يا صبر ايوب

الاعلان هذا بصراحه تحفه

يفكر فيا بمعاناتي مع بطء الانترنت

و خصوصا لما نبي نحمل فايل و كانا برنامج هداكا عاد وين راحت ليل

لا و اللي زايد الطين بله انه مؤخرا بدا يفصل فتخيلو نستنى في فايل يتحمل و هوووووب راح الفايل و راحت معاه امالي

يعني يااااااااااااصبر ايوب

الاسبوع اللي فات

كان عندي برنامج ضروري حجمه 38MB و لازم انحمله

صارت فيا الهوايل قعدت الاسبوع كله و انا نحاول

قلت يا بنت تعالي على نفسك و مش لازمك النوم بالك القصه قصة زحمة اتصالات و الوضع يكون احسن في نص الليل

هو صحيح اسرع بس نفس الوضع يفصل كل شويه

اتصلت بليبيانا و المدار و البريد

علاش؟؟ ماهو من غلبي اشتركت فيهم كلهم ...

و كلهم ردو بنفس الرد ان الخط مافيشي مشكله

على قولت صابر زهقت بس مافقدتش الامل و يا انا يا البرنامج

اعطيت خبر للعويله و جبت المؤونه و سكرت على روحي الدار

هو يفصل و انا نعاود الاتصال و نرجع نحمل و هكي لحد الفجر

و صلت نسبة التحميل 80% و انا طايحه نصلي وندعي و ياريتني دعيت حاجه تانيه لانه بعد عشره دقايق نزل البرنامج

و عاد وين تلقوني

اخيراااا حيجيني النوم و انا مرتاحه

و بما اني عندي اخت رزله كانا ناضت لازم الحوش كله ينوض

مشيت جري و درت لافته علقتها على باب الدار و كتبت فيها

ممنووع الازعاج ..ممنوع الاصوات العاليه..ممنوع حد يخطم من قدام الدار و ممنووووووووع حد ينوضني لاي سبب كان

و رقدت

الساعه تسعه ناضت امي خدت الورقه في ايدها قرتها و مشت بيها

جت اختى مالقتش الورقه فتحت الباب و هيا تعيط مييييييييييييييمي قاعده رااااقده؟؟؟؟ نوضيييييي

مانندريش على روحي لقيت روحي واقفه و مانيش نقوللكم شنو درت فيها

المهم توا اكيد كلكم سمعتو على خدمه الواي ماكس كان في حد عنده اي معلومات ياريت يقولي عليها

و سأكون لكم من الشاكرين

الفاتورة

الفتره اللي فاتت مر عليا اسبوع غريب و القصه كلها بدت بفاتوره الكهرباء اللي وصلتنا
وبما ان والدي العزيز كان مسافر و بما اني اكبر الموجودين في الحوش فكنت مضطره اني نمشي باش نخلص الفاتوره
اليوم الاول
خديت بعضي و مشيت ندور في الشركه و انا في الطريق
ترررن تررررررررن
طبعا المكاالمه دوليه و مستحيل مانردش خصوصا ان كان فيه زحمه و ماشيه بسرعه بطيئه
اتلفت يمين و يسار مافيش شرطه و قلت الووووو
اتاري كان في شرطي مش عارفه وين كان مدسوس و طاح يصفرلي
و انا كنت مسكره الرواشن و نتكلم فماسمعتاش
مانندريش الا و فجأه الشرطي حدف روحه قدامي باش يوقفني

احدفت انا الموبايل و فتحتله الروشن و بابتسامه عريضه
ميمي...اهلا اي خدمه اتفضل
الشرطي...وين يا ماما من الصبح و انا انصفرلك و انتي مش معدله بكل
ميمي...والله ما انتبهتلك سامحني
الشرطي.....اكيد مش منتبهه ماهو اتهدرزي في التلفون
ميمي.....اه لالا انا توا بس كيف رديت
الشرطي ...ايه حق هاتي الرخصه و الكتيب
ميمي....شنو؟؟؟؟؟؟ غير اسمع ماهو...
الشرطي...مافيش ماهو هااااتي الاوراق
ميمي.....باااااهي باااااااااهي بالشويه

عين تضحك و عين تبكي عطيته الاوراق
الشرطي....شنو يا ابله اتدوري بالسياره و انتي حتى رخصه التجول طايحه
ميمي....نعم؟؟؟؟حيه حيه تمتلي
عطاني واصل مخالفه و قالي ....بري اتوكلي و تعالي بعدين خودي اوراقك من الاوسط
مصارش من تخليص الفاتوره وروحت و اتصلت بخالي
ميمي...خاااااالو الحق بنت اختك اتقفشت
خالي...علاش شنو درتي من عمله
و حكيتله
خالي.....هادي مخالفه مش ساهله و خصوصا توا مشددين عليها اسمعي ردي بالك تمشيلهم
ميمي.....شنو؟؟؟تبيني نبدا هاربه من العداله؟؟؟
خالي....لالالا انا توا نتصرف انتي استني تلفون مني بس
اليوم التاني
طلعت بنمشي نخلص الفاتوره
و انا في الطريق
ترررن ترررررررررررررررن
المره هادي شعفت درست على اليمين و قلت الووو
خالي...ميمي بري توا كلمتلك واحد اعطيه الواصل و هو توا يحلك الموضوع
ميمي...حاضر بس و انا كيف بنطلع بالسياره بدون اوراق و لا واصل؟؟؟
خالي...نقصي طلعاتك
طبعا الكلام هدا شبه مستحيل عندي شغلي و عندي الفاتوره
المهم درت و مشيت للمكان و قبل ما نوصل وقفت على محل صورت اوراق و جيت بنمشي
ميمي.....يااااااااااااااخرااااااااااااااابي
السياره قالت شي انوض
السياره جديده شنو صارلها
نزلت و طبعا مشاء الله الشباب الليبي خدوم جدا
جاني واحد و قالي خيرك قتله بالله شوفهالي
حط راسه نص ساعه في المحرك وبعدين قالي و الله مش متاكد لكن اضن المشكله مشكله كهرباء
نادى باقي الشباب و ولعوها و قالي ردي بالك تطفيها بري طوووول لكهربائي
مشيت للراجل اللي يستنى فيا و خطمت السياره على الدار طلعت المشكله في الموتورينو
وروحت
اليوم التالت
توكلت و ركبت السياره ماشيه بنخلص الفاتوره
و في الطريق
ترررررررن تررررررررررررن
يادي النهار اللي مش فايت قريب نحلف عليها هالفاتوره
ميمي....خييييييييير
اختي.......ميمي تعاااااااليلي درت حادث
ميمي....يا و الله حاله انتي وين ؟؟خشيتي في اي بالو؟؟
هادي اختى الاصغر مني وجديده في السواقه
اختى.....و الله ماني انا اللي غالطه هو اللي ضربني تعاليلي انا في طريق السكه
ميمي.....طريق السكه؟؟؟ مالقيتي غير هالشارع؟؟؟ توا اني من غير اوراق و كل مانشوف شرطي نرعش مع بعضي ومبعده على الاوسط و كل الشوراع اللي ترفع ليه وتبي ترفعيني غادي؟؟؟
المهم مشيت و نلقى تلاته سيارات خاشين في بعض و اختى اول وحده
السياره مضروبه و العجله مكسره و معادش تمشي
و جت الشرطه
و جابلي الشرطي رافعه و خدي اوراق السياره و رخصه اختي و قالي وصلو السياره للحوش و تعالوفي الاوسط
ااااااخ حاضر
مشيت للاوسط و كل مايخطم جنبي شرطي نحس في روحي بنعترف و نقوله راهو انا من غير اوراق و هاربه من العداله
طبعا هداكا اليوم ماخلصناش الا بعد الظهر
و الحمد لله في اليوم الرابع انحلت قصتي و رجعت اوراقي و مشيت دفعت الفاتوره اخيرا
ههههههههههههه
على فكره والدي العزيز ماعنداش فكره لحد الان على المخالفه فردو بالكم واحد يجيبله خبر

ميمي اتهزمت يارجاله

بعد صراع مرير دام يومين و حضرتنا نجاهد بكل انواع المقاومات الشعبيه ابتداء من اليم و الزيت و انتهاء بالرب و الزعتر....

اعلن و بكل اسف انهزامي و سقوط قواتي فريسه لجيوش الانفلونزا التي ابت الا ان تضع بصمتها على جهازي التنفسي و غرس راياتها في ارض مفاصلي المحطمه....

و في وقت سابق هذا الصباح اجتمعنا حضرتنا مع مدير الاستراتيجيات العسكريه الدي قدم الاسباب المحتمله وراء هدا العدوان الطاغي والمقترحات المثلى للقضاء عليه

و من هده الاسباب ندكر مايلي

1- اصابة نفسي بالعين...... ففي خلال هدا الاسبوع دار حوار ودي بيني و بين رئيسة وزرائي .. والدتنا العزيزه ..عن عدم اصابة فخامتنا بأي نوع من انواع الغزو الموسمي و التي بدورها" بهدلتني" لطرح الموضوع و نسيان قول الحمد لله

2- عبور الجيوش من الحدود الرسميه بيننا و بين الدوله الشقيقه جمهوريه جيجي العربيه عبر الاتصالات السلكيه و الاسلكيه التي جرت بالفتره الماضيه

3-وفي اسباب اخرى غبر مؤكده وردنا الان احتمال وجود صله قرابه بين الدوله المنافسه المدعوه جمهوريه فتكات الشعبيه و بسلاله من سلالات الاولياء الصالحين استنادا على عدد من المحاداتات المحفوظه لدينا

وها انا اليوم و من منبري هذااكتب اعلاني و استنجد بقوى الامن الخارجي ان يهبو لنصرتي بارسال الامدادات اللازمه كشروبو الكحه او المضاد الحيوي

و لكم مني جزيل الشكرودمتم في رعايه الله و حفظه

Happy Birthday!!!

Finally....finally i got a chance to meet the girls today...

Lately and because of our busy schedule me and my dear friends ( m.h and Gigi) did not get a chance to meet until today

we spent the whole day hanging out like the old days.....
unfortunately the rest of our happy group could not make it..

.by the way... we call our group "3esabet ellaho el'7afe" as we were quite naughty at collage LOL..

aaaaaaaaaaah what a sweet years!

anyway back to the subject... we went to Ewan for breakfast and later to mo2men to have lunch

...

it was really a nice day ...i needed that break...so thank you girls

p.s dear Gigi...

happy Birthday sweet heart !!! i wish you all the best cuz you deserve the best and may the next year be full of joy , happiness and success inshalla

also ..thank you very much for everything and please thank your sweet mum for the nice gift she gave me ... may Allah bless her.

guys go to congratulate Gigi tomorrow the first of Jan is her birthday .. yeeeeeeeeeeeey!!!

ولو بأضعف الايمان

بسم الله الرحمن الرحيم

امس الاحد شرعت جمعيه الهلال الاحمر الليبي في حمله للتبرع بالدم للمصابين في المجزره الجديده في غزه

الحمله ابدت بمصحة الهلال الأحمر بطرابلس التي تم تجهيزها لاستقبال المتبرعين بالدم

و حاليا اغلب المراكز الصحيه و المجمعات تستقبل على مدار الساعه المتبرعين بالدم

نرجو من شبابنا الليبي ان يتوجهو للمراكز و يساعدو اخواننا الفلسطنيين و لو بقطره دم

و لكم الاجر انشاء الله

لا تنسوا اخواننا بالدعاء لهم

تدبيسه

وصلني تاج من اختي و حبيبتي حبيبه صاحبه مدونه قصاقص حبيبه و ابت الا ان اجيب عليه
مع اني استهبلت بس مافيش فايده ...
بعد اذنك و اذن صاحبتك ححط نفس الصوره

بسم الله ابدا

لو كان ينفع تختار عصر تعيش فيه هيبقى انهى؟ ومين الحاكم؟

اي عصر ينظرلي العالم فيه بكل احترام كوني عربيه مسلمه

أول اولويه فى حياتى ...عيلتى ..شغلى ...أصحابى؟

كلهم اولويات يعني صعب الواحد يختار ما بينهم

عيلتي.. نحبكم

اصحابي ..اشتقتلكم

شغلي ..خفو عليا شويه تعبت

إيه اكتر حاجه بتحبها فى رمضان؟
رمضان كريم و له نكهه خاصه نحبه بعباداته و بلمة الاهل و الاصحاب و طبعا كل ما لذ وطاب

اوصف أجمل فطار ممكن تفطره؟

الاكل يكون الذ و احلى لما يشاركوك ناس تحبهم بيه

الا المكرونه بالبشاميل نستمتع بيها لما مايكونش في حد تاني بياكل معاي

لو انت حاكم هتكون عادل ؟ وهتعرف ازاى؟

لو كنت حاكم كنت اكيد حتنازل عن الحكم لان ارضاء الناس غايه لا تدرك

فأكيد الجماعه اللي مش حيعجبهم حكمي حيحاولو يغتالوني

مين أكتر اعلامى بتحبه؟

بصراحه ما نتبعش في تلفزيون هلبه بس يعجبني اسلوب حمدي قنديل

لو ممكن شغلانه تانيه تختار ايه؟

مهندسه كمبيوتر ...كابتن طياره

تانى بلد تحب تعيش فيه بعد مصر ؟

حنعدل السؤال الى تاني بلد تحب تعيش فيه بعد ليبيا

ايطاليا من اكتر الدول اللي زرتها و اكتر وحده حبيتها

مصر مازرتهاش من قبل و كان عندي مخطط لزيارتها السنه هادي بس السنه الجايه انشاء الله

اوصف ترتيبات أجمل فرح ممكن تحضره

انا مش من هواة الاماكن المزدحمه و الاصوات العاليه يعني اهم حاجه يكون في مكان واسع و مايكونش فيه موسيقى عاليه

بتراعى كلام الناس والقيل والقال؟ وليه؟
احيانا ايه و احيانا لا
احيانا ايه لاني عايشه في مجتمع و لازم نتقيد بيه
و احيانا لا لاني عارفه اني اللي اندير فيه مش غلط و بالتالي ماحدش ليه دعوه

صحيت من النوم لا موبايل ولا كمبيوتر ولا كاميرا ديجيتال ورجعنا لعصر الحصنه والحمام الزاجل؟
يااااااااالهوي دا انا كنت اروح فيهاهههههههههه

السعاده هى ؟

أن تكون لديك القدرة على خداع نفسك بأن كل شيء على ما يــرام

عندك أمل؟ واسبابك

كان ....بس حاليا حاسه ان طريقك مسدود مسدود مسدود

لما بتحب تهرب من كل حاجه بتروح فين ؟

اي مكان المهم اني انا اللي نسوق و مايكونش حد معاي

امتى أول مره أخدت فيها نفس وقلت ياااااااه أنا كبرت

اول ما تخرجت ...حسيت ان الوقت مشي و انا مش حاسه بيه

بتشرب سجاير ولا لا؟ وايه رأيك فى الرجاله والستات اللى بتشرب؟
ايوه هو هدا اللي كان ناقص هههههههههه

لا طبعا ما نحبش حتى ريحته

هما حرين بس انا مانحبش نكون حوالين الاشخاص اللي بتدخن

بتعرف ايدك من الشمال ازاى؟

نفس جواب حبيبه

اللي بتقدم و تعمل كل حاجه هي اليمين

اكتر اله موسيقيه بتحبها؟
البيانو نتمنى نتعلمه بيوم من الايام

ليه قله الذوق والنخوه اتعدموا؟
نقصت مانعدمتش
بسi blame TV

ايه الحاجه اللى لو حصلت هبقى سعيد ؟
هلبه بس حاليا لو والدي العزيز يسمع كلامي و يخليني نسافر

تحب أرض زراعيه ولا اجنس عربيات ولا كام عماره ولا فلوس فى البنك؟
الفلوس طبعا تجيب كل شي

البحر ولا النيل.؟
النيل ما شفتاش بس اعتقد البحر احلى من النهر

مركب ولا طياره؟

طياااااااااااااااااااااااااره ...نحب الطيارات و نحب المطارات و نحب اللي يشتغلو في المطار كلهم

مجنون ولا عاقل؟
اغلب الوقت عاقله بس احيانا الواحد يمل من العقل

و مؤخرا اكتشفت ان الجنون له متعه لا توصف

تقرا كتاب ولا تتفرج على فيلم؟.
كتاب لاني نتخيل على راحتي و مايتفرضش عليا شكل معين

التاج لمين؟

للمدونين الجدد اللي ماجربوش التيجان و لا الواجبات
و اهي فرصه نتعرفو عليهم و نطلعوهم من سباتهم
Gigi
heba
holyday

كل سنه و انتو بألف خير

By the way does anyone know the address of his hairdresser?