بدل عيل

 بابا انا عايزه اتجوز

ياريت عشان اخلص منك .. بس الناس الغريبه ذنبها ايه

لا فهمتني غلط انا مش عاوزه اتجوز عشان ازهق ناس تانيه

امال عايزه تتجوزي ليه يا أم العافيه زهق ؟ ولا عايزه تصيفي ؟

لا يا بابا افهمني انا عايزه اتجوز عشان بدل الجواز وبدل العيل

طول عمري بسمع عن بدل إنتقال – يجعلي في كل خطوة سلام –

 أو بدل عدوى – بعد الشر عليا ان شالله عدويني –

 أو بدل إقامة – يجعلها قدم السعد -

أو حتى بدل فاقد – يارب الي في بالي -

لكن اول مره في حياتي اسمع عن بدل الجواز .. دي مش كلمه وحشه محدش يطير بعقله .. بدل الجواز ده عباره زيادة اتنين جنيه في مرتب الحكومه

ودي تقدر تحتسبها مكافأة لانقاذك روح بشرية من الدهس بقطر العنوسه .. او تعتبرها حاجه تصبرك على ما بلاك .. او يمكن حاجه تعينك على تسديد اقساط جوازك بقية عمرك

بصراحة الاتنين جنيه مغريين اكتر من جوازك من السيدة الفاضله هيفا – هي مش بقت سيدة دلوقتي مودام يعني ولا ايه ؟ - وهي تحتكم على الاتنين جند فين ولا عمرها شافتهم يدوب بتشوف ورق اخضر بس ورق الملوخية يعني مفهومه طبعا

الحقيقة مغريات الجواز في بلدنا كترت حواليكم يا شباب .. ليكم حق تضعفوا بصراحه وغلطان اللي يفكر ينحرف .. خصوصا انه لقى حد يوجهه .. وكمان يديله اتنين جنيه جنيه ينطح أربعة أربع

اتنين جنيه يا ظلمة يالي متعرفوش ربنا .. يعني تستر نفسك وبيتك وان شاء الله مش هتتفضح فضيحة الموظف يوم طلوعه على مرتب أول الشهر.. توكل على الله ودوس يابني

ده غير ان فيه مفاجأة الصيف ولكل موسم حلاوة العيل يعني لو ربنا اكرمك وجبتلك عيل هتاخد بدل عيل اتنين جنيه كمان والعرض ده ساري حتى قدوم تاني عيل مش لنفاذ الكميه زي ما كنت متخيله يعني هتاخد بدل عيل على الاول والتاني بس وبعد كده لازم تربط الحزام لان لو فكرت تغلط مع مراتك يبقى هتشحت بالعيل التالت يعني الحكايه مش سبهلله كل سنه تجيبلك عيل وتفكر تعملك مزرعة ارانب سواء ارانب بشرية او نقدية من الاتنين جنيه ولا حاجه

 الحكومه مبترميش كتاكيت قصدي جنيهات .. خدهم في جيبك وبوس حلمة ودنك

والكلام ده يطبق على البنات كمان .. لازم البنات تبقى واعيه اكتر من كده وتحاول تصطاد الاتنين جنيه بسرعه المتمثلين في العريس .. وكمان تتمسك بحقها في الوظيفه وحذاري من القاعده في البيت هيضيع عليها حاجات كتير وحقها هيتهضم .. اضربي اتنين جنيه من المرتب الاساسي في الحوافز في البدلات والذي منه يعني كلها كام سنه وتبقي من ذوات الريش

يعني الاتنين جنيه دول اللي ممكن ناس من اللي - اللهم احفظنا - بيشتمو في الحكومه عمال على بطال .. ممكن الاتنين جنيه يعملو حاجات كتير قوي زي تذكرة اتوبيس مكيف .. اي نعم هو بقى اتوبيس بس ومابقاش مكيف وكمان شويه مش هيبقى اتوبيس اصلا .. بس احسن من التوك توك

الاتنين جنيه دول يجيبو اربع سجاير ال ام فرط .. وقدامك بقى تختار ال ام ازرق او لو اهلاوي هاتها احمر

كمان الاتنين جنيه دول ممكن يساهموا في حل ازمة تاكسي لو ركبه واحد هو اللي هيدفع .. ساعتها وبمنتهى الافتخار هتقولي انا معايا اتنين جنيه فكه !!

هييه ... الواحد نفسه اتفتحت للجواز .. انا بس خايفة من طمع العرسان فيا .. اتنين جنيه زياده وماله واهي كلها ستره وربنا يسترعلى ولايانا