير إني قاعدة أنزل طريقة حلى …..!! ستين علامة تعجب ماقد تخيلت أبد إني بتكلم في شؤون المطبخ وأنافس photon :].. ببساطة لأني من عداد الفاشلين والفاشلات فيه.
عروب لاتناظرين وتقولين : طه طه طه ! اعترفي ان نص طبخاتك اللي تسوينها في الغدا مني ؟

أعزائي القراء أقدم لكم الحلا الذي شكله هكذا:

ويقال والله أعلم إنو اسمه السنمون الكذّاب، مع إني ما احب الكذب بس الظروف..

المقادير :

* كب كيك cup cake لوزين.. لحد يجيب شيء غير لوزين رجاءن ( يكون جواته تشاكلت او توفي حسب الرغبة ) .

مقادير الخلطة الأولى:
* ملعقة كبيرة حليب بودرة.
* ملعقة كبيرة قرفة.
* ملعقة كبيرة نسكافيه.
* نص ملعقة كبيرة سكر.
* بيالة موية.
* نص بيالة زيت.
* بيضة واحدة.

مقادير الخلطة الثانية:
* 6 حبات جبن كيري.
* علبة حليب نستلى كبير.

#تخلطون مقادير الخلطة الأولى في الخلاط بعدين تنحط في قدر على نار هادئة بعدين نحرك نحرك لمن يصير الخليط ثخين شوي بس أهم شيء مايتكتل لو يتكتل ما اعرفكم والوجه من الوجه أبيض بس أختي تقول لو تكتل خل يحركونه بملعقة البيض اللي صايرة كذا كذا كذا أسلاك .
بعدين نصب بمقدار ملعقة كبيرة تقريبا على كل كب كيك من هالخليط..، بعين ندخلهم الفرن عشان تنشف الخلطة وتتشربها الكيكة شوي.

نطلع الكب كيكات من الفرن ونضيف لكل كيكة مقدار ملعقة كبيرة من الخليط الثاني بعد خلطة في الخلاط برضو ..
بعدين نرجع ندخلها الفرن مرة ثانية لمدة خمس دقائق .. بعد مانطلعها من الفرن نحط فوقها لوز مبشور محمص ( يتحمص بقليل من الزيت على النار ) + عين الجمل ( من أي محمصة ).
بعدين نحط هيرشي شيرا ( تشاكلت + توفي ) .. أخر شيء ندخلها الثلاجة بعدين تقدم مع القهوة ..

مجرد هيئة إضافية في البلد وظيفتها تتلخص بالضبط في كلمتين : زي قلتها.
كل دول العالم لو فيه عواصف رملية أو اي أجواء سيئة تخبر المواطنين قبل باتخاذ الاحتياطات وتوقيف الدوامات حفاظا على سلامتهم..
بس احنا مب لازم ناخذ احتياطاتنا بالطقاق اللي يطقنا كشعب.. يمكن لو نموت نخفف على ميزانية الدولة .. الاطفال احتجزوا بالمدارس الا اذا كانت المديرة والمدير تصرفوا بسرعة وطلعوهم مع اني للحين ماسمعت شيء زي كذا..
اختي بالمدرسة تقول 29 حالة اغماء بس بين البنات ناس من الروعة وناس من الكتمة.. وهيئة الارصاد وحماية البيئة قاعدين يصورون مع بعض
ابي افهم بس ليش التهميش لنا كـ أرواح حية في وطن نعيش فيه ؟
من حقنا نعرف احوال الطقس ومن حقنا نمتنع عن الدوام حفاظا على حياتنا وحياة الآخرين .. مايحتاج اقول حجم الحوادث اللي صارت ولا حجم الخوف اللي عشناه عشان يوصلون اهلنا سالمين بس ..
المبالغ المالية اللي تنصرف في هيئات زي كذا والأجهزة الحديثة الي تستورد مو موجودة لهذا الغرض ؟
ياوطني سؤال: احنا نستحق منك هذا ؟

* استغفر الله استغفر الله استغفر الله.. يارب ابعد عنا هالجو يارب حوله لمطر
يارب احنا مذنبين يارب سامحنا واغفر لنا وارحمنا ..

” - أحبك ونصف، أحبك وثلاثة أرباع، أحبك الا خمس، أنا 24 أحبك. أحبك صباح السبت، أحبك ظهر الاثنين، أحبك مساء الخميس، أنا جمعةً أحبك. أحبك في اليوم الثاني، أحبك في الخامس عشر، أنا 29 أو 30 أحبك. أحبك طفولة، أحبك مراهقة. أحبك شيخوخة. أنا عُمراً أحبك “

النص لـ : *

بيجي يوم يا روحي وبتعرفين ياجود إنك أغلى شيء بحياتي.. إنك أجمل طفلة و أجمل شيء في قلبي ، بيجي يوم بتكبرين ان شاء الله وتعرفين إني حبيتك أكثر من بنتي اللي أتخيلها..بيجي يوم وتصيرين كبيرة وتعرفين إنك الهوا اللي أتنفسه كل ويك إند.. بيجي يوم إن شاء الله وتقرين هالكلام وتصيرين تفهمينه.. وتفهمين مكانك بقلبي وبقلب أمك وبقلب جدتك وجدكوحتى خالك الوحيد اللي يشوفك زي بنته حصوص الصغيرة ويمكن أكثر والله.. أبي تكبرين وتعرفين إنو إنتي كنتي الوحيدة اللي تخليني أضحك حتى لو الدنيا فيني ضايقة.
أحبك كل لحظة معاك وكل كلمة تكون معاك شيء يجنن.. أحس بشيء غير مره وأنا أحظنك كل ربع ساعة..
تدرين ياعمري ايش اللي أحبه أكثر شيء فيك ؟ إنو ما تتمللين لمن أحظنك.. تظلين تحظنيني بنفس القدر اللي أحبك فيه..أحبك وأحب غرورك لمن أقولك مين عنده أحسن عيون؟ تقولين جود وبضحكة غرور.. ولمن اقولك مين عنده أحلى فم؟ بنفس النظرة والضحكة تقولين جود.. تبين الصدق؟ أنا أشوفك صادقة مره.. إنتي أحلى عيون وأحلى فم واحلى فم وأحلى روح وأحى بنت وأحلى كل شيء.. يكفيني أراقبك وأشوفك تلعبين وتسولفين.. وتغيرين ملابس عروساتك.. هالمواقف بس تكفيني أعيش بابتسامة لـ 5 سنين قدام..
جود ياروح خالتك إنتي جوا قلبي والله. يارب تخليك لنا وتحفظك ولا تورينا فيك مكروه..

* ماشاء الله تبارك الله / canon EOS 400D

استغرقت كثير من الوقت وأكثر من اللازم عشان أكتب عن أروع فلم شفته.. مدري ليه هذا الوقت الطويل اللي خذاه مني عشان أجزم واكتب عن رايي فيه يمكن لانه مو أي فلم ويمكن لأن الكلام عنه يحتاج ناقد خبير جدا عشان يعطيه حقه.. ما استغرب أبد لو أفضل فلم وعلى قائمة التوب 250 في الـ imdb ما استغرب لو دخلت وعلى طول عطيته تقييم 10/10 .. هالنوع من الأفلام نادر جدا.. اللي يحكي عن حاجة خاصة بس تقدر تربطها بكل شيء بحياتك او الحياة بشكل عام. الفلم دراما عن السجون والهرب بس ببساطة وباختصار تقدر تشوف الفلم على حياتك بدل السجن  :(  ..

* قد أحد فكر لمن واحد ينسجن مدة طويلة ، طويلة كثير و صار السجن حياته الأساسية كيف يكون شعوره بعد مايطلق سراحه ؟ تخيل الحياة الطويلة اللي تعيشها بالسجن فوق الـ 10 سنوات .. روتين جديد نظام جديد ألم جديد .. حياة مختلفة كليا.. حتى انهم بدوا يتعودونها او بدوا يحبونها.. اخترعوا لهم طرق وفكروا لهم بحيل تخفف عنهم صرامة السجن ..لدرجة إنهم لمن يطلعون ماعاد يعرفون يتعاملون مع الوقع والحياة برا.والأكثر إيلاماً لمن تنسجن وإنت مظلوم والسجن مؤبد.. يعني السجن صار حياة دائمة مو مؤقته..

هذا بالضبط اللي يدور حوله الفلم.. Thw Shawshank Redemption

الفلم اللي أصنفه أعظم فلم شفته ويمكن بشوفه في تاريخ سينما هوليوود.. شوشانك من نوعية الأفلام اللي من لمن يبدأ ولحد ماينتهي وانت تتألم مع الأبطال ومع الاحداث وحتى مع الكومبارس.. :(  تفكر في كل مشهد وكل كلمة ، تتابع كل نظرة وكل صمت .. تبدا تتعمق في هدوء Andy في مشيته .. يا الله ! شقد هادئ هالرجال !
Andy دخل السجن ظلماً لأنه كان متهم بقتل زوجته وعشيقها.. اندي رجل محترم مدير لبنك حياته كانت راقية فجأة لقى نفسه بالسجن.. كان صامد كوّن له اعز صداقة ممكن يشهدها الانسان مع ريد.. ريد الانسان اللي يقدر يجيب اي حاجة برا السجن .. وهالميزة اللي عند ريد كانت مفتاح صداقتهم.. اندي غير كثيييييير في السجن بحكم ثقافته العالية.. تخيل حجم السعادة اللي ممكن تحيط فيك لمن تكون يد مساهمة في تغيير شيء للأفضل فمابالك لو كان هالتغيير في مكان يحتاجه أكثر من غيره.

غير كذا من القصة مابي أقول لان اللي مايشوف الفلم يعتبر نفسه ما شاف فن حقيقي ولا ملحمة انسانية رائعة.. ويعد نفسه ان مشاهداته السينمائية ما اكتملت الا لمن يشوف هالفلم..

الفلم متكامل فنيا وفكريا وروائيا.. الأداء كان اكثر من رائع .. بالذات بالذات نقطة الأداء هذي أتركها تعيشونها مع كل حركة للمثلين..
الكاميرا وزواياها كانت فوق الممتازة .. طريقة السرد .. واو واااو وااااو .. كان الفلم ممكن يسير بطريقة خطية .. أقصد ممكن تجي الاحداث متتابعة.. لكن ذكاء المؤلف ترك بعض الغموض في الموضوع اللي لمن تكتشفه تحس انك بتبكي بس على ايش ما ادري ؟ فريمان وطريقة روايته للقصة ما اقدر اقول عنها الا انها الطريقة الامثل لروي القصة .. تستمتع بكل حواسك لكلامه وتبتسم على تعليقاته الانسانية الحكيمة .. تبدا تصدق انك مسجون وعايش معاهم وعارف روتينهم .. تصير عايش بالجو فعلا .. هذا هو الفن انك تعيش شيء ماعشته لان الرسالة وصلتك بسرعة البرق ..

* تعريجهم وتلميحهم للرواية “ذا مونت اوف مونتي كريستو” واللي تحولت لفلم في الألفينات كان ذكي جدا.. خصوصا للي كان يعرف الرواية. يمكن أكتب عن هالفلم برضو
* الساوند تراك معبر كثير كثير ..
* أعتقد ان قصة الصداقة بين ريد واندي كانت من اجمل القصص اللي شفتها سينمائيا.. آخر الفلم بكيت والله لمن قلت بس، شفت الفلم اكثر من 3 مرات ومع كذا كل ماشفته احس بنفس الشعور وانتظر الاحداث واتحمس وكأني اول مره أشوفه. صداقتهم كانت شاهد على تاريخ الانسانية انه مهما كنا سيئين او كويسين يظل فينا بذرة انسانية تكبر مع القيم والمبادئ وتتحول لحاجة اسطورية تحدث فارق كبيييير في مجرى حياتنا..
* حياة اللي يطلعون من السجن حياة مره صعبة.. كانت اسهل عليهم جوا السجن لأانهم يعرفون وضعهم ع الأقل.. بس لمن يطلعون برا .. للحياة الحقيقة .. لمن الكل يرفضهم .. هنا فعلا يبدون يعيشون فترة صعبة.. ويفكرون بالانتحار .. واللي يفكر يسوي جريمة عشان يرجع السجن مره ثانية .. وهذا الشيء اللي صار بالضبط لأحد المساجين بالفلم.. اطلقوا سراحة بعد ما عاش 50 سنة !! يالله 50 سنة مو سهلة ابدا.. 50 سنة عمر وحياة بكاملها.. وتخيل تطلع للحياة بعد ما عجزت وصرت مسن وصرت ما تنفع لشيء.. صار يحس ان الحياة الكبيرة هذي واللي بدون رقيب وبدون روتين هي السجن بحد ذاته.. آخرتها ايش صار ؟ آخرتها انتحر .. ايه انتحر ماقدر يتناسب مع الحياة.. لا الحياة تقدره ولا هو يقدرها.. كان كل اللي عليه انه يكتب كلمتين X was here .. انو فلان كان هنا.. وبعدها مايتطلب الامر سوا حبل ينربط وكرسي عشان تتخلص من الحياة اللي مابينكم اي تفاهم ..

* كان ريد يقول عشان تعيش في السجن لازم تشغل بالك بأي شيء.. هذي الطريقة ذكية عشان تتغلب على كل مشاكلك مو بس السجن .. اشغل نفسك وعلى قد ما تشغل نفسك راح تبعد دماغك عن التفكير اللي يخلي منك انسان سلبي ..

* آندي انسان ذكي جدا.. لماح لأقصى درجة.. ماينسى الحوارات الصغيرة خصوصا لمن جا مأمور السجن وقال له ان في الانجيل خلاصك.. وكان يقول لهم ان الدين اهم شيء وهو مختلس ونصاب .. إيدي علمه الدرس كويس لمن حط له بدل المستندات الانجيل ورسالة شكر .. آندي كان ذكي .. ذكي مره مره مره ..

* مو شرط ان اللي بالسجن أسوا الناس او على اقل تقدير اسوأ من اللي برا.. ياما ناس عايشة حياتها ولاهي مسجونة لكنها تمارس كل انواع القيم السلبية.. ومهما كان منصبها..
ياما في السجن مظاليم .. وحتى لو ماكانوا مظاليم .. يستحقون فرصة .. كاي بشر يستحق فرصة ..

* هالفلم يقوي فيك شغلة ان مهما كانت الظروف حالكة ومهما كانت سوداء الأمل لازم لازم يظل موجود.. الامل اللي جمع بين اندي وريد وخلاهم يبنون احلامهم من جديد. لاهم يلتقون خارج السجن وفي الحياة اللي يرغبونها بالضبط ..

الفلم عن جد ملحمة، دراما انسانية ما تقتصر على السجون فقط.. لكنها مجازا تعلمنا نتغلب على منطقة سجوننا الخاصة. لمن تخلصه تقعد ببساطة ساعتين تفكر وتنسدح وماتحس على الوقت اللي قضيته في التأمل.. بس تعرف انه ترك أثر عظيم فيك .. وتجلس تقول لنفسك ايش اعظم من كذا فلم ممكن تقدمه سينما هوليوود ؟ الفلم قصته مو حزينة او مكتئبة ويمكن بالبداية توحي كذا لكنها بالنهاية تعطيك الأمل (كله).. فيها كثير عن الحياة ، هزلية  وانسانية كثير تحكي عن التمسك بقيمتك الانسانية.. عن الصداقة اللي تتفوق على الحب بين ريد واندي.. عن كل شيء جمعهم وفرقهم و رجع جمعهم مره ثانية .. عن شحوب الوقت في السجن . عن بطئ الوقت ومروره .. كانك تراقب الدقايق والثواني على عكس الحياة.. تمشي سريعة والوقت يمر أسرع ..
الفلم من انتاج 1994 وحاصل على جوائز اوسكار ، الفلم مدته ساعتين و 16 دقيقة لكنه يبقى معاك طول العمر ..

** دايمن نتخيل او أحياناً انو حياتنا من غير بعض الأشياء او بعض الأشخاص سجن .. نبدا نكرهها حتى قبل مانعيشها.. ولمن نعيشها صدق ونتعود نحس ان وجود هذيك الحاجات او الأشخاص كان فعلا السجن … حياتنا وسعادتنا عمرها ما تعلقت على عنق أحد أو شيء.. سعادتنا معانا وين ما كان الزمان أو المكان.. السعادة شيء جوا تحسه وما تعرف مصدره..
السعادة موجودة حتى في السجن .. حتى في الحياة برا السجن .. في القارب وفي الشاطئ . في السوبر ماركت وفي البيت.. في الشارع وفي السيارة .. السعادة أصلها جواتنا ومو جوا أحد ثاني.. مصدرها من عندنا ما نستمده من أي احد .. السعادة ( أنا ) .. تعلمت هالشيء متأخر .. مره متأخر .. او خليني أقول كنت أعرفه بس ما اقتنعت فيه إلا من فترة بسيطة ..
شوفوا الفلم للسعادة وللأيام الحزينة والسعيدة .. شيلوا اثره لكل يوم تصحون فيه الصباح وتحسونكم مقيدين بالروتين، خلوا الحوارات والعلاقات اللي فيه لاجمل الأيام وأسوئها ..

كسر لحاجز الرهبة والكسل ( اللي تكون بيني وبين بلوقي
والسبب الأول طبعا هو هجري لها بسبب مشروع التخرج  ” الله ياخذه ولا يعيد ايامه ” وبسبب الفايلنز ..) قررت أسوي شكل جديد ومريح مع اني مرتاحة مع الستايل الرمادي راحة فظيعة .. بس متأملة ان هالتجديد بيخليني متواجدة أكثر وأترك الكسل ..
أحس كذا تغيرت أشياء فيني .. أحس ما عاد بكتب زي ما اكتب اول يمكن اغير طريقة كتابتي .. أشياء كانت تهمني وتشغل بالي الحين افتكيت منها الحمد لله اولا واخيرا .. أشياء كانت تضايقني الحين تخطيتها والفضل لله اولا وأخيراً .. الفهم المو صحيح للي اكتبه من قبل الناس. تغير ظروف حياتي ونفسيتي السريع .. تعقب بعضهم للي اكتبه وربطه باحداث واقعية وخيالية
وبعضهم يمشي ويطلع كلام طبعا هذي الفئة ما تستريح الا اذا طلعت كلام .. كل هالاشياء وأكثر كانت تلح علي اني أقفل البلوق.. بس يكفيني الفائدة اللي شفتها من بلوقي على نفسيتي وعلى علاقاتي ومجموعة صغيرة همها صغير ما تهمني ولو وصل صوتهم لوين ماوصل .. بالعكس الحين عندي دافع اكثر تجاه بلوقي .. عندي اتجاه أهم .. عندي أفكار أكبر وأنضج .. عندي أصدقاء أحكي عنهم اكثر .. عندي مشاريع نفسي انفذها ببلوقي مفيدة للجميع .. احاول اركز على اللي عندي من افكار ومشاريع ممكن تفيد ( اي ) أحد يمر هنا .. هذا السبب الوحيد اللي مخليني استمر .. وأسباب ثانية شخصية ..
اقدر أقول انه من تاريخ 22/1/2009 صرت انسانة ثانية .. مره شخص اخر ..
مرتاحة نفسيا ولا يعني ان كل مشاكلي انحلت .. بالعكس فيه مشاكل ماتزال عالقة .. لكن المشكلة الاكبر في حياتي وفي نفسيتي ربي فكني منها ومن دون ممهدات ولا سابق انذار .. ربي احاطني بسكينته وحل المشكلة من عنده وأرضاني الحمد لله .. من وقتها وانا احس خطواتي خفيفة .. امشي زي الريشة .. أنام مرتاحة .. آكل مرتاحة .. اطلع مرتاحة .. يعني اعيش شعور ماعشته من 5 سنوات بالضبط ..
الحمد لله يارب .. وش احسن من كذا ؟

صرت اقدر اقول عن نفسي الحين انو انا Nawal 2.1
وهذي النسخة افضل بكثير من نسختي السابقة Nawal 2.0
أستعد لتغييرات كثيرة تبدا من اليوم لحد 100 يوم قدام تقريبا ..
متفائلة بالجاي ويمكن اول مره اتفائل.. على قولة نور اني شخص متشائم جدا .. الله يستر من هالتفائل <– اكبر دليل على التشائم
عندي نية انضج واكبر واوعى للتغير في نفسي وفي من حولي ..
باختصار .. أحس إني ( حرة ) .. ربي ( حررني )

بس شوي استعيد انفاسي واقطع وعودي لهالمكان ولنفسي ولكم وأرجع..

هابي نيو ستايل

22/1/2009

the day where I became FREE
.