فى حيـاتـنا و دنـيـتـنا

فى حياتنا و دنيتنا
تروح ناس و تيجى ناس
نفتكر ناس و ننسى ناس
نحب ناس ونبعد عن ناس
و من بين الناس
ناس نفتكر إن هى أصيلة
نقول وجودها فى حياتنا هيزيدها معانى جميلة
هيبقوا معانا وقت أفراحنا و أحزانا
هيعيشوا معانا فى كل لحظاتنا
ومع الأيام يأتى ما لم يكن فى الحسبان
يرحلوا بعيدا عنا بدون أسباب
و يمضى الوقت و تمر الأيام
و يبقى لنا أن نذوق العذاب
و جع القلب و الآلام
نحاول أن نضمد الجراح
ولم يبق لنا منهم سوى ذكريات حزينة
ذكرى مرة أليمة
لما يمر طيفها علينا
تعكر صفو أيامنا و ليالينا
تضّيع منا إحساسنا باللى حوالينا
تكون سبب تعاستنا
نتمنى تبعد عن حياتنا
ننساها و ننسى قسوتها
ننسى أحزانها و اللى كان منها

فى حياتنا و دنيتنا
تروح ناس و تيجى ناس
نفتكر ناس و ننسى ناس
نحب ناس و نبعد عن ناس
و من بين الناس
ناس عشنا معاهم أيام جميلة
ناس دايما عالبال صورهم ولياليهم
كلامهم و أساميهم
ويمضى الوقت و تمر الأيام
ويبقى لنا منهم ذكريات جميلة
ذكرى حلوة لأيام سعيدة
نحب دايما نفتكرها
نتمنى ترجع تانى لينا
تنور حياتنا ببهجتها
ندوق من تانى حلاوتها
نحس أيامها و لياليها
و الفرحة اللى كانت فيها
يعدى علينا جمال ريحتها
نشتاق من تانى ليها
تاخدنا جوه أحضانها
ترجعنا تانى ليها

بقلمى

فـارس أحلامى

إهداء منى إلى فارس أحلامى , بعد وصوله , خطيبى ( ربنا يبارك لى فيه و يحفظه من كل سوء أمين يارب) و باعتباركم كلكم إخواتى هطلب منكم تدعو لنا ربنا يوفقنا و ييسر أمورنا

أراك فارس أحلامى
أراك فى كل وقتى
أراك فى يقظتى و منامى
أراك تأتى إلىّ
تأخذ يدىّ
تجذبنى إليك
إلى عالم آخر
عالمك الفتان

أراك قادم إلىّ
تعلو حصانا أبيضا
تأخذنى هناك بعيدا
إلى ربوة خضراء
أرى أنهار واسعة
تتلألئ فيها المياه
أرى سماء صافية
تغرد فيها الطيور
بصوت ساحر رنان
تشدو بحبنا فى كل مكان
أرى جبال شاهقة الإرتفاع
تغرب الشمس بين ثناياها
نصعد سويا فوق الجبال
ننظر أمامنا
نرى أحلامنا
تعانقنا السماء
تأخذنا بأحضانها
فتغمرنا السعادة كلها
فنصبح أسرى لها
ولسحر الطبيعة الخلاب

أراك فارس أحلامى
تأتى إلىّ بوردة حمراء
أرى حبك قد ملأ أجواء حياتى
بعبير زهرتك الفواح
برقتك و إبتسامتك
أرى جمال الكون أمامى
فتذوب همومى و أحزانى

أرى فى عينيك أجمل أيام حياتى
أرى فى سحرهما
حب و حنان
أختبئ بهما
أشعر بأمان ..... و إطمئنان

أشعر فى نبض قلبك حبك لى
فيصبح قلبك سكنى و عنوانى
تصبح أنت كل كيانى

أحس السعادة بين يديك
تقدمها إلىّ
فتصبح عنوانا لحياتى
سعادة قد إهتزت لها جميع أركانى
أنسى بها كل ما أعيانى
و أصابنى فى زمانى

بقلمى

خطوبتى

السلام عليكم و رحمة الله و بركاته

أولا أنا بشكر كل أخوانى و أخواتى اللى سألوا عليا البوست اللى فات

ثانيا بقدم إعتذارى لأنى ماقدرتش أرد على تعليقاتكم بس معلش اعذورونى النت بيفصل من عندى يعنى مش مستقر قى أى لحظة بيقطع ولما ييجى بيكون فى لحظات صعب أقعد فيها وإن شاء الله أزوركم قريب فى مدوناتكم

ثالثا البوست ده عشان تشاركونى فرحتى

أول يوم شوفته كان يوم الإتنين 9/2/2009 و كانت خطوبتى إمبارح السبت14/2/2009 الحمد لله هى حاجه جت كده مش عارفه ازاى و بقول لكل أحبابى عقبالكم يارب و بطلب منكم تدعوا لى أصل بجد مش متخيله إنى ممكن هبأه مسئوله عن بيت و إن شاء الله عن زوج و أولاد حاسه إن هى حاجه صعبه المسئوليه بعد ماكنت بقعد بس على النت و أروح شغلى فلا تنسونى بالدعاء إن ربنا يوفقنى أنا و خطيبى لما يحب و يرضى و يبارك لى فيه و يكرمنا إن شاء الله

إحـساس جميـل

جوايا إحساس جميل
إحساس بالسعادة بيزيد
حاسه الفرحة جوه قلبى
واخده الدنيا جوه حضنى
حاسه و كأنى طير فى السما بطير
أحلق فى الفضا الكبير
مش فاكرة أى حاجة
ناسية كل حاجة
و كأنى مولودة من جديد
إحساس واخدنى لبعيد
بعيد عن الأحزان
بعيد عن الأهات
إحساس أجمل إحساس
لما تكون عايش فى الأحزان
و فجأة ياخدك إحساس جديد
الحب جوه قلبك يزيد
تتمنى وياه دايما تعيش
أو يزورك كل فترة
يعطيك الأمل و حب الحياة من جديد
تعيش لحظات سعيدة بين الحين و الحين
تدعى و تقول ياربى
الإحساس ده يفضل جوه قلبى
مايروحش منى ويبعد بعيد عنى

بقلمى

أنا و الـبحر

أحب البحرو نسماته الباردة
لكنى أخاف من أمواجه العاصفة
أقف أمامه حائرة
أحيانا أشعر أنى هادئة
أحيانا أخرى أنى خائفة
أرى أمواجه تعلو و تهبط ثائرة
تارة تأتى إلىّ لكى تحضننى
تارة أخرى لكى تهدمنى

أقف أمامه
أسمعه
يهمس إلىّ
أقبلى علىّ
لا تخافى
أسمع إليكِ
فبوحى إلىّ بما عندك
ستجدينى لكِ الصدر الحنون
فقولى لى كل ماهو مكنون
أبوح لكَ
أقول لكَ
لكنى أخاف منك
أخشى أن تأخذ أجمل ما لدىّ
فكما لى ذكرى حزينة
أحمل بين جنباتى أيضا أياما جميلة
أخاف أن تأخذها منى
تذهب بها بعيدا عنى
و تبقى لى الذكرى الحزينة
هنا على شاطئك
فما أجد إلا دموعى تنهمر أمامى
فتصبح لى بحر آخر من الأحزان
بحر آخر من الأوجاع

أحيانا آخرى
أقف أمامه
أحاكيه
يستمع إلىّ
يأخذ منى
شجنى و همى
يلقيه
بعيدا عنى
و يأتى إلىّ
يعانقنى
مقبلا علىّ
بنسمات أمواجه الساحرة
بهمسات أمواجه الدافئه
يؤنسنى أيامى
ينسينى آلامى
يمسح عبراتى
يغسلنى ....... ينقينى
من الأحزان و الآهات

بقلمى

تـــــــــــاج تــــــــــانى

السلام عليكم و رحمة الله و بركاته

التاج ده هديه من أختى ساره ربنا يباركلها و يوفقها لما يحب و يرضى

1- لو كان ينفع تختار عصر تعيش فيه هيبقي انهي؟ ومين الحاكم؟

عصر سيدنا محمد صلى الله عليه وسلم ، كان نفسى أعيش مع الصحابه و أمهات المؤمنين

2- أول أولويه في حياتك؟

رضا ربى عليا

3- أكتر حاجه بتحبها في رمضان؟

صلاة التراويح و القيام و المسحراتى والزيارات

4- أوصف أجمل فطار ممكن تفطره؟

أبدأ بتمر أو كوب ماء وأى بروتين (لحمه أو فراخ ) و شوربة و خضار(الباميه و البسله )بحبهم قوى و بعدين الحلو بيكون قطايف أو جلاش

5- لو انت حاكم هتكون عادل؟ وهتعرف ازاي؟

لو أنا حاكم ان شاء الله أكون عادل بس الواحد طبعا مش معصوم من الخطأ ممكن يظلم و هو مش واخد باله و لو حصل منى ظلم أكيد هحس لأنى من النوع اللى بيحاسب نفسه

6- مين أكتر اعلامي بتحبه؟

الشيخ محمد العريفى و الشيخ محمد حسان و الشيخ محمود المصرى والشيخ محمد يعقوب

7- لو ممكن شغلانه تانيه تختار ايه؟

شغلانه تانيه كان نفسى أكون مذيعه

8- تاني بلد تحب تعيش فيه بعد مصر؟

أنا بحب مصر قوى و لو حبيبت أعيش فى بلد تانى يبقى عند الرسول عليه الصلاة السلام عند بيت الله الحرام

9- اوصف ترتيبات أجمل فرح ممكن تحضره؟

أهم شئ النظام و مش بحب البذخ و الإسراف و طبعا الأطفال يكونوا هاديين ولو ان ده شئ صعب

10- بتراعي كلام الناس والقيل والقال؟ وليه

الواحد مش عايش لوحده حوالينا ناس طبعا أكيد بتأثر بكلام الناس و يمكن أزعل بس طول ما أنا صح الحمد لله مش بيهمنى وأحسن حاجه ممكن نقولها حسبنا الله و نعم الوكيل

11- صحيت من النوم لا موبايل ولا كمبيوتر ولا كاميرا ديجيتال ورجعنا لعصر الاحصنه والحمام الزاجل؟

الحاجات دى طبعا زى مالها مميزات لها عيوب بس متهيألى هنام تانى أو هحاول أتأقلم مع الوضع الجديد طالما الكل هيبقى كده معايا فى نفس الوضع

12- السعاده هي ... ؟

السعاده هى رضا ربى عليا و القناعه و مساعدة الأخرين

13- عندك أمل؟ وأسبابك؟

الحمد لله عندى شوية أمل و الا ماكنتش هكون عايشه لحد دلوقتى

أسبابى أملى فى ربنا كبير

14- لما تحب تهرب من كل حاجه بتروح فين؟

لما بحب أهرب من كل حاجه أصلى أو أقرأ قرآن

15- امتي أخر مره أخدت فيها نفس وقلت ياااااه أنا كبرت؟

مش فاكرة بالتحديد بس لما بكون مسئولة عن شئ صعب أو بفكر فى حل مشكله

16- بتشرب سجاير ولا لا؟ وايه رأيك في الستات والرجاله اللي بيشربوا؟

لا طبعا

الستات و الرجاله اللى بيشربوا لا طبعا دا شئ مش كويس خالص ربنا يهديهم و يبعدهم عن السجاير أولا عشان حرام ثانيا عشان صحتهم

17- بتعرف ايدك الشمال ازاي؟

ايدى الشمال مش بكتب بيها و لا باكل بيها

18- أكتر آله موسيقيه بتحبها؟

مش بحب ألات موسيقيه

19- ليه الزوق والنخوه اتعدموا؟

الزوق و النخوة مااتعدموش بس قلوا بسبب البعد عن كلام ربنا سبحانه وتعالى

20- ايه الحاجات اللي لو حصلت هتبقي سعيد؟

تنتصر الأمة الإسلاميه

نحرر المسجد الأقصى

أزور بيت الله الحرام

الناس كلها تحب بعضها

ربنا يرزقنى الزوج الصالح

أشتغل بتخصصى اللى هو اللغه الإيطاليه أصل صعبانه عليا و خايفه أنساها

21- تحب أرض زراعيه ولا اجنس عربيات ولا كام عماره ولا فلوس في البنك؟

إن كان من ناحية الثراء مش عايزة حاجه ، لكن لو بيت مثلا فى وسط أرض فيها خضرة و وزهور يكون جميل جدا

22- تحب البحر ولا النيل؟

البحر والنيل بحبهم بس بخاف من منظر المياه عموما

23- مركب ولا طياره؟

ماركبتش طيارة قبل كده ، أما لو مركب فى نزهة فى النيل وقت الغروب يكون جميل قوى

24- شخص مجنون ولا عاقل؟

شخص عاقل بس يكون مرح

25- تقرا كتاب ولا تتفرج علي فيلم؟

أقرأ كتاب

صاحبة عمرى و حياتى

الخاطرة دى كتبتها لصاحبة عمرى فى فترة بعدها عنى بسبب ناس فرقوا بينى و بينها لكن الحمد لله مابعدناش عن بعض كتير وده كان إحساسى تجاهها فى الفترة دى كانت دايما جوه منى وعلى الرغم من إن ظروف الحياة باعدت بينا لكن هيفضل حبى ليها إن شاء الله

صاحبة عمرى و حياتى

كانت هى أعز ماليا
صاحبتى أختى
غاليه عليا
كانت بسمه
رقيقة جميلة
حلوة أصيلة
فيها حنية و طيبة عليا

كانت واقفه معايا
فى ضيقى و حزنى
فى كل صعابى اللى عدت بيا
فى وقت حزنى الآسى عليا
فى وقت جرحى تواسى فيا
فى وقت فرحى قريبه ليا
ياما هونت عليا
مسحت دموع عينيا
سَنَدت عليها
و سَنَدت عليا
سِمعت ليها
و سِمعت ليا
كانت صاحبة عمرى و حياتى
كانت أختى و أكتر شويه
كنا أصحاب أحلى أصحاب فى الدنيا ديه

ماكنتش عارفه
إن هييجى يوم عليا
أبعد عنها و تبعد عنى
يوم أشوف فيه الآسيه
و فرقتنا أنا و هى

فى وقت بعدها عنى
حاساها قريبه منى
شايله لها جوه منى
كل ذكرى جميلة عندى
عايشه بيها
مأثرة فيا
بدعى لها دعوة نديه
ربى يقبلها من قلبى ليها هى
أشوفها دايما فى أحسن حال
يجيلى عنها أحلى الأخبار
و لو هى بعيده عنى
كفايه ده يطمنى
و لوإن الحزن فيا
هافقدها الأيام اللى جايه
عمرى ماهنساها فى حياتى
صاحبة عمرى و حياتى فى الدنيا ديه

بقلمى