كانت رايحة تقابل صاحبتها
كعادتهم دايما ... كل كام يوم يتقابلوا
ويقعدوا يرغوا فى احوال الدنيا
وهى ماشية فى الشارع
لاقته قاعد على الرصيف بلبس المدرسة
كان وحيد وحزين
ومعاه كورة قدم بينططها بإيده
مشيت خطوتين وهى مستغربة وجود الطفل ده
فى مثل هذا الوقت فى الشارع
استغرابها خلاها تتأكد من الوقت فى ساعة الموبايل
تسعة وربع ...غريبة ...هو ليه مش فى مدرسته؟
نفسها الإمارة بالسوء خلتها تتهمه
انه واد فلتان وتلاقيه مزوغ من مدرسته
لكن نفسها العاقلة اوحتلها انه لو كان مزوغ
يبقى لازم يكون معاه شلة الزوغان
ومش معقول هايزوغ لوحده
ويلعب مع نفسه ماتش كورة
مافاقتش من كلام عقل بالها
الا لما لاقت الكورة وقعت من ايده ومشيت قدامها
وهى فى حركة تلقائية وقفت الكورة برجليها قبل ما تبعد
ولفت جسمها و وقفت فى مواجهته
وسالته
اشوطهالك؟
بصلها باستغراب وهز راسه بالموافقة
وهى الحماسة دبت جواها
وقالتله انزل من على الرصيف و اوقف قدامى
فك شنطته من على ضهره وركنها على الرصيف
ونزل فى مواجهتها
وهى شاطت الكورة شوطة تليق بالمسافة اللى بينهم
لكن الكورة خرمت منه
وجريت بعيد عنه بفعل الرياح
هو جري ورا الكورة
وجريه اثارها
وخلاها تتحمس اكتر
علقت شنطتها على كتفها
كما البوسطجى لما يعلق شنطة الجوابات
وزحزحتها شوية ورا ضهرها
وجريت بعزم مافيها فى اتجاه الكورة
هو ماكنش متوقع انها هتجرى معاه ناحية الكورة
فبالتالى ماكنش بيجرى بحماسة
لانه معتقد ان مافيش منافس ليه فى الجرى
ولما سمع صوت وقع اقدامها وراه
بص بالتفاتة صغيرة
ولقاها اقرب منه للكورة
بص باندهاشة بسبب جريها
وهى لم تعر اندهاشاته اى اهتمام
واستمرت فى الجرى
لحد ما وصلت للكورة
وقفتها برجليها ولفت جسمها
وقالتله ارجع ورا
وهو ابتسم اوى
ورجع بضهره ورا
وهى شاطت الكورة
وهو لقفها وشاطها
وهى جريت عليها
وهو جرى عليها
وكل واحد فيهم يحاول ياخد الكورة من زميله
ويشوطها ويجرى عليها
قعدت تلعب معاه ماتش حماسي
مالهوش اى قواعد
وماحدش بيجيب اجوان
مجرد اتنين بيتنافسوا مين فيهم
يشوط الكورة قبل التانى
وبصت فى ساعة الموبايل
اكتشفت انها اتاخرت على صاحبتها
وقالت فى عقل بالها عادى
هى واخدة على انى اتاخر عليها
وكملت الماتش
وفضلت تلعب
وتطلق صيحات فرح لما تمسك هى الكورة برجليها
وتطلق صيحات اعتراض لما هو يمسك الكورة
وصيحات اخرى لشحذ همته انه يجى قدامها
علشان ترقصه وتشوط الكورة فى مكان بعيد عنه وقريب منها
عدت تقريبا تلت ساعة وهى بتلعب معاه
ماكنش فيه حد فى الشارع غيرهم
اللهم الا بعض المشاة كل فين وفين
فجأة قعد على الرصيف وقعد ينهج
وقالها كفاية يا ابلة انا تعبت
اطلقت صيحة مفادها انه واد خيخة ومش اد اللعب
محاولة منها انه يقوم ويبطل كسل
ويجى يكمل لعب معاها
لكن هو كان خلاص جاب اخره ومش قادر فعلا
وهى استسلمت لعلامات الاعياء على وشه
وقعدت جنبه على الرصيف تاخد نفسها هى كمان
وكان هذا الحوار
_ انت اسمك ايه؟
_ مصطفى
_ فى سنة كام يا مصطفى
_ رابعة ابتدائى
_ ومارحتش المدرسة بتاعتك ليه ؟
انت مزوغ ولا ايه درش؟
_ ابدا والله يا ابلة انا رحت المدرسة
بس هما اللى مشونى من المدرسة
_هى باستغراب ... وهما يمشوك من المدرسة ليه ؟
انت عاملة عملة ولا ايه؟
_ اصل انا لسة مادفعتش مصاريف المدرسة
وهي سقط الامر من ايديها
وحست بغصة فى حلقها وفى قلبها
ولاقت نفسها بتطبطب على ضهره وهى بتقوله
طب ماروحتش على البيت ليه؟
بدل ما تقعد فى الشارع
_ محدش موجود فى البيت
امى وابويا فى اشغالهم
وهى سكتت معرفتش تقول ايه
وهو استطرد وقالها والله انا قلت لابويا امبارح
انهم مش هيرضوا يدخلونى من غير ما ادفع المصاريف
ابويا برضه صمم وقاللى روح بس وهما تلاقيهم هينسوا
_ طب وباباك مادفعش الفلوس ليه؟
_ بصوت واهن ومستخبى جوة زوره
ابويا مش معاه الفلوس دلوقتى
وهى جسمها قشعر
وسالته مصاريف المدرسة اد ايه؟
رد بصوت اكثر اختباءاً
34 جنيه
وهى ماقدرتش تخبي دهشتها جوة عيونها
والسؤال اتكرر مرارا وتكرارا فى عقل بالها
34 جنيه؟
!!!!!!!!!!!!!!!!
34 جنيه؟
!!!!!!!!!!!!!!!!!
34 جنيه؟
!!!!!!!!!!!!!!!!!!!!!!
ابوه مش معاه 34 جنيه ؟
34 جنيه مبلغ كبير على ابوه؟
يا نهار ابيض
!!!!!!!!!!!!!!!!!!!!!!!
ده الواحد فى نعمة ومش داري بيها
وساعتها جالها حالة قرف من نفسها
وحست اد ايه هى فى نعم كتييييرة اوى
مش واخدة بالها منها
حست اد ايه هى غنية اوى بال60 جنيه
القابعين فى قعر شنطتها
60 جنيه مش ملزمة انها تصرفهم فى اساسيات
دى رايحة تشرب بيهم بيبس وتاكل فادج شوكولاتة
وقالت فى عقل بالها
جاتني نيلة
ناس ليها سلنترو وفادج الشيكولاتة
وناس مش لاقين فلوس الدراسة
وبعد ماهزأت نفسها فى عقل بالها
وضميرها ارتاح لمقدار التهزيئ
بصت فى ساعة الموبايل
لاقتها عشرة الا خمسة
خدت قرارها
وقامت من مكانها
وقالت لمصطفي
يلا بينا
على فين يا ابلة
على المدرسة
اه بس ليه يا ابلة
هاخليك تدخل المدرسة
ازاى يا ابلة دول مش هيرضوا
لا هيرضوا
قالها اسم المدرسة
انا اعرف الناظرة وهاخليها تدخلك
بس احنا عندنا ناظر
_انا قصدى الناظر ... انا اعرف الناظر
يلا بينا علشان ماتتاخرش
وفى طريقهم للمدرسة
عرفت اسمه بالكامل
وعنوان بيته
ورقم الفصل بتاعه
وعند باب المدرسة
طلبت مقابلة الناظر
الفراش شاورلها على المكتب
وهى شافت اوضة مكتوب عليها الحسابات
قالت لمصطفى روح انت على فصلك
ودخلت هى الحسابات
قالت للموظفة اللى قاعدة ورا المكتب
من فضلك عايزة ادفع مصاريف
مصطفى فلان الفلانى
فى سنة رابعة.... فصل رابعة تالت
بس خلاص
من يسألك ماهو في حاجة اليه
ولكن الأجمل ان تعطي
من لا يسألك وانت تعرف حاجته
انتهى
بت خيخة وأي كلام
33 comments:
سلام الله عليكِ و رحمته و بركاته
جميله جداً القصه و عجبتنى قوى
احساس رائع لما نساعد حد محتاج حتى لو مش عارف ان احنا هنساعده و فجأه يلاقى حد ساعده و ميعرفش هو مين
أتمنى لك من الله التوفيق
قصة حلوة
بس ايه رائيك تكتبى قصص زيها و تحطيها فى كتاب اكيد هايخرب الدنيا
بس كده ممكن تقعدىكتاب كتاب كتير فى بيتهم بس ولا يهمك يبقى كده كسبنا كاتبة كبيرة
يااااه يا خيخة
عارفة لو انتى بجد اللى عملتى كده
تبقى بنت جادعة اوي
و ربنا يباركلك بجد
حلوة قوى وبتوجع قوى
عارفة ليه؟
لإنى لسه راجع من سيلنترو وصارف قد اللى يعشى 10 أسر زى أسرة مصطفى
ربنا يجازى خير صاحبة القصة لو كانت حقيقية ويجازيكى خير على تنبيهنا
خالص تحياتى
اه حاجة كمان
لو القصة ديه حقيقية
لازم المدرسة ديه تتعاقب
لانها مش امينة على التلاميذ
يعنى ايه تخرج الولد من المدرسة علشان مش دفع المصاريف؟؟؟
و تسيبه فى الشارع
مين حيكون المسؤل بقا لو حصله حاجة
عربية خبطته
ولا حد
اعتدى عليه ولا خطفه؟
المدرسة ديه لازم تتقدم ضدها شكوى
القصة حلوة قوي
وكلامك منظم وجميل
بس فيه حاجة
هو فيه دلوقتي مصاريف 34 جنيه ؟؟؟
معتقدش
شكراااااااااااا
:) can't find words .. i'm only smiling :)
but came to my mind that i have retarded duties to do :D
Nice post...i'll call you 5o5a ;)
كنت عارفة انها هتعمل كده
ربنا يكرمها وبجد ما نقص مال من صدقة
ربنا سبحانه وتعالى أكيد هيجازيها خير
إحنا فعلا هنتحاسب كأبناء الطبقة المتوسطة المرفهين على إهمالنا و تضيعنا لحقوق الطبقات الكادحة المطحونة إللى ضاعت بسبب سكوتنا على الظلم و الإستبداد و الفساد و إهتمامنا بمشاكلنا التافهة
فعلا شيء جميل إن الواحد يكون إحساسه عالى كدا
كن طيب مع الناس حتى لو متعرفهمش ...وزع خير طول ما إنت ماشى لإنك هتحتاجة يوم القيامة كتير
إختيار موفق جدا لبطلة القصة
و شيء جميل برضه إنها تلعب كورة فى الشارع مع طفل صغير ....و مهتمتش برأى الناس .....
رائع:)
جميل جدا
انتى دى ؟؟
بس عامة .. فعلا 34 جنيه ممكن يكونوا كتير ..
ابوه لو بياخد 150 - 200 جنيه زى اى موظف محترم .. اكيد 30 جنيه مبلغ كبير
بس معقول منظر واحده بتلعب كوره مع عيل صغير ف الشارع مشدش حد م الماره .. اكيد ده مش منظر مألوف يعنى
والله انتي ولا خيخة ولابتاع...
انتي زي الفل...
كفاية بالنسبة ليا .. اني وانا بقرأ البتكتبيه.. بيكون فيه ابتسامة علي وشي... ابتسامة لأني مستريح وانا بقرأ..
بالنسبة لموضوع المساعدة ده من اجمل الحاجات ال ممكن تسعد الانسان.. انه يحس ان مساعدته حتي لو شايفها صغيرة تفرق مع حد تاني....
اعرف شخص كان كل يوم وهوا رايح الشغل وهوا راجع من الشغل يشتري كيس مناديل -حتي لو مش محتاج مناديل- من واحدة قاعدة علي الرصيف القريب من بيته.. وعمرها ما بتسأل حد ولا بتطلب ان حد يشتري منها... كان يشتري يوميا وميستناش الباقي.. ياخد الكيس ويجري قبل متوقفو.. علشان بيتكسف يقولها خالي الباقي...
المهم ... تحياتي ليكي يا اجدع خيخة
خلتينى اعيط
ربنا يوسع رزقك ودايما يارب تيددى
ولا عمرك تحتاجى ابدااااااا
السلام عليكم
مش عارفه اقول ايه
هي بالنسبه لي تحلت بشجاعه انها تسأله وانها تاخد قرار بمساعدته
بس حاجه جميلة ان الواحد يقدر يساعد حد محتاج بجد
جزاها الله خيرا
البوست ده جميل قوى
قريته تلت مرات
ونسيت اعلق ومشيت
بس افتكرته وانا بفتح قصه لاحمد خالد توفيق اسمها 36
قعدت افتكر انى شوفت الرقم ده حالا
لح ما افتكرت وجيت تانى
انا مدفوع دفعا بجد انى اعلق
حتى لو ايدى مش عاوزه تتب
وعاوز انام
ولا اخش اقرا
افتكرت وحسيت انى لازم اعلق
بوست حلو قوى
برضو مش الفكره اللى عاوزها هتوصل
ده مش بوست
دى حاجه بنحس بيها يوميا
بس بنحاول نقول
فيها ايه ما لازم يبقى فى اغنيه ويبقى فيه فقرا
انا يوم الحرب على غزه والتبرعات
مكنش معايا حاجه اتبرع بيها
بصيت لنفسى كده
ولموبايلى
وقولت هو انا هعمل به ايه ده
هكلم مين والناس بتموت
استحقرت نفسيتى
بقى انا شايل موبايل
وابويا بيصرف عليا
وبيدينى فولس
ودول مش لاقيين ياكلوا
ده مش معاه اربعه وتلاتين جنيه
وانا معايا الاربعه وتلاتين جنيه
بل واكتر
ومش هعمل بيهم حاجه
هى البلد ليه لازم يبقى فيها غنى وفقير
ليه ميبقاش كلو اغنيا
هو الغنى ليه غنى والفقير فقير
ليه السبب دايما انها سنه الحياه
مش عارف
This time i wish it is just not a true story 'but the sad part i'm sure it happens almost everyday ,34 L.E .a lot of people spends more than that on a cup of coffee :(
الحمدلله على كل شىء بجد الواحد مش بيحس بيقمة النعمة الى بتبقى فى ايده غير لو اتاخدت منه او شاف غيره محروم منها
بس تصرفها ده معناه انها جميلة اوى من جوه ربنا يدخل فى قلبها السعاده زى مادخلتها فى قلب الطفل ده
جميل أن تعطي "
من يسألك ماهو في حاجة اليه
ولكن الأجمل ان تعطي
من لا يسألك وانت تعرف حاجته
"
تمام
سلام مؤقت
جميييييييييييييييييييييييييل يا خوخه
اسامه الجزار
جزاكى الله خيرا
وجعله فى ميزان حسناتك
وثبتك وبارك فيكى
وبارك لكى فى ابنك شريف
احسنتى التصرف عزيزتى وهو دة اللى لازم يتعمل احنا مسلمين ولازم نساعد بعض خصوصا لو معانا ومش متاجين الفلوس الزيادة,ربنا يكرمك, تحياتى
ربنا يباركلك في وقتك اولا ويباركلك في مالك ثانيا
لانه برايي مشاركتك للطفل ده في ازمته وخروجه من هذا الانكسار المهين
اهم الف مره من دفع المصاريف
وبالمناسبه اسمحيلي اقول حسبنا الله ونعم الوكيل في
ام الساده قيادات هذه العزبه اللي نفسي اشوف فيهم يوم
كلاكيت للمرة الكتيييييييييييير اوى
بوست روعة كالعادة ياخوخة .. انا دموعى نزلت بجد.. جميل اوى انه يكون فيه ناس زى بطلة قصتك بيحسوا وبيدوا لغيرهم من غير ما يفكروا مرتين
ربنا يملا قلوبنا كلنا بالرحمة والمحبة والخير والرغبة فى العطاء بدون مانستنى المقابل .. حقيقى حاجات كتير ممكن تتغير فى مجتمعنا
شكرا بجد على البوست الجميل ده
:)
ربنا يبارك لها
ما شاء الله
أنا دخلت هالمدونة مرات و مرات من خلال مدونات أصدقائي و قريت مواضيع بمضامين مختلفة
بس عمري ما علقت
لكن هالمرة فعلا والله عجبني جدا الموضوع
سبحان الله
ديما يبعت لنا أشخاص و يدبر أمورنا بدقة متناهية
هالولد أكيد ماجاش براسه انه ممكن يرد المدرسة بهالطريقة
وأكيد أهله بعد تفاجؤوا
وفرحوا
المهم الحمد لله
الحمد لله انه الولد رجع المدرسة
والحمد لله انه الله وفقك لهالعمل
نعم الله علينا واااايد بس الانسان جحود
لو كانت قصة حقيقة يبقى جزاك الله كل خير
لو كانت من نسج خياللك يبقى جزاك الله كل خير بردة لتذكرينا بالعمل الخير
فى ناس محتاجين كتير صحيح بيبانو من بره انهم مش محتاجين لكن البيوت اسرار
جميل أن تعطي
من يسألك ماهو في حاجة اليه
ولكن الأجمل ان تعطي
من لا يسألك وانت تعرف حاجته
لا حول و لاقوة الا بالله
واضح انك حتتخصص فى القصص القصيره حلوه برضه زى اللى قبلها
تحياتى
ممممممم ... و في أسوأ من كدة كمان , الحمد لله على كل حال ... احنا أحسن من غيرنا كتيييييييير
عموما , عايز أقولك ان المثل اللي انتي حاطاة عللا جنب دة لا يجوز
عشان فب حديث قدسي معناة ان غلط نسب الدهر , عشان الدهر هو المولى عز و جل
يعني , مش قصدي حاجة غير اني أنبهك ان كتير من أمثالنا فيها لغط لغوي و ان كان غير متعمد
كمان مش عايز أشكرك على اللي انتي عملتية لدرش
سلمي على شيكو
ده احلى بوست قريتهولك فى مدونتك كلها
فعلا الواحد حاسس انه ابن كلب بالفلوس اللى معاه وملهاش اوجه صرف حقيقيه بينما غيره يتمنى منها
مجرد اربعه وتلاتين جنيه
شكرا ليكم كلكم على تواصلكم معايا
اختكم خيخة
... amr
تم تغيير المثل الشعبي
شكرالانك نبهتني
يا بختها بالسعاده اللى حتحس بيها
بعد ما تدفع الفلوس
بجد جميله اوى
Post a Comment