"كنت عند دكتورة الأسنان يوم الاتنين اللي فات..
فيه دكاترة أسنان هنا؟؟
أصل أنا عايزة أعرف بجد إيه اللي هيا كانت عمالة تدخله بقي و تطلعه ده.. دي مسامير؟؟
هما بيقولوا فعلًا ان حشو العصب بتركب مسامير في بقي.. بس دي حطتها و شالتها تاني..
المهم بقى اني اكتشفت ان العصب عندي كان ميت..
عشان كده كنت بصحى من النوم بوجع سناني.. كانت تفضل طول الليل يوجعني..
و كان ضرسي اليمين فوق هوا اللي بيوجعني.. فبالتالي نصف وشي اليمين كله بيوجعني..
شفايفي و أسناني و خدي بعيني..
و عيني دي كانت المشكلة.. طول ما ضرسي بيوجعني عيني مكسورة و مدمعة متواصل..
كنت كل يوم أصحي ماما من النوم عشان ضرسي بيوجعني..
و خلصت شريط بروفين تقريبًا و جبت برشام مسكن تاني اسمه الكوفان.. أول مرة أسمع عنه..
ربنا ما يوري حد فيكو بصراحة.. ألم لا يطاق..
بعدين لما رحت للدكتورة.. من خضتها لما بصت في بقي حسيت انها حيغمى عليها
حالة ضرسي اللي واجعني كل ده سيئة جدًا جدًا جدًا..
الضرس نفسه عبارة عن سور و مفيش أي حاجة جوا.. موصلش للعصب بس، لأ ده العصب مات كمان.. و فيه بكتيريا بتلعب جوا، و أنا مش حاسّة
العصب كان ميت في ضرسي و أنا مش حاسّة
قعدت تقوللي كلام كتير عن حشو العصب و بتاع.. و أنا طبعًا أول ما دخلت قلتلها أنا عايزة بنج..
قبل أي حاجة.. لدرجة انها بتقوللي يعني قبل ما أكشف كمان؟؟
قالت بقى حتنضفه و تشيل كل الجير الموجود -نتيجة اني كان عندي ضرس بيوجعني الناحية التانية فكنت باكل على اليمين بس.. مش نتيجة إن مفيش غسيل أسنان زي ما كانت بتقول
- و بعدين تشيل العصب الميت و تحطلي حشو مؤقت.. دي أول جلسة..بعدين فيه جلستين أو تلاتة كمان.. معرفش حتعمل فيهم إيه بصراحة..
و اخر جلسة اللي حتعمل فيها تلبيسة للضرس عشان الحشو ميقعش..
أنا أول مرة أعرف إن علاج الأسنان غالي كده.. حيكلف حوالي 300 جنيه كله على بعضه..
و ده كده في مستوصف مش عند عيادة خاصة و للا مستشفى خاص..
و عندي ضرس تاني الناحية التانية من بقي.. برضه عايز حشو عصب بس مش زي ده.. أقل منه شوية.. ده بقى حشيله خالص..
أيوه.. حخلع ضرسي من و أنا عندي 17 سنة
عشان أنا عندي سنّ مزنوق شوية في صف أسناني اللي تحت و في نفس الوقت عمري يسمح بإن أسناني تظبط مكانها و تاخد شكلها عادي.. و أنا مش حستحمل أحشي إتنين حشو عصب..
حخلع و خلاص..
أصلًا الدكتورة قعدت تألس عليا و تقوللي لما حتخلعي ضرسك من و أنتي عندك 17 سنة حنركب لك طقم أسنان امتى؟ و أنتي عندك 27؟؟؟
بس أنا قررت و إن شاء الله مش حرجع في قراري..
يا لهوي.. دنا المفروض اخد المضاد الحيوي من بدري.. من حوالي الساعة 10
حقوم اخده و اجي..
أوووووع
برشامة طوييييييييييييلة.. و لونها أصفر.. بس بتتزحلق بسرعة الحمد لله..
أنا كده بدل ما باخده كل 8 ساعات خدته كل 12 ساعة
كنت ناسية اخده خالص و الله
كفاية كده كلام على دكتور الأسنان بقى..
عشان لو فيه دكتور أسنان هنا حيتخرب بيتي.. أي دكتور أسنان بيشوف سناني بيدعي عليا
"الكلام ده كنت كاتباه في منتدى روايات بعدين قلت أكتبه في المدونة كمان.. ليه معرفش!!
