عملنا كام النهرده

الحكومة والشعب عنوان الفيلم اللى احنا عايشين فيه بتقوم فيه الحكومة بدور صاحب مجموعة شركات وناس كتير شغالين عندهم ومش لاقيين شغل غيره (معرفوش يسافروا ويسيبوا البلد) وطبعاً صاحب الشركات أهم حاجة عنده المكاسب فتلاقيه اخر النهار قاعد يشوف الحصيلة خد يا بتاع الصحة ايه الاخبار عملنا كام النهرده يا باشا معلش عملنا النهردة ألف فرطوش ليه هو احنا بنبيع سبح احنا لازم نكسب اكتر اصل يا كبير ناس كتير بتغسل كلى وناس كتير عندها الكبد وبتعمل تحاليل انت شغال معانا بقالك قد ايه يعنى بتاع تلات سنين شكلك مش هتعمر بص يابنى انا عايزك تغلى تمن الجلسة بتاع الغسيل اه احنا تجار والبيزنس مفيهوش عواطف وعايزك كمان تزود تمن المحاليل اللى بيتنيلوا يسفوها هو احنا هنصرف عليهم وانت يابنى يا بتاع البترول عملنا كام بالصلاة ع النبى النهرده يعنى بتاع خمس تلاف فرطوش ليه هو انت فاكرنى فاتحها سبيل لأ يا باشا بس انت عارف انى احنا بندى الغاز بتراب الفلوس للى بالى بالك فبنخسر كتير طيب بص يابتاع المواصلات ايه اخبار الشوارع يا باشا الدنيا زحمة قوى بس تمام تاهت ولقيناها بص يابنى يا بتاع البترول زود تمن البنزين اللى العربيات دى بتشتريه وهتبقى عنب وانت يا بتاع التموين صرفنا كام عليهم الشهر ده يعنى بتاع الف ومتيت فرطوش ليه هو احنا مش هنكسب كل اللى هنكسبة هنديه للى شغاين عندنا يا باشا دول مش عايزين يشتغلوا وعاملين لى مشاكل من امته وهما بيعملوا مشاكل دانا مربيهم ع الذل طيب انا عايزك تزودهم بدل ما بنصرف عليهم الف ومتين خليهم وخمسمية ربنا يخليك يا كبير يا بو قلب ابيض خد يا بتاع الضرايب هو احنا لمينا كام الشهرده م العمال يعنى بتاع سبعميت فرطوش ليه هو احنا هنصرف عليهم اكتر م اللى بنلموا منهم انا عايزك تزود الضرايب بس يا باشا احنا زودنا الضرايب الشهر اللى فات و لمينا كل الضرايب ومبقيش غير اصحابنا بتوع الشركات الكبيرة لأ لأ ملكش دعوة بدول أنا عايزك تلم م الشعب ضرايب جديدة اعمل ضريبة جوع وضريبة فقر وضريبة مرض اه امال ايه عايزين ناكل عيش وانت يا بتاع السجون عايزك تلم كل اللى عايزين يخلوا الناس متشتغلش وتعمل مشاكل وعايزك تاخد فلوسهم بحجة تمويل ارهاب غسيل اموال اى حاجه دى شغلتك تمام ياباشا قبل ماتقوم من هنا هيكون كل اللى اشترك واللى فكر ورا الشمس هو لسه فيه حته فاضيه ورا الشمس!!!!!

السادس من أبريل

السادس من أبريل يوم من الأيام التاريخية فى تاريخ مصر بصراحة الواحد متخيلش التفاعل الشعبى الكبير ده مع الحدث لقينا ناس كتير اتشجعت وعملت حاجه فيه ناس كتير مرحوش الشغل لدرجة ان الشوارع فاضية ومفيش زحمة كعادة كل يوم حد يمكن المرادى مكنش فيه ترتيب كويس من حيث الأهداف يعنى مثلا هل الهدف هو إقالة الحكومة برئاسة نظيف ولا الهدف محاولة الضغط على الحكومة لضبط الأسعار أم لإعلام الحكومة أن فيه ناس ممكن تعمل حاجه وان فيه حاجه إسمها شعب كذلك لم يكن هناك تحديد للحدث هل هو مظاهرة أم إضراب عام أم ماذا ولكن أياً ما كان فقد شهدت مصر حدثاً تاريخياً أعتقد أنه هيغير كتير قوى

ماما سوزان

منذ حوالى سنتين فى رمضان كنت رايح 6 اكتوبر وشاورت لعربية يابانى وقلتلها اكتوبر قالى اركب فركبت ومشينا والراجل مشى من طريق غريب ولما اخويا اللى كان معايا بيقولى الطريق ده غلط قلتله يمكن طريق مختصر لغاية ما واحنا ماشيين الكاوتش بتاع العربية فرقع فنزلنا فى الصحرا وقعدنا نلعب سيجا ونكتب ذكرياتنا فى الصحرا لغاية ما السواق يركب الإستبن فواحد عجوز قالنا انتوا رايحين فين فى الفيوم قلناله لا دا احنا رايحين اكتوبر انت راكب غلط ولا ايه يا عم الحج الراجل ضحك وقال دا العربيه رايحه الفيوم ياحلاوة ورحنا اتاكدنا من واحد تانى لقيناها رايحة الفيوم فعلاً وطبعا مسكوا فينا عشان نفطر معاهم بالذات الراجل العجوز لكن احنا شكرناهم ورحنا الناحيه التانيه ووقفنا فى الصحرا اكتر من نص ساعه لبعد المغرب ومحدش وقفلنا لغاية ما جت عربيه نص نقل محمله خضار على اخرها ووقفت على بعد متين متر فجرينا عليها وقلنا اى حاجه احنا هنتنك دا احنا فى صحرا وجرينا لغاية ماوصلنا للعربية ولقينا السواق بيدينا كيس بلح وبعدها مشى ونحن مذهولين بس قلنا مش مهم اهى حاجه نفطر عليها لغاية ما ربنا يرزقنا بعربيه ولكن يبدو ان الرجل اعاد حساباته ووقف مرة تانى على مسافة بعيده فجرينا عليه تانى ولحسن حظنا قالنا اركبوا وفعلاً ركبت انا جنب السواق لانى كان عندى برد واخواتى اشعبطوا ورا لحد ما وصلنا اكتوبر وطبعا اخواتى كان جالهم برد عشان محدش يبقى احسن من حد ومن ساعتها وأنا نفسى اروح الفيوم لغايه ما من شهرين وبحكم شغلى كنت رايح مستشفى فى الفيوم وكان فى اليوم ده احمد نظيف رايح يفتتح مدينة جديدة فى الفيوم لقينا طبعا الشوارع مرشوشه ميه اللى الناس مش لاقيه تشربها م الرماية لغاية الفيوم وورد ويفط بالهبل يمكن تكلفة الورد واليفط والناس اللى كنست والناس اللى رشت اكبر من تكلفة المدينة ذات نفسها وطبعا وصلنا ييجى فى تلات ساعات عشان كل شويه تفتيش وبعد ما وصلنا ورحنا المستشفى فبقول للدكتور ع اللى حصل قاللى دا النهرده ولا حاجه عارف انا اسوا يوم فى حياتى يوم ما سوزان جت الفيوم كان قدامها 3 ساعات عشان توصل وفيه واحده هتولد وعايزه تروح المستشفى مرضيوش يدخلوها فقعدنا نتحايل ع الضابط ونقله دى سوزان قدامها 3 ساعات ودى وليه غلبانه وهتموت لو ما راحتش المستشفى قالنا تموت مش مهم المهم الست تيجى تلاقى الدنيا متظبطه وماتت قدامى وانا مش عارف اعملها حاجه ....................تحيا مصر

قنا وناسها الطيبين

من زمان وأنا نفسى اسافر اروح كل حتة فى مصر لحد ما خلصت دراسة واشتغلت لقيت طبيعة شغلى بتتطلب السفر لكل المحافظات يعنى فى خلال التسع شهور اللى اشتغلتهم روحت تقريبا نص محافظات مصر يعنى روحت الشرقية واسكندرية ودمياط والفيوم وسوهاج وقنا واسوان واسماعيلية والسويس والبحيرة و كفر الشيخ اخر سفرية كانت لقنا واسوان قعدت فى قنا يومين وفى اسوان يومين ركبنا قطر تسعه بالليل على اساس نوصل قنا ع الصبح عشان نشتغل وكنت انا وزميل ليا فى الشغل المهم اتعرفنا على واحد فى القطر وقعدنا نتكلم مع بعض لغاية ما وصلنا قنا وكانت الساعه حوالى ستة المهم سلمنا على صاحبنا اللى كان ف القطر وخدنا موبيلات بعض وقالنا هتفطروا معايا النهرده قلناله ان شاء الله على اساس ان الكلام ده عندنا فى القاهرة عادى واحنا كده كده مش هنشوفه تانى المهم روحنا المكان بتاع الشغل لفينا الناس لسه مجتش فرحنا قعدنا ف جامع لقينا اتنين كانوا ماشيين وهيقفلوا الجامع بس لما لقيونا قعدوا عشانا لغاية الساعة تسعه وقعدوا يتكلموا معانا وواحد منهم كان من وجة بحرى قعد يتكلم ويمدح فى قنا واهلها والتانى كان تعليقه ان اهل قنا ناس (مختصرة) ملهاش فى اللف والدوران بعد كده ودعناهم ورحنا الشغل وحطينا حاجتنا فى الشقه اللى هنقعد فيها ورحنا عشان نشتغل وكان معانا واحد مسيحى رفض ان يشرب حتى سيجارة قدامنا وكل ما حد يعزم عليه يقوله رمضان كريم بعدها لقيت احمد صاحبنا بتاع القطر بيتصل بيا عشان نفطر مع بعض قعدت اتحججله بحجج كتير فقالى بص انا كده كده هعدى عليك ع الساعه اربعه وقفل السكة ولقيته بيخبط علينا الساعه اربعه وكان معاه واحد قريبه معاه عربية عشان ياخدنا بيها المهم لبسنا ونزلنا معاه وروحنا فطرنا مش عايز اقولكم كان عاملنا ايه ع الفطار قول كان مش عامل ايه فطار يكفى سبعتاشر واحد واصناف متتعدش وترحيب غير عادى بينا فى بيتهم وبعد ما كلنا وشربنا العصير وكلنا الحلو وشربنا الشاى مشينا عشان نصلى طبعا بالعافيه صلينا اربع ركعات قيام وروحنا نمنا وصحينا تانى يوم اشتغلنا وكان شغل اليوم التانى ده فى مراكز كل ما نروح مركز يمسكوا فينا عشان نفطر معاهم وبعد ما خلصنا شغل روحنا خدنا شنطنا من الشقة بتاعنا عشان نروح اسوان وركبنا حوالى الساعه اربعة العصر والمغرب اذن علينا فى الطريق وكنا لسه فى قنا فى قرية اسمها دنفيق لقينا ناس سادين الشارع ايه ياعم فى ايه .... انزلوا افطروا مينفعش تمشوا من غير ماتكلوا ونزلنا فعلاً وكلنا وشربنا وكملنا رحلتنا لاسوان الساحرة.

الصلاة على وقتها

لو المدير اتصل بيك وقالك احنا عندنا شغل فى الصعيد والقطر هيتحرك الساعه اربعه قبل الفجر م المحطه هتقوله هتلاقينى قبل اربعه ع المحطه طب ليه مبنعملش كده مع ربنا اللى امرنا بالصلاة على وقتها حيث قال عن ابن مسعود رضي الله عنه قال: قلت: يا رسول الله، أيُّ العمل أحبُّ إلى الله تعالى؟ قال: "الصلاة على وقتها"، قلت: ثمَّ ماذا؟ قال: "برُّ الوالدين"، قلت: ثمَّ ماذا؟ قال: "الجهاد في سبيل الله وحدد لنا العقاب حيث قال "فويلٌ للمصلِّين، الذين هم عن صلاتهم ساهون" ومع ذلك بنهتم بتنفيذ كلام المدير وكلام ربنا مبنهتمش بيه.

فتح مخك حالك يمشى

لو سمحت عايز البطاقة بتاعى
انت عملتها امته
بقالى اسبوع
طب عدى كمان يومين
انا كل مرة اجى فيها تقولى تعالى كمان يومين
يلا يابنى من هنا
يمد صاحبنا يده فى جيبه ويخرج خمسة جنيهات ويضعها فى الدرج المفتوح ثم يقول
بس شوفها بس يمكن تكون تايهه هنا ولا هناك
طب شوف كده فى الرف اللى هناك ده
اه لقيتها مشكرين ياعم مرسى
موقف بيحصل كتير جدا وعادى واهى ماشية ونيجى نقول دى الحكومة فسدة ومرتشين وحرامية طب م اللى بيحصل فينا ده نتيجة انى فينا كتير زيهم بس مجاتلوش فرصة انه يبقى مرتشى كبير فبيشتغل على قده وتلاقى الناس دى زى الحرامية الكبار يقعد يتكلم عن الشرف والامانة وانه عمره مايدخل بيته قرش حرام لدرجة انك تحسبه تقى وورع يعنى فى مره لقيت واحده بتتكلم وصوتها عالى وكانت بتتكلم ع الرشاوى فقلتلها طيب اتكلمى بالراحة قالتلى يابنى أنا إيديا نضيفة واللى إيده نضيفه ميخافش بصراحه قلت ياريت كل الناس زيك كده وفيما بعد اكتشفت انى الست دى أكتر واحدة بتاخد رشاوى واللى كان مضايقها ساعتها إنى فى حوار مخدتش فيه
تعالوا نعمل حملة مع بعض لمكافحة الرشاوى كل واحد بالطريقه اللى هو شايفها

لحد امته

لما واحد بيموت بيبقى مطمنين إنه عند ربنا لانى ربنا هو العدل لكن لما واحد يعتقل ازاى هنطمن عليه وهو إيد اللى ميعرفش ربنا لحد امته هنفضل نطبق النص الاخير م الحديث الشريف "مَنْ رَأَى مِنْكُمْ مُنْكَرًا فَلْيُغَيِّرْهُ بِيَدِهِ، فَإِنْ لَمْ يَسْتَطِعْ فَبِلِسَانِهِ، فَإِنْ لَمْ يَسْتَطِعْ فَبِقَلْبِهِ، وَذَلِكَ أَضْعَفُ الْإِيمَانِ " لحد امته هنفضل نطبق أضعف الإيمان دا إذا كنا بنحس بقلبنا أساسا هنقعد نقول وأنا مالى ياعمى هو اللى إتاخد ده من بقيت أهلى لغاية متلاقيهم فى وسط أوضة نومك وبالقانون كمان وساعتها هتقول كان المفروض نعمل حاجه قبل ما يحصل كده وهتقول ليه الناس تسكت واحنا محبوسين ميعملوا أى حاجه طب أنت عملت إيه لما اللى قبلك اتحبس ........ولا حاجه