امتحان رياضيات وفيزياء لشغل وظيفة محرر الكتروني لموقع مركز دعم واتخاذ القرار
قدمت على وظيفة محرر في موقع اخباري مكنتش اعرف اي تفاصيل تانية غير كدة، لانه الاعلان كان عالنت ومكنش فيه تفاصيل عن اسم المكان أو غيره، لاقيتهم بيتصلوا بية،
أنا: ألو
هم: ايوة استاذة سارة عبد الحميد
أنا: أيوة أنا .. مين معايا؟
هم: معاكي ....... من مركز المعلومات ودعم اتخاذ القرار
أنا: ايه .. مجلس الوزراء
هم: أيوة يافندم ، حضرتك قدمتي على وظيفة محرر على الموقع الاخباري لموقع مركز المعلومات
كان نفسي أقول أنا لا والله معملتش حاجة ومكنتش اعرف انه مجلس الوزراء
المهم معاد الانترفيو بتاع حضرتك يوم كذا ومدته ساعة
رحت متأخرة عن معادي ساعة بس لاقيتهم ادوني ابليكيشن من 7 ورقات تقريبا معلومات شخصية من ضمنها طبعا سؤال الحكومة الغبي اللي هو : هل لديك أقارب في المركز؟ المهم يعني أكيد لا
بعدها لاقيتهم ادوني ورق تاني عبارة عن 10 صفحات هي كالتالي:
امتحان رياضيات مكون من 22 سؤال أهمها كان
شخص يقف على سلالم نزل 4 درجات ثم صعد 3 ثم نزل 6 ثم صعد درجتين ثم 9 درجات .. أين يقف ذلك الشخص من مكانه الأصلي
وتاني سؤال كان: سيارة س انطلقت من مكانها الساعة 11:53 و وصلت المكان الذي يبعد عنها 240 ميل وانطلقت سيارة ص من مكانها الساعة 4:41 أين التقت السيارتان
وغيره بصراحة كان فيه طيارات تسير من مكان إلى مكان وصلت المكان اللي واقفة فيه طيارة أخرى بعدها بكام دقيقة ما هي سرعة الطائرتين.
فيه على شاكلة الأسئلة دي 22 سؤااال
الامتحان اللي بعده كان منطق وعلاقات بين الأسباب
المهم يعني كان فيه 20سؤال منهم مسألة لذيذة أوي هي
الزوج والزوجة (ن) والزوج و الزوجة (ب) يحبان الموسيقى الكلاسيكية وموسيقى الجاز ،موسيقى الروك والموسيقى الريفية اثنين من الاربعة اشخاص شعرهما أشقر، اذا علمت أن الزوجة (ب) شعرها بني اللون وتحب الموسيقى الريفية من الاثنين شعرهما اشقر وايهما يحب الموسيقى الكلاسيكية
ثالت امتحان كمبيوتر7 أسئلة واخر الامتحان انجليزي كان مكون من 5 اسئلة عجيبة جدا
مدة الاربع امتحانات نصف ساعة
بصراحة شديدة امتحان الرياضيات والفيزياء الأولاني كان حاجة كدة معرفش اولها من آخرها ايه، المهم انه كان 22 سؤال كلها ارقام وضرب وقسمة منها مثلا
بدون استخدام الآلة الحاسبة 326 ( 31) - 326 ( 19) كم تساوي
وبعدها كان فيه امتحان معلومات عامة مدته نصف ساعة كان اغلبية اسئلته تافهة جدا بس للي فعلا عنده معلومات عن مصر واسرائيل ودول اوروبا وأمريكا اللاتينية ورؤساء الولايات المتحدة ورؤساء وزراء العالم وأهمهم في الامتحان كان اسرائيل
لا أنكر انه المعلومات العامة حاجة مهمة جدا للصحفي بس السؤال بقى
هي كانت وظيفة محرر إلكتروني للموقع ولا مدرس رياضيات
على الرغم من ان بعض اسئلة الرياضيات مكنش لها اجابة من
الاختيارات اللي مكتوبة في ورقة الامتحان
المرة الجاية احكي لكم عن الانترفيو نفسه بقى مع نائب مدير ادارة المعرفة بالمركز
