ارحم دماغك!

في الأيام السابقة كنت أعيش حالة من (القريفة)..مع أن موضوعا كنت أود عرضه هنا إلا أنني لم أستطع في الواقع، إضافة إلى انشغالي فقد وجدت أن الجلوس للكتابة قد صار ثقيلا للغاية لسبب لا أعرفه، ربما هو ما وصفته لأحد أصدقائي، بأني لم أعد قادرا على التعبير عما أشعر به (لفرط فداحته) تجاه ما صرت أرى مؤخرا وأسمع..

مع قدوم شهر رمضان المبارك وتداعي ذكريات النصر، حالة من التفاؤل أصلحت (قليلا) مما أجد..بحيث استطعت كتابة هذه السطور، بمعنى أنك إذا استطعت قراءة هذه السطور (عزيزي الزائر) ولم أقم بإلغاء التدوينة، فعليك أن تطمئن إلى أنني -نوعا ما- بخير، وإن كنت مشغولا بشدة في هذه الفترة التي قد تثمر بعض التدوينات التقنية، التي سوف أقوم بها كنوع من توثيق بعض حلول المشاكل التي قابلتني في الفترة الماضية..

رمضان كريم..تقبل الله منا ومنكم الصيام والقيام..

المدونة أروى الطويل قامت بتمرير تاجين (ومصحف) إلي (معلش القافية حكمت: تاجين ومصحف)
يمكن أن أجيب عنهما كنوع من التسخين..لدي موضوعات مكتوبة بالفعل منذ فترة طويلة، وستكون استكمالا جيدا لما سبق نقاشه في الحرية والشريعة، وما لحقها من تدوينات تناولت النظام الإسلامي للدولة..كما أراه..

التاج اليمين..أقصد الأول..

• اسمك إيه؟
  احمد!..خلاص مش شغلانة يعني!
• لو قلت لك عرف نفسك هتقول إيه؟
  مش هقول حاجة..هسيبك على عماك
  لو حد عرفني يبقى يقول لي
• اسم مدونتك إيه؟
  ارحم دماغك!..علامة التعجب دي لازم على فكرة..ولازم كمان همزة وصل..
• إيه الاسم الغريب ده؟..يعني إيه؟
  يعني ريح دماغك لا تجيب جاز..حلو التفسير ده ولا الاسم أسهل؟
  بيفكرني باللي قال بيفيش هوامش في البلكون، قال يعني إيه بلكون..
• طيب، ما هو توجهك السياسي؟..ولأي جهة تنتمي؟
  بجد حاسس اني في المكتب
  بس السؤال عاجبني جدا..يعني السؤال بيفترض انه الشعب المصري فعلا (كما يجب أن يكون) كل أفراده من أصحاب الرأي والتوجهات والانتماءات، وانه الحراك السياسي فبلدنا مقطع بعضه يعني (حلق حوش) والشعب مساء الايجابية ورغيف العيش كبيييييييييير والكل بينتخب وربنا يخلي لنا الريس..
  عموما تيار اسلامي..أصولي يعني..مبيبانش عليا معلش..
• ما رأيك في جماعة الاخوان المسلمون؟
  لا بقى ده اللي عامل التاج كدة ضابط أمن دولة!
  عارفين عرفت ازاي؟..عشان مبيعرفش عربي..اسمها جماعة الاخوان المسلمين..مش المسلمون!..عموما انا عارف انه الكلام بالنحوي بينرفزهم..ما علينا..
  عموما أظن تدوينة الحرية والشريعة والنقاشات اللي فيها تفضح رأيي بالصوت العالي يعني!
• ما رأيك في انشاء رابطة تدوينية تجمع المدونين؟
  بصوا..اللي عايز يعمل موقع ويجمع فيه المدونات يعمله من سكات..
  كله بيطلع يقول لنا رابطة ونقابة وهيئة التحرر الوطني وكلام كبير وترسى في الآخر على موقع فيه فهرس مدونات!
• ما رأيك في آداء المدونين المصريين مقارنة بالآخرين؟
  الآخرين العرب ولا عرب وعجم ولا صهاينة يعني ولا مين؟
  عموما المدونون المصريون يتفاخرون بتجربتهم التي يعتبرها كثير من العرب رائدة..
• إيه رأيك في المدونات دي؟
  • أنا إخوان
    ده موقع صحفي..عموما هذا انطباع قديم..لأنني منذ كان هذا انطباعي بعد الزيارات الأولى انقطعت عن المتابعة، باعتبار أنني أجد فائضا من الأخبار دائما..
  • جبهة التهييس الشعبية
    اسم على مسمى!..خصوصا حتة الشعبية دي
  • انسى
    نقلة نوعية بجد..رائعة بلا حد!
  • بنت سعد
    هي مش غيرت اسمها؟..على أي حال مدونة ممتازة..
  • واحد بيحب مصر
    بجد ده تحقيق..عموما الواحد ده مكنش معايا ضم ولا ربط ولا منهج ومقابلتوش يا بيه طول عمري!
    ولو عايزني محبش مصر زيه حاضر، مش هاحبها زيه، هشوفلي طريقة تانية
    للأسف مقصر في متابعة المدونة، هي عندي في القارئ، لكن في الغالب ليس هناك انطباع محدد..
  • لسانها مولوتوفي..
    اختيار موفق للاسم..

• تقول إيه لمبارك؟
  زي ما بقول لكل الناس!
  ارحم دماغك!
• طب وجمال؟
  لا ده بقى أقول له ارحم نفسك
• لو مكنتش مصري كنت تتمنى جنسيتك تكون إيه؟
  أنا مش معترف أصلا بحدود سايكس بيكو ولا باتفاقية سايكس بيكو وانا مكنتش طرف في سايكس بيكو..أنا باتعامل معاها بس باعتبارها أمر واقع، انما طالما نفتح الباب للأمنيات يبقى مفيش سايكس بيكو خالص..
• ليه؟
  ليه مش معترف؟ أصل أنا مكنتش طرف في الاتفاقية!..مالي انا بشوية الرعاع اللي اتفقوا؟!
  أعطوا من لا يملك لمن لا يستحق وعمالين يقسموا الغنائم كقطاع الطرق..شوية قراصنة وبيقسموا النهيبة علني!!
• لو انت مكان مبارك، لخص كدة كنت هتعمل إيه؟
  (وَأَنِ احْكُم بَيْنَهُم بِمَا أَنزَلَ اللّهُ وَلاَ تَتَّبِعْ أَهْوَاءهُمْ وَاحْذَرْهُمْ أَن يَفْتِنُوكَ عَن بَعْضِ مَا أَنزَلَ اللّهُ إِلَيْكَ فَإِن تَوَلَّوْاْ فَاعْلَمْ أَنَّمَا يُرِيدُ اللّهُ أَن يُصِيبَهُم بِبَعْضِ ذُنُوبِهِمْ وَإِنَّ كَثِيراً مِّنَ النَّاسِ لَفَاسِقُونَ) (المائدة : 49 )
  ولو معرفتش يبقى هسلمها للي يعرف..نسأل الله الثبات..
• لما بتسمع كدة خبر بيقول ان الريس مات بتحس بإيه؟
  السؤال ده إجباري؟!
  عموما مش باحس بحاجة!..أصلي اتعودت!..باسمع الخبر كل يوم تقريبا..
• ماذا يمثل التدوين بالنسبة لك؟
  مخزن لأفكاري..بدل ما افضل انتع فحسي كل شوية (محدش يطلب ترجمات الكلمات الصعبة)
• تحب تقول إيه لأولاد وأسر المعتقلين السياسيين وعلى رأسهم الاخوان؟
  شدة وتزول يا جماعة!..ربنا يجعلها تطهير لذنوبكم..ولو مظلومين في سبيل الحق يبقى في ميزان حسناتكم..
• عندك استعداد تتضامن معاهم؟
  في إضراب ولا حاجة؟..أنا في الخدمة..
• أجمل بوست كتبته وليه؟
  قلّب كدة فمدونتي وقل لي!
  ممكن أقول ده..وده..
  أما ليه..فلأنها الفكرة اللي نفسي البشرية فبلدي تفهمها وميبقاش في خلاف عليها..خصوصا بالنسبة للأول..بغض النظر عن أي حاجة تانية!
  احنا مختلفين في التوجهات والأفكار وحتى الدين..لكن مظنش انه حد منا بيختلف على انه الشمس بتطلع الصبح يعني!..اللي ميشوفش من الغربال يبقى اعمى!
  (هو انا مالي بارمي كلام زي الطوب النهاردة على غير العادة؟)
• أحلى مدونة دخلتها؟
  محمد إلهامي طبعا وبكل تأكيد..
• لو تدوينة ملهاش تعليقات تحس بإيه؟
  نفس احساسك لما تتصل بصاحبك تلاقي تليفونه مغلق
• ما رأيك في فكرة التاج؟
  هو مين صاحب الفكرة دي؟
  حد يناولهولي بس..
• وأخيرا ايه رأيك في مرسل هذا التاج؟
  شخصية متطرفة..كنت قريب من كدة وانا صغير..عادي عادي..مرحلة وبتعدي..

ومع انه آخر سؤال عليه أخيرا لكن كان في سؤال تاني عن تمرير التاج..مش مشكلة خليه للآخر مع التاج الشمال، قصدي التاني..وهو:

• لما باحب أتابع أخبار التكنولوجيا والعالم..يبقى عالنت..
• لما أحب ألعب عالكمبيوتر..لو على شبكة، يبقى هالعب Generals, Age of Empires وزمان كنت بالعب Red Alert بس طبعا جينيرالز ضربتها بالنووي
  ولو بقى مش على شبكة بالعب الألعاب اللطيفة بجد..على igoogle بتاعي بالعب Bejeweled..وساعات ألعب Worms Armageddon وساعات حرب إمبابة
• لما أحب أقرأ مقالات اسلامية حلوة وأسلوبها ممتع..يبقى أستاذ فهمي هويدي ودكتور محمد عمارة والشيخ محمود الحساني..
• لما احب اكتب..الكيبورد مبيقولش لأ..
• لما أحب أطبخ..أطلب المطافي..(نمرتها كام اليومين دول؟)
• لما أحب اقرأ أدب عالمي..باشوف لي حاجة أحسن اعملها..
• لما أحب اختار قلم عشان أكتب بيه..باشخبط بالقلم واختبره شوية..
• لما أحب اعمل أي حاجة..بافكر فيها الأول..
• لما أحب اطلع من حالة حزن أو غضب أو ضيق..بانام..أو اكن يعني بأي طريقة..
• لما أحب ادور على أي تسجيل اسلامي..غالبا عالنت..
• لما أحب اتكلم..باتنحنح..وباحرك إيدي ساعات على مستوى منخفض..بس منغير ما يكون شكلها مؤذي يعني..
• لو هتكلم يبقى في السياسة، الشغل، هانكت أو انكد..
• لما احب اخرج..كوفي شوب، واشرب اسبرسو..بس لما يتوفر الوقت والدماغ…
• لما أحب اقرأ مجلات..بطلت الشغلانة دي من زمان..دلوقتي تقريبا مش بشوفها غير عند الحلاق..

أمرر التاجين (هو في أمر من كدة؟)..لكل من:
من..
هو حد لسة مجاوبوش يا جماعة؟..اللي مجاوبوش يتفضل..
بسرعة عشان هنقفل..