بحس و كإني عشت معاه كل الأحاسيس
فجأة بقى وكإنه هو كل الناس
كل الناس شبهه
كل ما أدخل فيلم ألاقي فقصته حاجة منه
وكل ما حد يحكيلي عن شعور حس بيه ألاقي فيه شبه منه
بقى هو كل الناس
وكل الأحداث
بحزنها و فرحها
...
اسكندرية بقالها كام يوم بلون جديد
ماهوش نهار ولا ليل
حالة ثالثة بلون مختلف
الشمس مستخبية بس بتدينا اشارات بإنها موجودة
والسما ماليانه وعمالة تغسل البلد و كانها كانت متعبية سنين و قررت تفضفض
الناس كلها مستغربة
الجو ماله؟؟
يعني حايكون ماله؟
هو ده جو اسكندرية الطبيعي و كان متحاش
متحاشلي أنا؟
لو متحاشلي أنا يبقى صح
يبقى هو فعلا موجود في كل الوشوش
وبقت كل الناس شبهه بجد
وبقت كل الاحداث فيها جزء من حكايته و حكايتي معاه
...
أنا من الناس اللي بتبكي قدام الافلام
لما بتفرج على إحساس أم بابنها بحس اني جربته معاه
ولما اتفرج على احساس الحبيبة و الصديقة و الاب و الزوجة
كله بحس اني عشته معاه
...
حتى لما دخلت فيلم فكرته عجيبة
واحد اتولد عجوز وكل مايكبر في العمر جسمه يصغر في الشكل
قضى مرحلة طفولته بجسم كهل ووش كهل
ومرحلة شبابه هي اللي اتساوى شكله مع الحقيقية
ومرحلة الشيب كان شكله مراهق
ومرحلة الكهولة كان جسمه طفل و مات في وضع الطفل الرضيع
حبيبته عاشت أجمل أيامهم في المرحلة اللي اتساوى فيها عمره مع شكله
وعانت جدا لما بقت تكبر بجسمها و عمرها أما هو كبر بعمره بس إنما جسمه صغر
وبقى مراهق وهي امرأة
وبقى طفل و هي عجوزة
ماسكة ايده و بتقراله قصص قبل النوم
...
فيلم عجيب وفكرته عجيبة جدا
كنت بتفرج عليه وبسأل نفسي
ليه حاسة بان احساسي بيها وكاني جربته معاه؟
أكيد أنا مشاعري بتختلق أحاسيس من فراغ
لإن ده احساس مستحيل
ولا هو انا بجد عشت معاه كل الاحاسيس اللي ممكن تكون موجوده في الدنيا و في قلوب كل البشر؟
مش مهم
المهم انه فقلبي
مش حاسة اني عاوزة أبعده
ولا حاسة انه بيوجعني
ولا حاسة اني ظالمة نفسي زي ما بيقوله
ياااه..
لو كانت الدنيا من غيسرؤه ده كانت حاتبقى فاضية قوي
آه بيوجعني بعده و بس
بيوجعني صورة مالية خيالي مش عارفة امد ايدي عليها و أخدها فحضني
وبس
بسيطة على فكرة ووجعها حنين.. مابيعلمش
.....
عدى فبراير كله
و انهاردة أول مارس
أكتر شهر بحبه من زمان
شهر الربيع
شهر الشمس
لينا حكايات كتير انا و هو و الشمس
وأنا هنا
واسكندرية موجودة
و الشمس أصبى من زمان
بس فينها الحكايات
وفينه هو .. كانت حاتبقى أجمل كتير الحكايات وهو وسطها
بس هي جميلة برضه و أنا بحكيهاله
ربنا يرحمه
