من يومين تقريباً أصر عليّ الوالد ياخذني وياه الخُبر بالسعودية وبعد إلحاح وافقت
بشرط نرجع بنفس اليوم وتم الاتفــاق على خيــر لأن عندي دوام بعــد لازم أرجع
وصراحة ما اعتبرت هذي سفرة, السفر كان بسيّارة طبعاً الله
لا يوريكم كل شوي طالع لنا بعير بالطريج ..
آنا صراحة ما خليت روحي أخذت معاي وسائل الترفيه والراحة كلها
أول شـــــي مخدتــــي العزيــــزة ولحافــــي العزيـــز فارشتهــم ورى
متسلفة هالـ i mate أشبك بالطريج
غير الككاو وغلاّية الماي والنسكافيه وهالسوالف ..
وصلنا هناك بالسلامة وكان هدف السفرة نييب شغلــة من واحد ونيي على طــول
لي هنيه كل شي تمام ,, وبطريج الردة لما سوينا أوراق الخـروج من الخبر مشينــا
بمسافة 4 كيلوا متر يمكــن؟ أو أكثر شـــوي .. المهـــم .. وإحنا ماشيــن ولا دووووف
انبط تاير السيّـارة بسبب الشـــارع كان فيه أشياء حـــادة ع الأرض .. وعلى ما نــزل
أبوي يسوي بنشر آنا قاعدة أتحلطم بالسيّارة .. شوي ولا توقف سيّـــارة نزلوا منها
اثنين استانست قلت يالله زين خل يساعدون أبوي ونمشي بسرعة أحاتـي الدوام
اهما نزلوا , آنــــا أشوف أشيــــاء غريبــــة اش هاللي نازليـــن ترنح يمين ويســـار؟
طلعوا سكـــارى !! وسيارتنــــا ما تمشـــي ,, وآنا وأبــــوي بس .. وهذول رياليـــن ,
آنا لا تعلييييق منصدمة أبي أتحجى ما أقــدر حتى راح عن بالي أدق على النــاس
اللي كنا عندهم ع الأقل يبلغون الشرطة هناك ..
أطل من الدريشة ما أشــوف إلا أبوي يسولـــف معاهم ويضحك فجيـــت عيوني مت
من الخرعة أقول هذول شسووا بأبوي @@
آنا بهالأثناء ما خليت آيه حافظتها إلا قلتها, شكلي ختمت القرآن ذاك اليوم ,
واسمع ســــوالف غريبــــة أبوي يقولهــــم روحوا صبوا بانزين مادري شنــو !؟
وعطاهم فلوس وجذية شوي ولا سيارة ثانية ياية ولا أبوي يقولهم شرطة شرطة !
اركبوا سيارتهم مثل الميانين وانحاشوا صدقوا إن شرطة ..
عاد يو السيارة الثانية طلعوا عايلة الحمدلله صلحوا ويانا السيــارة والحمدلله ردينــا
الكويت بالسلامة أمس ..
سألت أبوي قلته شنو كنت تسولف ويا السكارى؟
جان يقول: كنت أسولف مثلهم أقولهم خوش بطل شسمة لوول عشان
لا يسوولنا شي يعني من ربعهم , بعدين أوهمهم قالهم سيارتكم جنها مافيها
بانزين روحوا صبوا قبل لا توقف , وبعد مرور السيـارة الثانية ولله الحمد انحاشــوا
قالهم أبوي شرطة يصيدونكم ..
والله تعلمت شي يديد إن طحت بشي الله لا يقول أجاري المجرم إلى النهاية
طبعــــاً هــــذي آخـر سفــــرة بسيارة طلعــت قبّســــة على قولـــــة أبــــوي ,
كانت صج ليله لا تنسى,, والحمدلله على سلامتي .
