حبة حاجات كدة

وأنا صغيرة ماما كانت ساعات بتغنيلي أغنية كنت بحبها أوي...وكنت معتقدة اعتقاد تام إن الأغنية دي بتاعتي ومعمولة ليا مخصوص
لغاية لما اكتشفت من فترة بسيطة إن الأغنية بتقول
"بنت يا دوسة شايلة البسبوسة"
مش
"بنت يا نوسة شايلة البسبوسة"
زي ما كنت متعودة اسمعها طول عمري

(من الواضح إن ودني عايزة تضبيطات جامدة هههههه)
فيه أغاني كتير بحبها أوي عشان كنت دايما بسمعها أيام طفولتي "البريئة"...وهي أغاني عفاف راضي وعبد المنعم مدبولي...بس أغاني عفاف راضي على وجه الخصوص (اللي مسمياها "الكلاسيكيات النهادية") بتعيشني احلى حياة...لأنها بتاخدني وتوديني لدنيا تانية فوق الوصف...فعلاً احساس راقي جداً من البراءة والصفاء والأمومة والحنان والسعادة والبساطة والرقي والأحلام الللا نهائية الممكنة والراحة...بمعنى أوضح

"طفولة سعيدة"