(( تحديث مهم : البلوج كانت مسروقة منى و رجعتها ... لو حد دخل قالكوا حاجة كدة ولا كدة يبقى أكيد مش أنا ... لحد ما أتصرف ))
نهـــــــــــــــــايته
طبعاً انتى مستغربة انا بكتبلك ليه بعد ما سيبتك و خلعت على برة ... و حلفت ميت يمين ما انا راجعلك تانى ولا شايف وشك تانى ... استنى بس متفرحيش كدة و تفكرى انى بكتب عشان وحشتينى لا قدر الله ... انا بس بكتب علشان فى حاجة جات فى دماغى قولت أسألك عليها ... يمكن انتى تعرفى تجاوبينى ...
أول ماأخدت قرار السفر يا (( ست الحبايب )) ... أو تقدرى تقولى انى مخدتش قرار السفر ... دا انا كنت مضطر لكدة نظراً للظروف اللى انتى عارفاها يا (( حاجة )) و مش محتاج أحكيها ...
المهم ان في الأول سمعت كلام كدة زى (( يابنى لو سافرت هتتبهدل )) و (( الغربة مرة و صعبة )) و (( يعنى هم اللى سافروا قابلك عملوا ايه ؟ )) و (( ابقى افتكرنا بأى حتة طرية من هناك تسحبنا من البلد بنت التيييييييييت دى )) ... الأخير ده كان صاحبي ... الا هو عامل ايه دلوقت ؟؟ ... انا سمعت ان هو مش بيقوم من على القهوة ... و فى ناس بتقول انه اخفى شهادة البكالريوس بتاعته عشان يشتغل فراش بالثانوية العامة ... و ناس تانية بتقول انه غرق فى البحر و هو بيحاول يهرب على بلد اوروبي ... الله يرحمه بقى اذا كان ميت و يمسيه بالخير لو كان حى ...
هو انا ليه بقى يا (( ماما )) لما كنت بسمع الكلام ده من حد .. كنت بحس انه بيقوله مش علشان هو مقتنع بيه ... انما عشان هو ميقدرش يعمل غيره ...
ليه يا (( ماما )) كنت بحس ان لو حد فيهم جاتله الفرصة انه يسافر يشتغل برة كان هيجرى يجيب شنطته (( اللى تلاقيه محضرها أصلاً من قبل كدة )) ... و يسافر برة حتى لو هياخدها عوم فى وسط سمك القرش ؟؟
ليه يا (( ماما )) كلهم كانوا بيتكلموا عن البهدلة اللى هشوفها لما أسافر ... رغم انهم عارفين ان انا و انا معاكى كمان متبهدل ... رغم ان الفرق الوحيد بين بهدلتك و بهدلة الغريب ... ان بهدلة الغريب ليها مقابل ... لكن بهدلتك علشان انا ابنك و مقدرش أقولك انتى بتعملي كدة ليه ...
الأهم بقى :
ليه يا (( ست الحبايب )) بعد سنين بعيد عنك ... مش عاوز أرجعلك تانى ؟؟
ليه يا (( ست الحبايب )) بعد سنين بعيد عنك ... مش عاوز أمشى فى شوارعك تانى ؟؟
ليه يا (( ست الحبايب )) بعد سنين بعيد عنك ... مش عاوز أسمع أخبارك ؟؟
ليه يا (( أمى )) بعد سنين بعيد عنك ... انا مش حاسس بالغربة ؟؟
لـــــــيــــــــــــــــه ؟؟
25 ♥♥ ارغى يا عم الأمور ♥♥:
ترجعلها ازاى ؟؟
وليه ؟؟
بعد كل اللى بيحصل فى مصر مصر مبقاش فيها حاجة واحدة تفرح عشان توحشك وترجعلها وتفكر تعيش فيها من تانى
اييييييييييه ده انت رجعت تانى امتى بعد الاختفاءات المتواليه بتاعتك:)
اولا حمد الله على السلامه للكتابه طبعا مش للبلد...
ثانيا:الناس اللى بتقولك اوعى السفر وحياتك لو جالهم فرصه يسافروا لبلاد الواق الواق هيسافروا..
على راى الست هند صبرى:
البلد بات اسيه اوى على ولادها ياباشا..
بيييييييييع يالطفى,,قصدى سافر يالطفى
تصدق مالاقية اجابه!!!!
نـدا
*****
آه و الله يا ندا
الواحد مستنى بفارغ الصبر أى فرصة يسافر
و مش متأكدانى ممكن أفكر أرجع تانى
عامة شرفتينى
تحياتى
الشعب لابد له من حكومه تشكمه
**************************
الله يسلمك يا رب
و الله فعلاً أنا هسافر
بس انا ماسميش لطفى
:D
كيكى
*****
ولا هتلاقى
سيبك انتى ... الا اتنين جنيه يجيبوا كام بيضة دلوقت ؟
هههههههههههه
نورتي
انا مختلف معاك يا لورد
البلد دي مافيش زيها
بحلوها وبمرها
واكيد مرها اكتر من حلوها بكتير
بس المرار ده من صنعنا احنا البشر
إحنا ولاد البلد دي
لو راعيناها هتراعينا ونشوفها حلوة في عينينا
ولو هملناها وكرهناها وهجرناها مش هتهنالنا عيشة فيها
صدقني يا صاحبي العيب فينا مش فيها
مش كده ولا ايــه ؟
إحســان المهندس
اممم
بلدي وان جار الزمان عزيزة :)
دور جواك تلقاها هي الصحبة وهي الاهل
عارف ليه مش حاسس بغربة ومش عايز ترجع
لان المال في الغربة وطن والفقر في الوطن غربة
(علي بن ابي طالب رضي الله عنه)
تحياتي
and when all the people who think and have brains leave it, it will be left for the idiots..
and no where is perfect as well, arab countries are not treating us well, and the west is always suspicious about us and our intentions.
شفقة هانم واحسان بك
******************
استاذ احسان
و الله العظيم واحشنى
و شرفتنى بجد
بالنسبة بقى للموضوع ده
انا أساساً لحد دلوقت محصليش الشرف و سافرت برة
لكن بجد حاسس انى لما هسافر ان شاء الله هيكون ده احساسى
بص هى بتختلف من واحد للتانى
لكن اؤكدلك ان الاحساس ده موجود عند ناس كتير ( و انا اعرف بعضهم ) .. مش حاسين بالغربة فعلاً
تحياتى
اقصوصة
*******
بتختلف من واحد للتانى
شرفتينى
فكرة من الزمن ده
****************
ما بالك بقى فى واحد أساساً قرفان من البلد و من اللى فيها
و يطلع برة يشتغل و يطحن نفسه و يلاقى نفسه بيكسب هيعمل ايه ؟
تحياتى
Mohaly
*******
But in Arab countries ( and I mean Egypt specifically ) you are treated bad and have nothing against this .. but in the west .. you treated bad but when you work hard .. and Prove yourself they have to treat you well
& thanks for visiting me
ازيك يا خالد
ويارب تكون بخير
موضوعك وجعني اوي
قد كدة خلاص علاقتنا اتشوهت ببلدنا
وممكن فعلا تقول كل ده وانت مقتنع بيه ؟
مش انت بس وغيرك كتير
يا خسارة
مش قادرة اقولك غلطان وارجع
ومش قادرة اقولك من حقك تكرهها
مينفعش
للاسف الاتنين صعب
كل اللي قولته ده
مش الشعب
يعني كرهك المفروض ميكونش للبلد
كرهك يكون للي كرهونا في البلد
كوشيا
******
المدونة بترقص من الفرحة
نورتينى و الله
و الاحساس ده موجود عند ناس كتير فعلاً
ربنا يستر بقى على اللى باقى من انتمائنا
تحياتى
عاشقة الفردوس
*************
المشكلة انهم مننا و احنا منهم
مش عارف أقول ايه بجد
نورتى المدونة
تحياتى
والله يا ابني كلامك مؤثر وحاسس به بس بجد خليك بعيد عنها أحسن لو امورك مستقرة...حنعمل ايه يعني
ما أهو أكيد مش حيطلع ويتغرب حبا في الغربة
تمنياتي بالتوفيق
تحياتي
Micheal
*********
بجد الواحد نفسه يشوف بلده أحسن بس مش عارف فيه ايه
عامة حضرتك نورتنى يا استاذ مايكل
تحياتى
لا لو حد شتمنا هنقول انه انت ...اه اوعى تضحك علينا
بس انت عارف لو عملتها انت حر وحياتك هنقوم عليك المدونات كلها
ههههههههههههههههه
من اجل
وطن آمن مستقر...حياة افضل.
من اجل
محاربة الفساد....مقاومة التزوير
من اجل
ان تكون مقدرات هذا الوطن بأيدينا
شارك في الحملة الشعبيه للقيد بالجداول الانتخابية
ضع شعار الحملة علي مدونتك
عذرا علي عدم التعليق علي البوست
شفقة و احسان
************
دا كان يوم غريب .. قعدت كتير على ما رجعت المدونة
بس الحمد لله حتى الآن انا فى السليم
تحياتى
كتبت فابدعت .. مش لاقى كلام والله ..
المقال عجبنى اوى :)
ميدو بيه
♥♥♥♥♥♥♥♥♥
دى أقل حاجة عندى يا باشا
هههههههههههههههههه
مبسوط انه عجبك يا حبي
تحياتى
إرسال تعليق